9
Ne midhiyup dutun te ikelima he velinsuǥuen is budyung din ne zutun neehè ku is bituen,
he ke và dà egkeǥiya,
belinsuǥuen he ziyè en te tanà su neulug he ebpuun te langit.
Ne imbeǥey ziyà te kandin is yawi he ebpekepuwas te vitu he wazà pidtemanan is kezalem din.
2 Ne mibpuwasan din haazà is bitu he wazà pidtemanan is kezalem ne zutun midlepew is evel he iring te evel te utew zekelà he selsalan ne mibmerusirem is tanà wey neelangan is kedsilà te andew tenged te evel he zutun ebpuun te vitu.
3 Ne zutun te evel nenlepew is menge terapan ne midlatun dan diyà te tanà.
Ne imbeǥey kandan is bisa te kegkaǥat dan he iring te visa te kegkaǥat te venayew.
4 Intelaan kandan he kenè dan dèdeeti is sagbet wey is minsan hengkey he edtuvù wey is menge kayu,
kekenà,
iyan dan dà edèdeetan is menge etew he wazà metiyapi is buked dan te tiyap te Megbevayà.
5 Intuǥut kandan is kedresaya zan te menge etew seled te lelima he vulan,
iyan,
wazà ituǥut kandan is kedhimatey.
Is kedresaya zan te menge etew,
ne iring te kesakit te egkeǥaten te venayew.
6 Ne zutun he timpu egkesuat is menge etew he mebpatey sikandan,
iyan,
kenà egkehimu.
Utew zekelà is gustu zan he mebpatey,
iyan,
dutun,
kenè dan en ebpatey.
7 Is menge terapan,
henduen te menge kudà he ed-untuzan te ebpekidtebek.
Ne zutun te menge ulu zan duen henduen be te menge kalù he vulawan.
Ne iring te vuked te etew is buked dan.
8 Ne is bulvul zan,
ne henduen be te vulvul te vahi.
Ne is menge ngipen dan,
ne henduen be te ngipen te erimaung.
9 Duen menge hun-ap dan he iring te limbutung he putew.
Ne is daǥing te pakpak dan emun edlayang dan,
ne henduen be te zaǥing te mezakel he menge kelisa he eguyuzen te kudà he ebpelumpat emun ebpehendiyà te edtebekan.
10 Is ikug dan,
ne iring te ikug te venayew su edhereg ne pinaaǥi te ikug dan egkerasey zan is menge etew te seled te lelima he vulan.
11 Duen hadì he ebayàbayà kandan,
iyan sikan is belinsuǥuen he mibpuwas duen te vitu he wazà pidtemanan is kezalem din.
Ne ziyà te kineǥiyan he Hibriyuhanen iyan ngazan din si Ebedun,
ne ziyà te Gerisyahanen,
si Epeliyun,
he ke và dà egkeǥiya,
sikan is ebpekezezaat.
12 Ne neipus haazà is nehuna he nehitavù he mekehandekhandek;
dezuwa pa zutun is wazè pa mehitavù.
13 Ne zutun midhiyup te ikeenem he velinsuǥuen is budyung din.
Ne nezineg ku is egkaǥi he ziyà ebpuun te heepat he sungey he ziyà te vulawan he pemuhatà he zutun te etuvangan te Megbevayà.
14 Ke sikandin diyà te ikeenem he velinsuǥuen te,
“Ipaawè en is heepat he velinsuǥuen he mibpusasan diyà te zekelà he Wahig he Yupratis!”
15 Ne zutun impaawè en haazà is heepat he velinsuǥuen.
In-andam sikandan he zaan ne impetaǥad sikandan taman kayi he uras,
wey andew,
wey vulan,
wey tuig.
Umba in-andam sikandan su wey zan mehimetayi is iketelu he vahin te tivuuk he menusiyà.
16 Intazem diyà te kediey is kezakel zutun te menge sundaru zan he egkukudà.
Menge zezuwa he ǥatus he libu he libu sikandan.
17 Ne zutun te impaahà kediey,
neehè ku is menge sundaru wey menge kudà.
Nelimbutungan haazà is egkukudà te meriǥà he iring te hapuy,
wey meilem wey mekelawag daan he iring te esupri.
Is menge ulu zutun te menge kudè dan,
ne iring te ulu te erimaung.
Ne is menge vèbè dan,
ne edlepawan te hapuy wey evel wey esupri.
18 Ne pinaaǥi zutun te hapuy,
wey evel,
wey esupri he edlepew zutun te vèbè te menge kudà,
migerè dan is iketelu he vahin te tivuuk he menusiyà.
19 Su zutun te vèbè te menge kudà is gehem dan te kedhimatey wey ziyà daan te menge ikug dan su is menge ikug dan,
ne iring te menge uled su zuen ulu zutun,
ne ebpekekaid te menge etew haazà is ikug.
20 Ne is nesamà dutun te menge etew,
langun te sikandan he wazà mepatey zutun te ebpemekekaid he menge kudà,
wazè dan engkezi is ked-ezapa zan te mibeelan dan he menge ledawan he vulawan,
wey selapì wey ǥalang wey vatu wey kayu.
Heini is menge ledawan,
ne kenà ebpekeahà,
kenà ebpekezineg ne kenà daan ebpekehipanew.
Wazà daan engkezi zutun te menge etew is ked-ezapa zan te menge mezaat he mulin-ulin.
21 Ne wazè dan daan iniyuǥi is kebpemumunù,
kinaagman,
meremerik he ulaula,
wey is kebpenakew zan.