IEspíritu Dios techmaka nemilistli
8
Aman tej,
Dios xok kintlajtlakolmaka on yejuan nemij san sekan iuan Cristo Jesús,
yejuan nouikaj ken on Espíritu Santo kineki niman xken intlalnakayo kineki.
2 Itechkopa JesuCristo,
ipoder on tlanauatijli yejuan kisa itech on Espíritu Santo yonechmanauij itech ipoder on tlanauatijli de tlajtlakojli.
On tlanauatijli de tlajtlakojli nechuikaya ipan mikilistli,
pero aman on Espíritu Santo nechuika ipan nemilistli.
3 Itlanauatil Moisés okipoloj itekiuajyo pampa totlalnakayo xouel okitlakamat.
Yejua ika,
on tlen on tlanauatijli xouel okichiu,
Dios okichiu ijkuak okuajtitlan iKonetsin yejuan onochiu Tlakatl ikan itlalnakayo ken totlalnakayo tejuamej yejuan titlajtlakolejkej.
Dios okuajtitlan ken itlaj uentli para kipopolos tlajtlakojli.
Ijkon tej,
okixoxotonij ipoder on tlajtlakojli
4 para tejuamej yejuan titouikaj ken on Espíritu Santo techyakana,
niman xken totlalnakayo kineki,
tiuelij tikchiuaj on tlajtlamach* yejuan tlanauatia on tlanauatijli.
5 On yejuan nouikaj ken intlalnakayo kineki sa konmatstokej on tlajtlamach* yejuan intlalnakayo kineki,
pero on yejuan nouikaj ken on Espíritu Santo kineki,
sa konmatstokej on tlajtlamach* yejuan on Espíritu Santo kineki.
6 Tla tikomatstikaj on tlajtlamach* yejuan motlalnakayo kineki,
sano yejua mitsmiktis,
pero tla tikomatstikaj on tlajtlamach* yejuan on Espíritu Santo kineki,
sano yejua mitsmakas nemilistli niman yolseuilistli.
7 On yejuan konmatstokej on tlajtlamach* yejuan intlalnakayo kineki,
tlaueliknijtin nemij iuan Dios pampa nion xkinekij kitlakamatiskej itlanauatil,
nion xuelij kitlakamatij.
8 Yejua ika tej,
on yejuan nouikaj ken intlalnakayo kineki xueli kipaktiaj Dios.
9 Pero tla nenkipiyaj on iEspíritu Dios ipan nemoyojlo,
tla ijkon,
xnemouikaj ken nemotlalnakayo kineki,
yej nemouikaj ken on Espíritu kineki.
Niman tla yakaj xkipiya iEspíritu Cristo,
yejua xteyaxka* itech Cristo.
10 Pero tla Cristo yonenkiselijkej,
nemoalma kipiya nemilistli pampa Dios kijtoua ika nochi nemotlajtlakoluan yokintlapojpoluij,
maski nemotlalnakayo yomik ipampa on tlajtlakojli.
11 Niman tla nenkipiyaj iEspíritu Dios on yejuan okiyoliuitij* Jesús niman okikuiteu ipan itlalkon,
no kimakas yenkuik nemilistli nemomikatlalnakayo itechkopa iEspíritu yejuan nenkipiyaj.
12 Ijkon tej,
nokniuan,
noneki titouikaskej ken on Espíritu Santo kineki,
niman xken totlalnakayo kineki
13 pampa tla nemejuamej nemouikaj ken nemotlalnakayo kineki,
nemoalma mikis.
Pero nemoalma kipiyas nemilistli tla itechkopa on Espíritu Santo nenkipopolouaj on tlajtlakojli yejuan nenkichiuaj.
14 Nochimej yejuan kinyekana on Espíritu Santo,
tekoneuan itech Dios.
15 On Espíritu Santo yejuan onenkiselijkej xmechuika para nenesclavos yeskej oksejpa itech on nemojtijli,
yej kichiua para nentekoneuan itech Dios.
Yejua ika,
tikijtouaj:
“Abba*,
toTajtsin.”
16 On Espíritu Santo niman toyojlo techijlia ika tiikoneuan Dios.
17 Niman tla titekoneuan itech Dios,
tikseliskej on herencia yejuan otechprometerouilij.
In herencia tikseliskej iuan Cristo tla iuan titlajyouiyaj para más sakin* tikseliskej on ueyilistli yejua iuan.
18 Nejua nikita ika on tlen aman tikijyouiyaj xitlaj* kijtosneki tla tikixtlaloskej iuan on ueyilistli yejuan sakin* tikseliskej.
19 Nochi on tlen onkaj,
on tlen Dios okichijchiu,
kichixtokej niman sanoyej* kinekiskiaj ma yejkotetsi on tonajli ijkuak Dios kimpanextis on yejuan ikoneuan.
20 Nochi tlen Dios okichijchiu oijtlakau.
Pero ijkon onochiu xpampa on tlajtlamach* ijki okinek,
yej pampa Dios ijki yotlatlajtlalijka.
Pero maski ijki onochiu,
sanken* onkatka on tlamachalistli*
21 ika onyas se tonajli ijkuak nochi tlen onkaj ipan in tlaltikpaktli xok ijtlakauis.
