Is 144,000 he Menge Etew
14
Ne zutun neehè ku is buntud he Siyun ne zutun edhithitindeg sikan is nati he kerehidu ne zuma zin daan dutun is nenggatus wey kepatan wey heepat he libu he menge etew.
Ne haazà is menge etew,
insurat diyà te menge vuked dan is ngazan dutun te nati wey is ngazan daan te Amey zin he Megbevayà.
2 Ne zutun nezineg ku is egkaǥi ziyà te langit ne is kegkaǥi zin,
henduen be te zeǥurus te utew mezakel he menge wahig wey iring te utew mezaǥing he veransì.
Haazà is egkaǥi he nezineg ku,
ne henduen be zaan te menge zaǥing te utew mezakel he ebpemen-arpa.
3 Ne haazà is menge etew,
diyè dan te etuvangan te pinuuwà te Megbevayà wey te etuvangan duen te heepat he menge linimbag he kedesenan wey te menge ebmeǥurangen.
Ne migkanta zan dutun is beǥu he kentahan.
Iyan dà netau zutun he egkanta te kentahan,
haazà is nenggatus wey kepatan wey heepat he libu he etew he mibelukasan dini te lumpad te kelibutan duen te nati he kerehidu.
4 Iyan haazà he menge maama he wazè dan mekesalà pinaaǥi te kedhilavet te kenè dan esawa su utew lumpiyu is menge ulaula zan ne wazè dan suwayi sikan is nati he kerehidu te minsan hendei sikandin ebpevayà.
Mibelukasan sikandan puun duen te perayan he iyan is tivuuk he menusiyà wey zan mehimu he iyan nepengilizan dutun wey ikeveǥey sikandan diyà te Megbevayà wey ziyà te nati he kerehidu.
5 Ne wazà minsan keenu sikandan mezineg he edtarùtarù ne wazà neveelan dan he minsan hengkey he mezaat.
Is Tetelu he Velinsuǥuen te Megbevayà
6 Ne zutun neehè ku en maan is selakew en maan he velinsuǥuen he edlayang he utew mibpeketikang diyà te udtuwan.
Ibpesavut din dutun is Meupiya he Tudtulanen he kenà egkehanew te minsan keenu.
Impesavut din haazà te tivuuk he menusiyà,
diyà te menge etew te minsan hengkey he kineǥiyan wey minsan hendei he ǥinhedian,
wey tribu,
wey kepuun.
7 Ne mibpekezaǥing is egkaǥi te,
“Tehuza niw is Megbevayà wey ventuǥa sikandin su neuma en is timpu te kedsusi zin te menge ulaula te tivuuk he menusiyà!
Ezapa niw is Megbevayà he iyan nenlimbag te langit wey tanà wey zaǥat wey menge puunà te wahig!”
8 Ne zuen daan ikezuwa he velinsuǥuen he nekesunud dutun te nehuna ne migkaǥi sikandin te,
“Na,
nezeetan en!
Utew nezeeti is dekelà he inged he Bebilunya!
Midlangut din te vinu zin is tivuuk he menusiyà,
he ke và dà egkeǥiya,
impenurù din te tivuuk he menusiyà is ked-ezapa te menge ledawan!”
9 Ne midlepew is iketelu he velinsuǥuen he midsunud dutun te nehuna he zezuwa ne mibpekezaǥing is egkaǥi te,
“Is minsan hentei he etew he ed-ezapen din haazà is langgam wey ledawan duen te langgam,
ne ebpemarka sikandin diyà te vuked din,
ne emun kenà,
ne ziyà te velad din,
10 ne ibpeinum kandin is binu te pauk te Megbevayà,
he ke và dà egkeǥiya,
silut kandin te Megbevayà,
ne heini is mepait he vinu,
midtaǥey en te Megbevayà diyà te tasa he iyan sikan is meinit he pauk din.
Ne haazà is menge etew,
edresayen sikandan diyà te meregreg he esupri ziyà te Impirnu.
Ne egkeahà haazà dutun te nati he kerehidu wey te menge velinsuǥuen te Megbevayà.
11 Ne haazà is hapuy he idrasey kandan,
ed-evel te wazà pidtemanan ne te maandew wey mezukilem kenà egkeengked is kedresaya kandan su ed-ezapen dan kes langgam wey kes ledawan duen te langgam ne ebpemarka sikandan te tuus duen te ngazan te langgam.”
12 Ne tenged dutun,
sikan is menge etew he neǥaked te Megbevayà,
sikan is ebpememineg te menge suǥù te Megbevayà wey edtuman te menge lalag ni Jesus,
kinahanglan he med-antus sikandan.
13 Ne zutun nezineg ku is egkaǥi ziyà te langit te,
“Isurat nu heini:
Utew mulà meupiya is egkengeulaula te menge etew he ebpatey ke menge tumutuu sikandan te Nengazen.”
“Benar iyan,”
egkaǥi is Waǥas he Mulin-ulin.
“Utew zan en egkengelipey su wazè en igkehaǥù dan ne ebpekehimeley sikandan.
Ne zutun edsuhulan sikandan tenged te menge meupiya he menge vaal zan.”
Is Kedreǥuna te Menusiyà
14 Ne zutun neehè ku is gapun he utew meputì,
ne zutun te ǥapun duen ebpimpinuu he henduen be te iyan sikan is Kakey te Menusiyà.
Duen bulawan he kuruna he insuup diyà te ulu zin ne egawed te ǥarab he utew meǥarang.
15 Ne zutun duen selakew he velinsuǥuen he migawas dutun te simbahan diyà te langit.
Mibpekezaǥing sikandin is egkaǥi ziyà te ebpimpinuu ziyà te ǥapun,
ke sikandin te,
“Gemita nu en is garab nu su iyan en heini timpu te kegarab su is kelibutan,
iring te kamet he nelutuan en is pinemula zuen!”
16 Ne zutun,
haazà is ebpimpinuu zutun te ǥapun,
migamit din haazà is garab din,
ne midraǥun ziyà te kelibutan.
17 Ne zutun neehè ku is selakew en maan he velinsuǥuen he migawas dutun te simbahan he ziyà te langit ne zuen daan kandin he egewezan he meǥarang he ǥarab.
18 Ne ziyà te pemuhatà he ziyà te simbahan,
migawas is selakew pa he velinsuǥuen.
Iyan sikandin belinsuǥuen he impevantey te hapuy zutun.
Ne mibpekezaǥing sikandin is egkaǥi ziyà te nesunuzan din he velinsuǥuen he zuen din meǥarang he ǥarab.
Ke sikandin te,
“Gemita nu en heeyan is garab nu ne reǥuna nu is menge paras diyà te pemuleey he iyan is kelibutan su nengelutuan en is menge paras dutun.”
19 Ne zutun migamit haazà is belinsuǥuen te ǥarab din dini te lumpad te kelibutan ne midraǥun din is menge paras,
he ke và dà egkeǥiya,
iyan is langun he menge etew he kuntada te Megbevayà.
Ne is neraǥun din,
in-ahuk din diyà te zekelà he vudsi he zutun egkeresa is beǥas te paras.
Ne is kehuluǥan dutun te vudsi ne iyan is pauk te Megbevayà diyà te menge kuntada zin.
20 Ne migunas haazà is beǥas te paras dutun te vudsi he ǥawas te inged ne ebpuun dutun te vudsi midtudà is lengesa taman te tetelu he ǥatus wey keluwaan he kilumitru is netudaan ne sengemitrus wey tengà is kezalem din.