Itechkopa totlaneltok tikpiyaj pakilistli niman yolseuilistli
5
Aman tej,
ipampa totlaneltok,
Dios kijtoua ika nochi totlajtlakoluan yokimpopoluij.
Yejua ika,
tikpiyaj yolseuilistli itechkopa toTEKO JesuCristo.
2 Ipampa totlaneltok,
JesuCristo yotechmakak iueyitetlajsojtlalis* Dios yejuan xtechtocarouaya tikseliskej niman aman timelajkanemij ipan iteiknelilis*.
Niman tikchaj ikan miyek paktli ika Dios techmakas ueyilistli tinochimej.
3 Niman xsan ika on tipakij,
yej no tipakij ijkuak tlamach tikijyouiyaj pampa on tlajyouilistli techpaleuiyaj para tikxikouaj nochi tlen topan nochiua.
4 Niman ijkuak tikxikouaj on tlajyouilistli,
Dios paki ken tikxikouaj on tlen topan nochiua.
Niman ijkuak Dios paki,
techmaka tlamachalistli*.
5 Niman on tlamachalistli* xtikpoloskej pampa Dios yokitemitij toyojlo ikan itetlajsojtlalis* itechkopa on Espíritu Santo yejuan otechmakak.
6 Ipan on tonajli ijkuak Dios okitak ika tejuamej xotiuelkej otitomakixtijkej,
Cristo omik impampa on tlatlajkolejkej.
7 Sanoyej ouijtikaj* para yakaj mikis ipampa sen yolchipauak tlakatl.
Maski manin kemaj nemis yakaj yejuan mikis ipampa se yejuan sanoyej kuajli tlakatl.
8 Pero ijkuak tixpolijtikatkaj ipan tlajtlakojli,
Cristo topampa omik.
Ijkin tej,
Dios otechititij ken sanoyej techtlajsojtla.
9 Aman tej,
Dios kijtoua ika nochi totlajtlakoluan yokimpopoloj pampa Cristo yotoyau iyesyo niman yomik topampa.
Tla ijkon tej,
onkaj más tlinon ika Cristo techmanauis itech itlauel Dios.
10 Tla ijkuak tiitlauelikniuan katkaj Dios,
yejua otechmakak yolseuilistli itechkopa imikilis iKonetsin.
Tla ijkon tej,
aman onkaj más tlinon ika uelis techmakixtis itechkopa inemilis pampa yotechmakak yolseuilistli.
11 Niman xsan in,
yej no tipakij itech Dios itechkopa toTEKO JesuCristo.
Ipampa on tlen okichiu,
tikpiyaj yolseuilistli iuan Dios.
Pablo otemachtij itechkopa Adán niman Cristo
12 Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli.
Yejua ika nochimej mikiskej pampa nochimej tlajtlakouaj.
13 Ijkuak xe onkatka itlanauatil Moisés ye onkatka tlajtlakojli ipan in tlaltikpaktli.
Pero Dios xokintlajtlakolmakak on tlakamej pampa xe onkatka on tlanauatijli.
14 Pero nochimej on tlakamej yejuan onenkej desde Adán hasta Moisés omikkej maski intlajtlakoluan xijki katka ken itlajtlakol Adán.
Yejua xokitlakamat itlanauatil Dios.
Yejua ika Adán kixneskayotiaya on yejuan uajlas.
15 Pero itetlayokolil Dios xijki ken on itlajtlakol Adán.
Ijkon tej,
ipampa itlajtlakol Adán miyekej omikkej.
Pero iueyitetlajsojtlalis* Dios yejuan xtechtocarouaya tikseliskej niman yejuan yotetlayokolij itechkopa JesuCristo,
más sanoyej ueyi niman miyek tlakatl okiselij tlen kuajli.
16 On itlajtlakol Adán xuelis para notemachiuas iuan on temakixtilistli yejuan Dios techmaka.
San ipampa se tlajtlakojli,
onkaj tlajtlakolmakalistli.
Pero tejuamej otikselijkej itetlayokolil Dios sakin* ijkuak otikchijkej miyek tlajtlakojli,
niman ijkon Dios otechteneu ika nochi totlajtlakoluan yokimpopoloj.
17 Tla ipampa itlajtlakol se tlakatl,
nochi tlakatl omik,
tla ijkon,
más uelis nochi tlakatl kiselis iueyiteiknelilis* Dios itechkopa JesusCristo,
niman Dios ikan iueyitelajsotlalis kijtos ika nochi intlajtlakoluan yokimpopoloj.
Ijkon tej,
kipiyaskej poder ipan inyenkuiknemilis ipampa JesuCristo.
18 Niman ijkon ken Dios okintlajtlakolmakak nochimej ipampa itlajtlakol Adán,
no ijki Dios kijtoua ika nochi intlajtlakoluan yokimpopoloj niman kimaka yenkuik nemilistli nochi tlakatl ipampa imelajkatekiyo JesuCristo.
19 Ijkon ken miyekej onokuepkej tlajtlakolejkej san ipampa se tlakatl xokitlakamat Dios,
no ijki Dios miyekej kinselis ken yolmelajkej pampa se tlakatl okitlakamat Dios.
20 On tlanauatijli onijkuiloj para techititia kech tlajtlakojli tikpiyaj.
Niman ijkuak tikmatij ika tikpiyaj sanoyej miyek tlajtlakojli,
no ijki tikmatij ika más ueyi iteiknelilis* Dios.
21 Yejua ika,
ijkon ken on tlajtlakojli okipix poder para otemiktij,
iteiknelilis* Dios no ijki kipiya poder para techmaka nemilistli yejuan para nochipa.
Yejua in nochiua ipampa on yolmelajkalistli yejuan tikseliaj itechkopa toTEKO JesuCristo.