Nochi tlajtlamach* nomanauis ijkon ken ikoneuan Dios no nomanauiskej.
22 Tikmatstokej ika hasta aman nochi tlen Dios okichijchiu nokokoua niman tena ken sen siuatl ijkuak kitlakatilia sen konetsintli.
23 Niman xsan on tlen Dios okichijchiu tlajyouiya,
yej tejuamej no yejuan ye tikpiyaj on Espíritu Santo ken achtoj parte de nochi on tlen Dios techtlayokolis.
Tejuamej no sanoyej titlajyouiyaj chika tikchixtokej ma yejkotetsi on tonajli ijkuak Dios techselis para tiikoneuan ijkuak ipan totlalnakayo xok itlaj techpajsolos.
24 Yotimakiskej pampa tikpiyaj yejua on tlamachalistli*.
Pero tla on tlen tikmachayaj yonochiu,
tla ijkon,
xok itlaj tikmachaskej pampa on tlen tikmachayaj yonochiu.
25 Pero tla on tlen tikmachaj sanken* xnochiua,
tla ijkon tikchaj ikan tlajyouilistli.
26 No ijki tej,
on iEspíritu Dios techpaleuiya ika on tlen xtiuelij,
pampa tejuamej xueli tikchiuaj oración ken noneki.
Pero sano yejua on Espíritu Santo kitlajtlanilia Dios topampa ikan nejeltilistli yejuan xakaj ueli kijtoua ikan tlajtojli tlinon kijtosneki.
27 Niman Dios,
yejuan techyolpejpena,
kimati tlinon kijtosneki on Espíritu,
pampa on Espíritu kitlajtlanilia ken Dios kineki impampa on yejuan iyaxkauan.
Titetlaniskej itechkopa Cristo
28 Tikmatstokej ika Dios kitekitiltia para kuajli,
nochi on tlajtlamach* yejuan impan nochiua on yejuan kitlajsojtlaj*,
on yejuan okintlapejpenij para kichiuaj on tlen kineki.
29 Dios kimatiya akinomej kineltokaskej Cristo.
Yejuamej okintlalij para nemiskej ken Cristo on iKonetsin para yejua yakatstias intsajlan miyekej ikniuan.
30 Ijkon tej,
Dios okinnots on yejuan okintlalij para nemiskej ken iKonetsin.
Xsan okinnots,
yej kijtoua ika nochi intlajtlakoluan yokintlapojpoluij niman on yejuan kijtoua ika nochi intlajtlakoluan yokintlapopoluij no okinmakakak ueyilistli.
31 Yejua ika tej,
¿tlinon uelis tikijtoskej?
Tla Dios kipiya iyojlo para techpaleuis,
¿akinon uelis techixnamikis?
32 Dios,
hasta iKonetsin xokinenek* para topampa okitemakak,
yej topampa okitlalij iKonetsin ken uentli para omik.
Niman tla yejua ijkon okichiu,
¿hasta kenijki tej,
no xtechmakas iuan iKoneu nochi on okseki tlatiochiualistin?
33 Xakaj uelis kinteixpanuis on yejuan Dios yokintlapejpenij pampa Dios yokijtoj ika nochi intlajtlakoluan yokintlapojpoluij.
34 ¿Akinon tej,
uelis kintlajtlakolmakas?
Xakaj uelis pampa Cristo yejuan omik niman oksejpa oyoliu* nemi ne iyekmakopa Dios kampa topampa tlajtojtikaj.
35 Xakaj uelis techxelos itech itetlajsojtlalis* Cristo.
¿Tlen uelis kichiuas on tlen teajman,
noso on tlen teyolkokoj,
noso on tlauejli niman tlajyouilistli,
noso apistli,
noso tla poliui on tlakentli*,
noso tla itlaj topan nochiua,
noso tla techmiktisnekij?
¡Ka!
Xitlaj uelis techxelos itech itetlajsojtlalis* Cristo.
36 Ijkin tej,
kijtoua in Yektlajkuilojli:
Ay Dios,
san mopampa nochipa on tlakamej techmiktisnekij.
Techmatij ken itlaj borreguitos yejuan kinmiktiaj.
37 Pero ipan nochi in,
tikmatstokej ika titetlanij nochipa itechkopa Cristo yejuan otechtlajsojtlak.
38 Kuajli nikmatstikaj ika xonkaj itlaj nion xakaj uelis techxelos itech itetlajsojtlalis* Dios.
On mikilistli,
noso nemilistli xueliskej.
Niman on ángeles noso on ajakamej yejuan tekiuajkej,
niman nochi on oksekimej xkuajkualtin espíritus no xueliskej.
No xueliskej tej,
techxeloskej itech itetlajsojtlalis* Dios on tlen aman nochiua noso on tlen okse tonajli nochiuas.
39 No xuelis tej,
kichiuas on tlen onkaj ne iluikak noso ipan tlaltikpaktli.
Nion se de nochi on tlajtlamach* yejuan Dios okinchijchiu xuelis techxelos itech on itetlajsojtlalis* Dios yejuan otechmakak itechkopa toTEKO JesuCristo.