3 Ne zutun pinaaǥi te ǥehem te Waǥas he Mulin-ulin mid-uwit a zuen te velinsuǥuen diyà te tanà he kenà ed-ubpaan te etew ne neehè ku zutun kes bahi.

Ed-untud sikandin diyà te langgam he meriǥà.

Ne haazà is langgam,

insurat diyà te lawa zin is mezakel he menge gerar he utew supak te Megbevayà.

Ne pitu is ulu zutun te langgam wey sepulù is sungey zin.

4 Ne haazà is bahi,

ne midsun-uzan te utew mahal su meriǥà wey merudtem he manggad.

Ne mideyzeyanan is lawa zin te vulawan wey menge mahal he vatu wey menge pirlas.

Ne zutun te velad din is bulawan he tasa he nepenù te vinu he iyan is menge memahawag wey memeremerik he ulaula zin dutun te kebpelelevag din.

5 Ne zuen insurat dutun te vuked din he ngazan he in-eles is kehuluǥan din he edhenduen te,

“Kes nevantug he inged he Bebilunya he iyan iney,

he ke và dà egkeǥiya,

puunà te minsan hentei he vahi he ebpelelevag wey minsan hengkey he mahawag he meremerik he ulaula zini te lumpad te kelibutan.”

6 Ne neehè ku he nelangut haazà is bahi te lengesa te menge tumutuu he midhimetayan din tenged te kedtuu zan ki Jesus.

Ne utew a neinuinu te kegkeahaa ku zutun te vahi.

7 Iyan,

migkeǥiyan a zutun te velinsuǥuen,

ke sikandin te,

“Maan is egkeinuinu ka?

Ibpesavut ku kenikew is in-eles he kehuluǥan mehitenged keniyan te vahi wey keniyan te langgam he pitu is ulu zin ne sepulù is sungey zin he ed-untuzan keniyan te vahi.

8 Heeyan is langgam he egkeehè nu,

ne zini sikandin te kelibutan dengan,

iyan,

wazè en guntaan.

Ne meǥaan en maan edlepew he ebpuun te vitu he wazà pidtemanan is kezalem din,

ne zutun te kedlepew zin,

id-agbur sikandin diyà te Impirnu su edsilutan.

Ne is langun he menge etew he zengan te wazè pa limbaǥa is kelibutan,

wazà isurat is menge ngazan dan diyà te libru he zutun ilista is langun he ebeǥayan te untung,

utew zan egkengeinuinu zutun te ked-ehè dan te langgam.

Iyan igkengeinuinu zan su haazà is langgam,

dengan uuyag ne minatey en guntaan,

iyan,

egkevanhew zed.

9 Egkesavut heini te etew he uluwanen.

Is kehuluǥan duen te pitu he ulu zutun te langgam,

ne pitu he menge vuvungan he zutun ebpinuu haazà is bahi,

10 Minatey en is lelima zutun te menge hadì,

ne edhadì pa ǥuntaan is sevaha,

ne wazè pa medhadì is sevaha,

iyan,

emun edhadì en haazà ne meǥaan dà utew is kedhadì din ne egkeawè en.

11 Ne is kehuluǥan dutun te langgam he zengan uuyag ne ǥuntaan minatey,

ne ikewalu sikandin he hadì he edsunud dutun te pitu he hadì.

Ne edsilutan sikandin daan keuzemà diyà te Impirnu.

12 Ne haazà is sepulù he sungey,

ne iyan kehuluǥan dutun is sepulù pa he hadì he wazè pa medhadì.

Haazà is sepulù he hadì wey haazà is langgam,

ebeǥayan sikandan te keǥehem te kedhadì te meǥaan dà.

13 Sevaha zà is tuyù dutun te sepulù he hadì ne edtevangan dan is langgam pinaaǥi te zesen dan wey keǥehem dan te kedhadì.

14 Edtebeken dan sikan is nati he kerehidu ne egkezaag sikandan dutun te nati su egalen sikandin te minsan hentei he egalen wey hadì te minsan hentei he hadì.

Ne is menge etew he edumahan dutun te nati,

ne migeraran sikandan te menge impetuu wey menge pinilì,

wey menge metinumanen he menge sumusundan te Megbevayà.”

15 Ne zutun mid-uman megkaǥi haazà is belinsuǥuen diyà te kedì,

ke sikandin te,

“Haazà is menge wahig he neehè nu he zutun ebpinuu sikan is bahi,

ne iyan kehuluǥan dutun is menge ǥinhedian wey kepuun wey utew medmezakel he menge etew he kenà ed-iring-iring is kineǥiyan dan.

16 Ne haazà is neehè nu he sepulù he sungey wey haazà is langgam,

ne egkuntedehan dan haazà is bahi he ebpelelevag ne ed-eǥawen dan is menge azen din ne edlevasan dan sikandin ne egkeenen dan is sapù din ne ebinsulan dan sikandin.

17 Umba ed-ul-ulahan dan haazà su is Megbevayà,

midhimu zin he egkesuatan dan te edtuman is tuyù te Megbevayà.

Ne tenged dutun sevaha zà is egkeisip dan ne idtavang dan te langgam is keǥehem dan te kedhadì taman te egkengetuman is nengetagnà he menge Lalag te Megbevayà.

18 Ne haazà is bahi he egkeehè nu,

ne iyan kehuluǥan din sikan is nevantug he inged he edlingahaan te menge hadì diyà te lumpad te kelibutan.”