Is Menge Velinsuǥuen he Ed-uwit te Pitu he Kelasi te Kemeresayan
15
Ne zutun neehè ku ziyà te langit is selakew pa he utew zekelà he egkein-inuwan he iyan kebpeelunga te egkeulaula.
Duen pitu he velinsuǥuen ne is kada sevaha kandan,
ne egkulangan te idrasey zin te menusiyà.
Ne emun egkeulaula en heini ne egketapus en is idsilut kandan te Megbevayà dini te kelibutan.
2 Ne neehè ku zutun is henduen be te zaǥat he ispihu he nesahug te hapuy.
Ne neehè ku zaan is menge etew he nemekezaag te mekehandekhandek he langgam su wazè dan sikandin ezapa.
Wazè dan med-azap dutun te ledawan din ne wazè dan daan mebpemarka te lumiru te ngazan din.
Dutun dan ebpemenhithitindeg te uvey te zaǥat he ispihu.
Ne zuen egewezan dan he menge arpa he imbeǥey kandan te Megbevayà.
3 Ne egkentahan dan is kentahan duen te suluǥuen te Megbevayà he si Moises he iyan sikan is kentahan he idalig dutun te nati he kerehidu.
Ke sikandan te,
“Sikew is Megbevayà,
mekeǥeǥehem ka he Nengazen te langun.
Utew zekelà wey utew egkein-inuwi is langun he menge vaal nu!
Hadì ka te langun he menge ǥinhedian.
Metazeng wey tutuu is menge ulaula nu!
4 Ne edtehuzen ka te langun he menge etew
ne ebentuǥen dan is ngazan nu te Nengazen.
Su iyan ke zà waǥas he Megbevayà.
Edhendiyà te kenikew is langun he menge etew te minsan hendei he ǥinhedian ne ed-ezapen ke zan su nevantug en is menge vaal nu he memetazeng.”
5 Ne neipus haazà,
neehè ku he nepuwasan is simbahan diyà te langit ne ziyà te seled din,
neehè ku is ruǥu he zutun is tuus te ǥehem te Megbevayà.
6 Ne zutun te simbahan migawas sikan is pitu he velinsuǥuen he egkulangan te pitu he menge ibpenrasey te menusiyà.
Midsun-uzan sikandan te manggad he utew meputì ne vevakes sikandan te vulawan.
7 Ne is sevaha zutun te heepat he linimbag he kedesenan,
imbeǥey zin dutun te pitu he velinsuǥuen is pitu he menge vulawan he lediyà he nepenù te pauk te wazè din pidtemanan he Megbevayà.
8 Ne zutun nepenù is simbahan te evel he ebpuun te anlag wey ǥehem te Megbevayà.
Ne zutun wazà ebpekeseled dutun te simbahan taman te kenè pa egketapus haazà is kepipitu he kedresaya te menusiyà he ibpaaǥi te pitu he velinsuǥuen.