Is Kebinsuli te Bebilunya
18
Ne hein nepasad dutun te velinsuǥuen is egkeǥiyen din,
neehè ku is selakew pa he velinsuǥuen he ebpenaug pehendiyà te tanà he ebpuun te langit ne utew zekelà is keǥehem din.
Ne utew merayag is ked-anlag din ne neenlaǥan din is minsan hendei zini te lumpad te kelibutan.
2 Ne mibpekezaǥing is egkaǥi te,
“Neǥerè en.
Nepurung mezeeti is dekelà he inged he Bebilunya!
Ne nehimu en guntaan he ubpeey te menge mezaat he mulin-ulin wey menge mezaat he kedesenan.
Egkeubpaan haazà is inged te minsan hengkey he mezaat wey meremerik he tagbis.
3 Umba neulaula heini su is bahi he iyan is inged he Bebilunya,
impeinum din te langun he menge etew ziyà te langun he menge ǥinhedian is binu he iyan is ked-ezapa zin te menge ledawan.
Is menge hadì diyà te tivuuk he kelibutan,
ne midtampu zan dutun te memahawag he menge vaal zin.
Ne is menge ebpemetiǥayun diyà te kelibutan,
midsepian dan pinaaǥi te suat dutun te vahi te menge utew mahal!”
4 Ne zutun nezineg ku is selakew pa he egkaǥi ziyà te langit,
ke sikandin te,
“Sikiyu is menge ǥaked ku he etew,
awè kew en keniyan te inged!
Kenè kew medtampu te menge ulaula he mezaat keniyan te vahi su kela ke mekeragkes kew te menge silut ku kandin.
5 Su emun idtambù is menge salè din ne ebpekesungkul ziyà te langit tenged te utew medmezakel,
ne wazà melipati te Megbevayà is menge vetasan din he utew mezaat.
6 Is mid-ulaula zin keniyu he pesipala,
iyan daan ul-ulaha niw kandin asal kezezuwa niw tekepa is menge vales niw kandin.
Teǥayi niw is tasa zin te pauk te Megbevayà he ibpeinum kandin he kezezuwa edtekepa is kebpekelangut din kenà te impeinum din keniyu.
7 Utew subra is kebpurungi zin te kebpekesavuk din ne ǥuntaan iyan bales kandin is kegkeseeng wey is merasey he kebpekesavuk.
Su kenà sikandin ed-engked he ebpegalbu,
ke sikandin diyà te isip din te,
‘Bai a ne kenà a valu.
Kenà egkehimu he egkeumahan a te kemereǥenan.’
8 Ne tenged te iyan haazà neisip din,
ne zutun te sengeandew,
egkeumahan sikandin te kemeresayan.
Su edsilutan sikandin te zaru,
vitil,
wey kemetayen;
ne egkepurung sikandin egketutung su is Megbevayà he mekeǥeǥehem he Nengazen te langun,
iyan edsilut kandin.”
9 Ne is menge hadì dini te kelibutan he midtampu zutun te mezaat he ulaula zin he iyan is ked-ezapa zin te menge ledawan,
ebpekesineǥew ne ebpekelelendag sikandan dutun emun egkeehè dan en is evel zutun te kebinsuli kandin.
10 Ne ebpekeziyù dan is ebpantew su egkehandek dan su kela ke meragkes sikandan dutun te kedèdeeti zutun te inged.
Ne ke sikandan te,
“Kehizu nu,
sikew is utew zekelà he inged he Bebilunya su seled te sengeuras neumahan ka te silut!”
11 Ne is menge ebpemetiǥayun dini te kelibutan,
ebpemekesineǥew zan daan ne edlelendag dan tenged dutun te inged su wazè en ebpememasa te menge ibelegyè dan.
12 Wazè en ebpekepemasa te ibpemelegyè dan he vulawan,
pelata,
menge mahal he vatu wey pirlas,
meupiya he manggad he meputì wey meriǥà wey manggad he sida,
menge mehemut he kayu,
menge vutang he mibeelan te mahal he kayu,
wey vatu wey ǥalang wey putew,
wey marpil,
wey vatu he marmul,
13 menge perehemut he egkekaan wey edtutungen,
menge mehemut he sulù,
menge vinu,
lana,
erina,
wey parey he trigu,
menge vaka,
menge kerehidu,
menge kudà,
wey menge kelisa,
wey minsan menge etew he uripen.
