Pablo kintlajpaloua on ikniuan itechkopa Cristo
16
Nikneki xmatikan ika in tokniu itoka Febe,
kuajli siuatl.
Yejua kimpaleuiya ipan itekiu Dios on yejuan tlaneltokaj ipan on kalpan itoka Cencrea.
2 Xselikan kuajli ikan itokatsin toTEKO ijkon ken noneki kichiuaskej on yejuan tlaneltokaj itech Dios.
Niman xpaleuikan ika on tlen kipoloua,
pampa yejua miyekej yokimpaleuij niman hasta nejua no yonechpaleuij.
3 Xkintlajpalokan on tokniuan Priscila niman Aquila yejuan onechpaleuijkej ipan itekiu Cristo Jesús.
4 Yejuamej san para okimanauijkej nonemilis,
yonetemakakaj para mikiskiaj san nopampa.
Niman aman xsan nejua nikinmaka tlaxtlauijli,
yej no kinmakaj tlaxtlauijli nochimej on tlaneltokakej yejuan xhebreos*.
5 No xkintlajpalokan on tokniuan yejuan nosentlaliaj ichan Priscila niman Aquila.
No xtlajpalokan notlajsojkaikniu* Epeneto yejuan achtopa okineltokak Cristo ne Acaya.
6 No xtlajpalokan María yejuan sanoyej* yotekit nemotech.
7 No xkintlajpalokan nohebreojikniuan Andróniko niman Junias.
Yejuamej nouan tsakutikatkaj niman on apóstoles* kuajli kintlakaitaj yejuamej.
Yejuamej achtoj okineltokakej Cristo xken nejua.
8 Xtlajpalokan Amplias,
notlajsojkaikniu itechkopa toTEKO.
9 Xtlajpalokan Urbano yejuan otekit touan ipan on tekitl yejuan tikchiuaj ipampa Cristo Jesús,
niman on notlajsojkaikniu Estaquis.
10 Xtlajpalokan Apeles yejuan Dios miyekpa okitak ika kineltoka Cristo.
Niman no xtlajpalokan ifamilia Aristóbulo.
11 Xtlajpalokan on nohebreojikniu Herodión,
niman ifamilia Narciso yejuan kineltokaj Cristo.
12 Xtlajpalokan Trifena niman Trifosa yejuan tekitij ipan itekiu toTEKO,
niman on totlajsojkaikniu Pérsida yejuan sanoyej tekiti ipan itekiu toTEKO.
13 Xtlajpalokan Rufo yejuan sanoyej kuajli tlaneltokaketl,
niman inanaj yejuan nechpiya ken ikoneu.
14 Xkintlajpalokan Asíncrito,
Flegonte,
Hermas,
Patrobas,
Hermes niman on tokniuan yejuan ompa inuan nemij.
15 No xkintlajpalokan Filólogo niman Julia.
Niman no xkintlajpalokan Nereo niman on ikniu siuatl.
Xtlajpalokan Olimpas niman nochimej on yolchipajkej itech Dios yejuan ompa inuan nemij.
16 Kualtsin xmotlajpalokan inuan oksekimej ikan tetlajsojtlalistli*a Nochimej on tlaneltokakej itech Cristo mechtlajpalouaj.
17 Nokniuan,
sanoyej nemechtlajtlanilia para xmotakan sano nemejuamej intech on yejuan texexelouaj niman tetlamachilispopolouaj ikan intlaneltok niman kixnamikij on temachtiltin yejuan yonenkiselijkej.
On kenomej xkintlalkauikan
18 pampa yejuamej xkitekipanouaj toTEKO JesuCristo,
yej san kichiuaj ken inxkuajli eleuilis* kineki.
Yejuamej kintlamachilispopolouaj ikan inkualtsin tlajtol niman inyemankatlajtol on tlakamej yejuan xtlamatkej*.
19 Nochi tlakatl kimati ken nenkintlakamatij on temachtijli yejuan yonenkiselijkej,
niman yejua ika on sanoyej nipaki.
Pero nikneki xpiyakan tlamatkilistli para nenkichiuaskej on tlen kuajli,
niman maka para nenkichiuaskej on tlen xkuajli.
20 Niman Dios yejuan kitemaka yolseuilistli saniman kitlajkalis nemokxitlan on Satanás.
Ma toTEKO JesuCristo mechmaka iueyitetlajsojtlalis.
21 Timoteo yejuan tekiti nouan ipan in tekitl mechtlajpaloua.
Niman Lucio,
Jasón,
niman Sosípater yejuan nohebreojikniuan no mechtlajpalouaj.
22 Nejua Tercio,
yejuan nikijkuilojtikaj in tlajkuilolamatl yejuan Pablo nechijlijtiu,
no nemechtlajpaloua ikan itokatsin toTEKO.
23 Mechtlajpaloua tokniu Gayo yejuan ichan nichanti,
niman no ompa ichan nosentlaliaj in yejuan tlaneltokaj.
Erasto on yejuan tesorero ipan on ueyikalpan niman tokniu Cuarto no mechtlajpalouaj.
24 Ma toTEKO JesuCristo nemochimej* ma mechtiochiua ueyi.
Ma ijki nochiua.
Pablo kiyekteneua Dios
25 Niman aman ma tikyekteneuakan Dios yejuan uelis mechpaleuis para maka kaman nenkauaskej nemotlaneltok.
Yejua mechpaleuis itechkopa on kuajli tlajtojli yejuan kiteijlia ken Dios temakixtia yejuan nikteijlia niman itechkopa on temachtijli de JesuCristo.
In temachtijli Dios kuajli yokipanextij yejuan achtoj iyantikatka* desde ijkuak xe onkatka in tlaltikpaktli.
26 Pero aman,
nochi yonopanextij niman yomachiyak itechkopa on Yektlajkuilojli yejuan okijkuilojkej on tiotlajtojkej ijkon ken Dios yejuan nochipa nemi otlanauatij ma nochiua.
Ijkin otlanauatij Dios para nochiuiyan niman nochimej on tlakamej ma kineltokakan niman ma kitlakamatikan.
27 ¡Ma Dios yejuan san iselti tlamatki*,
para nochipa ma kiseli ueyilistli itechkopa JesuCristo!
Ma ijki nochiua.