On tlajtlakojli xok mechchiualtis nenkichiuaskej on tlen xkuajli
6
¿Tlinon tej,
tikijtoskej?
¿Más titlajtlakoskej para Dios más techmakas iteiknelilis*?
2 ¡Melauak tej,
ika ka!
On tlajtlakojli xueli techtilana pampa tejuamej yotimikkej de on tlajtlakojli para maka más titlajtlakoskej.
Yejua ika tej,
tla yotimikkej,
¿kenijki uelis más titlajtlakojtiaskej?
3 ¿Tlen xnenkimatij ika tinochimej yejuan yotitokuatekijkej para tikteititiaj ika titosentlaliaj iuan Cristo Jesús,
no yotitokuatekijkej para tikteititiaj ika iuan otimikej?
4 Ijkuak otitokuatekijkej,
otitotlaltokakej iuan Cristo niman timiktoyaj iuan,
para ijkon ken Cristo oyoliu* niman onokuiteu ipan itlalkon ikan iueyilis toTajtsin,
tejuamej tinemij ika on yenkuik nemilistli.
5 Tla otitosentlalijkej iuan Cristo ipan imikilis,
tla ijkon tej,
on no melauak ika iuan tiyoliskej* niman titokuiteuaskej.
6 Tikmatstokej ika on tonemilis yejuan otikpixkej ijkuak xe tikneltokayaj Cristo,
okinmajkopilojkej ipan on kojnepanojli* iuan Cristo para ipoder on tlajtlakojli yejuan ipan tonemilis onkatka,
opopoliu,
niman ijkon on tlajtlakojli ipan tonemilis xok techpiya ken esclavos.
7 Xok techpiya esclavos,
pampa ijkuak se miki,
nomanauiya de ipoder on tlajtlakojli.
8 Tla tejuamej yotimikkej iuan Cristo,
tikneltokaj ika no tinemiskej yejua iuan.
9 Ijkin tikneltokaj pampa tikmatstokej ika Cristo oyoliu niman onokuiteu ipan itlalkon niman yejua ika xokaman oksejpa mikis.
On mikilistli xok kipiyas poder para yejua.
10 Cristo tej,
san sejpa omik para yeyika okipojpoloj tlajtlakojli,
pero ijkuak oyoliu,
oyoliu para kichiua on tlen Dios kineki.
11 Nemejuamej tej,
xmatikan ika on tlajtlakojli xok ueli mechtilana pampa nemejuamej yonenmikkej iuan Cristo.
Niman no xmomatikan ika nenemij iuan Dios ipampa JesuCristo.
12 Yejua ika tej,
maka sa xkauilikan ma mechtilana on tlajtlakojli ipan nemotlalnakayo para nenkitlakamatiskej on xkuajli eleuilistli*.
13 Maka xkauilikan on tlajtlakojli ma kitekitilti nion se parte nemotlalnakayo para ma kichiua on tlen xkuajli.
Yej xkauilikan ma Dios mechtekitilti ken on tlakamej yejuan omikkej pero oksejpa oyolijkej niman onokuitejkej ipan intlalkon.
Xtemakakan tej,
cada parte nemotlalnakayo itech Dios para nenemiskej yolchipajkej.
14 On tlajtlakojli xuelis mechchiualtis nenkichiuaskej on tlen xkuajli,
pampa aman xok nemouikaj ipan on tlanauatijli,
yej mechyekana iueyitetlajsojtlalis* Dios yejuan xmechtocarouaya nenkiseliskej.
Aman xok tinemij esclavos itech on tlen xkuajli
15 ¿Tlinon tej,
tikchiuaskej?
¿Más titlajtlakoskej pampa xok titouikaj ipan on tlanauatijli?
¡Melauak tej ika ka!
16 Nemejuamej kuajli nenkimatstokej ika tla nemotemakaj ken esclavos itech sen nemoteko para nenkitlakamatiskej,
nemejuamej nenesclavos yeskej itech on yejuan nenkitlakamatiskej.
Ijkon tej,
ijkuak nenkitlakamatij on tlajtlakojli,
yejua nochiua ken nemoteko niman mechajkuilia mikilistli.
Noso tla nenkitlakamatiskej Dios,
yejua nochiua ken nemoteko niman ijkon nenyolchipajkej yeskej.
17 Pero tlaxtlaui Dios,
maski nemejuamej nenesclavos katkaj itech on tlajtlakojli,
aman ikan nochi nemoyojlo nenkitlakamatij on itemachtil Dios yejuan yonenkiselijkej.
18 Dios omechmanauij itech on tlajtlakojli yejuan nemoteko katka,
niman aman onemochijkej esclavos itech on yolmelajkilistli.
19 Nemechtlajkuiluiya ika in ken in ejemplos de esclavos pampa xueli kuajli nenkajsikamatij in tlajtlamach*.
Aman tej,
ijkon ken achtoj onenkitemakakej nemotlalnakayo ken esclavos ipan on tlen xchipauak niman ipan on tlen xkuajli para nenkichiuayaj on tlajtlakojli,
no ijki aman xtemakakan nemotlalnakayo ken esclavos ipan on yolmelajkilistli para nemonemilis chipauak yes ixpan Dios.
20 Ijkuak nemejuamej sanken* nenesclavos katkaj ipan on tlajtlakojli,
xnennemiyaj ipan on yolmelajkilistli.
21 ¿Tlinon tej,
ika omechpaleuij ika onenkichijkej on tlajtlakoltin yejuan aman nenkipinauismatij?
On tlajtlakoltin san kitemakaj mikilistli.
22 Pero aman xok nenesclavos ipan on tlajtlakojli,
yej nenesclavos itech Dios.
Yejua ika nemonemilis kuajli chipauak itech Dios,
niman ijkon tej,
no nenkiseliaj on nemilistli yejuan para nochipa.
23 On tlajtlakojli kitemaka ken tlaxtlauijli mikilistli,
pero itetlayokolil Dios kitemaka nemilistli yejuan para nochipa.
Niman on nemilistli tikseliaj itechkopa toTEKO JesúCristo.