14 Ne is menge ebpemetiǥayun,
egkaǥi zan dutun te vahi he iyan is inged he Bebilunya,
ke sikandan te,
“Nepurung mezeeti is langun he menge meupiya he ed-engkenen nu pezem.
Ne nezeetan en daan is ketiǥeyunan nu wey igkelipey nu,
ne haazà,
kenè nu en maan egkeahà,”
ke sikandan.
15 Ne haazà is menge ebpemetiǥayun he insepian dan is kebpemetiǥayun dan dutun te inged,
ebpekeziyù dan daan is ebpantew su egkehandek dan su kela ke meragkes dan dutun te kedèdeeti zutun he inged.
Ebpekesineǥew zan ne edlelendag dan.
16 Ne ke sikandan te,
“Kenuǥun utew te zekelà he inged!
Is menge meǥinged dutun,
ne nebistiyan te mahal he manggad he meputì wey meriǥà wey merudtem.
Ne mideyzeyanan dan is lawa zan te vulawan wey menge mahal he vatu wey pirlas.
17 Iyan,
seled te sengeuras dà,
naamin mezeeti is langun he ketiǥeyunan dan!”
ke sikandan.
Ne is menge kepitan te barku wey is menge pesehiru wey menge edterebahu zutun te menge barku wey is langun he ebpemetiǥayun pinaaǥi te zaǥat,
ne ebpekeziyù dan is ebpantew ne emun egkeehè dan is evel zutun te kebinsuli zutun te inged,
18 ebpekezaǥing dan is egkaǥi te,
“Wazè pa inged he ebpekelavew keniyan te zekelà he inged!”
19 Ne tuus te utew ebmesakit is gehinawa zan,
ebukbukan dan te eliyavuk is ulu zan.
Ne edsineǥew zan ne edlelendag dan ne ke sikandan te,
“Kenuǥun utew te zekelà he inged!
Su insepian is ketiǥeyunan din te langun he teǥiǥaked te menge barku ziyà te zaǥat.
Ne ǥuntaan,
seled dà te sengeuras,
nepurung mezeeti is langun he menge valey zutun!”
ke sikandan.
20 Ne sikiyu is menge meǥinged diyà te langit,
lipey kew tenged te limas kayi te zekelà he inged.
Lipey kew zaan is menge tumutuu wey menge epustul wey ebpeneuven te Megbevayà su midsilutan te Megbevayà haazà is inged tenged te menge pesipala zin keniyu!
21 Ne zutun duen belinsuǥuen he mekeǥeǥehem ne mibitbit din is batu he iring kezekelà te ǥelingan ne intimbag din diyà te zaǥat.
Ne ke sikandin te,
“Iring kayi is kegkepurung kegkezeeti te zekelà he inged he Bebilunya ne kenè en maan egkeahà te minsan hentei.
22 Kenè en maan egkezineg kayi te inged is ebpememulalà wey ebpememudyung wey ebpemeng-arpa.
Ne kenè en maan egkeahà kayi is minsan hengkey he pandey.
Ne is daǥing te ebpenggaling ne kenè en maan egkezineg kayi.
23 Ne kenè en maan egketeyawan heini is inged te minsan hengkey he sulù.
Ne is kegkaǥikaǥi te vahi wey maama he sikan pa meked-esawa,
ne kenè en maan egkezineg kayi te inged.
Utew nengevantug diyà te tivuuk he kelibutan is menge ebpemetiǥayun kayi ne mid-ekalan is menge etew ziyà te langun he menge ǥinhedian pinaaǥi te kinaagman te menge veyilan dutun.”
24 Midsilutan is dekelà he inged he Bebilunya su zutun mid-aǥas is lengesa te menge etew he ǥaked wey ebpeneuven te Megbevayà.
Ne is langun he nevunù dini te tivuuk he kelibutan,
ne pinaaǥi zaan kayi te inged.