Pablo okixtij sen ejemplo ipan on namiktilistli
7
Nokniuan,
nemechtlajkuiluiya nemejuamej yejuan nenkixmatij on tlanauatijli.
Nemejuamej ye nenkimatstokej ika on tlanauatijli san ueli kimandaroua yakaj chika yejua yoltikaj.
2 In sen ejemplo.
Ijkuak se nonamiktia,
on tlanauatijli kimandaroua on siuatl para ma nosentlalijtia iuan iueuentsin hasta kaman miki.
Pero tla yomik iueuentsin,
on tlanauatijli xok valeroua para on siuatl.
3 Yejua ika tej,
tla on siuatl nosentlalia iuan okse tlakatl chika iueuentsin nemi,
yejua nochiua tlakapapatlaketl.
Pero tla iueuentsin miki,
on tlanauatijli yejuan kisentlaliaya iuan iueuentsin xok valeroua para yejua,
niman maski yejua nonamiktis iuan okse tlakatl,
xnochiua tlakapapatlaketl.
4 No ijki nokniuan,
nemejuamej yonenmikkej itech on tlanauatijli pampa yonenmikkej iuan Cristo.
Niman aman nennemij san sekan iuan Cristo yejuan oyoliu* niman onokuiteu ipan itlalkon.
Yejua in onochiu para tichiuaj itekiu Dios yejuan kipaktia.
5 Ijkuak xe timikiyaj iuan Cristo,
titlajtlakouayaj ken toyojlo kinekiya.
Niman ijkuak otikmatkej tlen kijtoua on tlanauatijli,
toyojlo más kinekiya tlajtlakos,
niman in otechajkuilij mikilistli.
6 Pero itech on tlanauatijli yejuan techyekanaya ikan ipoder,
aman yotimikkej.
Yejua ika,
aman tiuelij tikchiuaj itekiu Dios ika on yenkuik nemilistli yejuan techmaka on Espíritu Santo niman xejua ika on tlanauatijli yejuan xok tlamandaroua.
On tlanauatijli niman on tlajtlakojli
7 Tla ijkon,
¿tlinon tej,
tikijtoskej?
¿Tikijtoskej ika on tlanauatijli xkuajli?
¡Melauak tej,
ika ka!
Pero tla xejua on tlanauatijli yeskia,
nejua xnikmatiskia tlinonon tlajtlakojli.
In sen ejemplo:
Nejua xnikmatiskia tlinon kijtosneki nikeleuis on tlen teyaxka* tla on tlanauatijli xkijtoskia:
“Maka xkeleui on tlen teyaxka.”
8 Itechkopa in tlanauatijli on tlajtlakojli onechyolchikau para nikeleuis miyek tlajtlamach* yejuan teyaxka.
Tla xonyaskia on tlanauatijli,
xkaman nikmatiskia on tlajtlakojli.
9 Opanok sen tiempo ijkuak ninemiya,
niman xnikmatiya tlinon kijtoua on tlanauatijli.
Pero ijkuak onikajsikamat on tlanauatijli,
onikmat ika on tlen onikchiu tlajtlakojli,
niman ika nimiktoya ixpan Dios.
10 Ijkon tej,
on tlanauatijli yejuan kitocarouaya nechmakas nemilistli,
yej onechtlajtlakolmakak para onimik.
11 On tlajtlakojli okitekitiltij on tlanauatijli para ika onechkajkayau niman ika onechmiktij.
12 Tikitaj tej,
ika nochi on tlanauatiltin chipajkej niman cada tlanauatijli chipauak,
melajki niman kuajli.
13 ¿In kijtosneki ika on ley yejuan kuajli,
yejua onechmiktij?
¡Melauak tej ika ka!
Yej on tlajtlakojli onechmakak mikilistli.
Yejua ika,
itechkopa on tlanauatijli yejuan kuajli,
onikmat ika nitlajtlakolej niman nimiktikaj.
Yejua ika,
itechkopa on tlanauatijli nikmati ika on tlajtlakojli sanoyej* xkuajli.
On tlakamej kipiyaj ome eleuilistli*
14 Tikmatstokej ika on tlanauatijli kuajli niman kisa itech on Espíritu Santo.
Pero nejua ikan notlalnakayo xnikuajli niman ninemi esclavo itech on tlajtlakojli.
15 Nejua xnikajsikamati tlinon nikchiua.
Tej,
xniueli nikchiua on tlen kuajli nikneki,
yej nikchiua on tlen xnikuelita.
16 Niman ijkuak nikchiua on tlen xnikneki,
notlamachilis nechmachistia ika on tlanauatijli melauak kuajli.
17 Tla ijkon tej,
xok nejua nikchiua on tlen xnikneki,
yej on tlajtlakojli yejuan nikpiya yejua nechchiualtia.
18 Nejua tej,
nikmati ika ipan notlalnakayo xitlaj* onkaj tlen kuajli,
pampa maski nikneki nikchiuas on tlen kuajli,
xueli nikchiua.
19 Xnikchiua on tlen kuajli yejuan nikneki,
yej nikonchitiu on tlen xkuajli yejuan xnikneki.
20 Ijkon tej,
tla nikchiua on tlen xnikneki,
xok nejua ijkon nikchiua,
yej on tlajtlakojli yejuan nikpiya nechchiualtia.
21 Ijkin tej,
nopan nochiua.
Ijkuak nikneki nikchiuas on tlen kuajli,
xniueli pampa on tlajtlakojli onkaj ipan notlalnakayo.
22 Ipan noyojlo nikuelita itlanauatil Dios.
23 Pero ipan notlalnakayo nikmati ika onkaj in okse tlanauatijli yejuan no kineki nechnauatis.
Yejua in tlanauatijli de tlajtlakojli kitlauelixnamiki on itlanauatil Dios yejuan noyojlo kuelita.
Yejua in tlanauatijli de tlajtlakojli yejuan onkaj ipan notlalnakayo,
nechpiya ken nitsakutikaj.
24-25 Yejua ika tej,
ikan noyojlo nikneki niktlakamatis on itlanauatil Dios,
pero ikan notlalnakayo niktlakamati on tlanauatijli de tlajtlakojli.
¡Lástima de nejua!
¿Akinon tej,
nechmakixtis itech notlalnakayo yejuan nechuika ipan mikilistli?
Nikmaka tlaxtlauijli Dios ika san itechkopa toTEKO JesuCristo ueli nechmakixtia.