Abraham kipiya itemakixtilis itechkopa itlaneltok
4
¿Tlinon tej,
tikijtoskej de Abraham yejuan toachtojtataj?
2 Tla Dios kijtoua ika nochi itlajtlakoluan yokimpopoloj ipampa on tlajtlamach* yejuan okichiu,
sano Abraham ueliskia noueyimatiskia ipampa on tlen kuajli okichiu.
Pero Abraham xitlaj* okichiu para uelis noueyimatis ixpan Dios.
3 ¿Tlinon tej,
kijtoua on Yektlajkuilojli?
On Yektlajkuilojli ijkin kijtoua:
“Abraham okineltokak Dios,
niman yejua ika Dios okiselij ken se yejuan xok kipiya tlajtlakojli.”
4 Aman tej,
tla yakaj tekiti,
kimakaj itlaxtlauil niman on xsan kitlayokoliaj,
yej kimakaj pampa kitlani ika on itekiu.
5 Pero xakaj ueli kitlani temakixtilistli ikan on tlen kichiua,
pampa in temakixtilistli sen tetlayokolijli* para tlajtlakolejkej.
Yejua ika,
sen tlakatl ika onkaj kineltokas Dios para Dios kijtos ika nochi itlajtlakoluan yokimpopoloj.
6 No ijki David kijtoua ika on tlakatl kipiya ueyi tlatiochiualistli yejuan Dios kiselia ken xok kipiya tlajtlakojli maski xokichiu tlajtlamach* tlen kuajli.
7 Ijkin okijtoj David:
Sanoyej tlatiochijtin on yejuan Dios yokintlapojpoluilij nochi on tlen xkuajli okichijkej
niman kipopoloua intlajtlakol.
8 Sanoyej tlatiochijtli on tlakatl akin toTEKO xkitlajtlakolmaka ipampa itlajtlakoluan.
9 ¿In tlatiochiualistli san on hebreos* kipiyaskej?
¡Ka!
On yejuan xhebreos* no kipiyaskej in tlatiochiualistli.
Otikijtojkej san pampa Abraham okineltokak,
Dios okiselij ken se yejuan xok kipiya itlajtlakol.
10 Pero ¿kamanon ijkon onochiu?
¿Ijkon onochiu ijkuak ye kipiya on neskayotl itoka circuncisión* noso achtoj?
Dios okiselij Abraham ken xok kipiya itlajtlakoluan ijkuak xe kiseliaya on neskayotl.
11 Abraham sakin* okiselij on neskayotl.
Niman icircuncisión katka sen señal noso sello ipampa itlaneltok ika Dios okiselij ken se yejuan xok kipiya itlajtlakoluan ijkuak xe kinotlaliliaya icircuncisión.
Niman yejua ika Abraham nochiua ken sen tajtli para nochimej on yejuan kineltokaj Dios,
maski xkipiyaj circuncisión.
Ijkon tej,
Dios okinselij ken on yejuan xok kipiyaj itlajtlakoluan.
12 Abraham no ken sen tajtli para on yejuan kipiyaj on neskayotl itoka circuncisión.
Pero san tla yejuamej kipiyaj intlaneltok ken totataj Abraham okipix ijkuak xe kinotlaliliaya circuncisión*.
Itechkopa intlaneltok iuejkakoneuan Abraham kiseliaj on tlen Dios okimprometerouilij
13 Dios okiprometerouilij Abraham iuan iuejkakoneuan ika kiseliskej in tlaltikpaktli ken sen herencia.
Pero Dios xokiprometerouilij in pampa Abraham okitlakamat on tlanauatijli,
yej pampa okineltokak Dios niman yejua ika Dios okiselij ken se yejuan xok kipiya tlajtlakojli.
14 Tla Dios kinmakaskia herencia san pampa kitlakamatij on tlanauatijli,
tla ijkon,
xitlaj* ika tlapaleuiskia on tlaneltoktli,
niman on tlen Dios okiprometerouilij xitlaj* ika kipaleuiskia.
15 Kampa onkaj tlanauatijli niman xkitlakamatij,
no onkaj castigo.
Pero kampa xonkaj tlanauatijli,
no xonkaj on xtetlakamatilistli.
16 Yejua ika Dios okimprometerouilij sen herencia para kiseliskej tla kineltokaskej.
On tlen Dios okimprometerouilij,
melauak onkaj para nochimej iuejkakoneuan Abraham ipampa iueyitetlajsojtlalis* Dios yejuan xkitocarouaya kiseliskej.
On tlen Dios okimprometerouilij xsan para on yejuan kitlakamatij on tlanauatijli,
yej no para nochimej on yejuan tlaneltokaj ken Abraham otlaneltokak.
Yejua ika,
Abraham nochiua ken totataj para tinochimej.
17 On Yektlajkuilojli ijkin kijtoua:
“Onimitstlalij titajtli ipan miyek países.”
In onochiu pampa Abraham okineltokak Dios,
on Dios yejuan kinyoliuitia on mikatsitsimej,
niman yejuan san ika itlanauatil kichiua para ma onya on tlen xonkatka.
18 Maski nesiya ika in tlen Dios okimprometerouilij xueliskia nochiuaskia,
Abraham xokipoloj itlaneltok,
yej okichix niman okineltokak ika Dios okitlalij tajtli ipan miyek países ijkin ken okiprometerouilij ipan on Yektlajkuilojli:
“Mouejkakoneuan miyekej yeskej ken on sitlalimej.”
19 Abraham xokipoloj itlaneltok maski kimatiya ika ye nisiu para mikis pampa ye kipiyaya kanaj cien xipan,
niman no pampa Sara xueliya tlaskaltiaya*.
20 Yejua tej,
xoometlamat nion okipoloj itlaneltok itech on tlen Dios okiprometerouilij.
Yej itlaneltok onoskaltij más kojtik niman okiueyilij Dios.
21 Yejua,
ikan nochi iyojlo kimatstikatka ika Dios kipiya poder para kichiuas nochi on tlen okiprometerouilij.
22 Yejua ika tej,
ipampa itlaneltok,
Dios okiselij ken se yejuan xok kipiya tlajtlakojli.
23 On Yektlajkuilojli yejuan kijtoua ika Dios okiselij ken se yejuan xok kipiya tlajtlakojli,
xonijkuiloj san para Abraham.
24 Yej no onijkuiloj para tejuamej yejuan Dios no techselia ken yejuan xok tikpiyaj tlajtlakojli.
Ijkin techselia pampa tikneltokaj yejua,
akin okiyoliuitij* niman okuiteu ipan itlalkon toTEKO JesuCristo.
25 San ipampa totlajtlakol,
toTEKO Jesús okimiktijkej.
Niman kemaj yejua oyoliu* san para Dios uelis techselis ika xok tikpiyaj tlajtlakojli.