3 Ne zuen pa zutun selakew he velinsuǥuen he zuen din bulawan he lediyà ne mid-uvey ne midhitindeg dutun te uvey te vangkù he pemuhatà.

Dekelà is mehemut he veyewà he imbeǥey kandin dutun wey zin ikeamut dutun te menge ampù te menge tumutuu ziyà te vulawan he pemuhatà.

4 Ne is evel zutun te veyewà he midtutung he in-amut te menge ampù te menge tumutuu,

midhendiyà te zivavew he ebpuun dutun te lediyà he egewezan te velinsuǥuen he ebpemenhitindeg diyà te etuvangan te Megbevayà.

5 Ne zutun,

sikan is belinsuǥuen,

mibpenù din is lediyè din te menge vaǥa he ebpuun dutun te pemuhatà ne intimbag din haazà is lediyà diyà te tanà puun dutun te langit.

Ne zutun mibpemeransì,

ne zuen utew memezaǥing,

ne egkeserasab is kilat,

ne midlinug.

6 Ne zutun mid-andam haazà is pitu he menge velinsuǥuen su edhiyupen dan en is menge vudyung dan.

7 Ne is egkehuna zutun te menge velinsuǥuen,

midhiyup din is budyung din.

Ne zutun,

giyew wey hapuy he nesahug te lengesa is nengeulug diyà te tanà.

Ne netutung dutun is iketelu he vahin te kelibutan.

Netutung is iketelu he vahin te menge kayu wey naamin metutung is menge sagbet.

8 Ne zutun,

midhiyup te ikezuwa he velinsuǥuen haazà is kandin he vudyung,

ne zuen intimbag diyà te zaǥat he henduen be te zekelà he vuntud he neregreg.

9 Ne mibaluy he lengesa is iketelu he vahin te zaǥat.

Ne neǥerà is iketelu he vahin te minsan hengkey he linimbag he egeǥehinawa ziyà te zaǥat.

Ne nahanew zaan is iketelu he vahin te langun he menge ed-untuzan diyà te zaǥat.

10 Ne zutun midhiyup te iketelu he velinsuǥuen is kandin he vudyung ne ebpuun te langit neulug is dekelà he vituen he egkeregreg he iring te sulù ne ziyà meketanà haazà te iketelu he vahin te menge wahig wey ziyà te iketelu he vahin te menge kalut.

11 Is ngazan dutun te vituen ne Mepait.

Ne mibmepait is iketelu he vahin te menge wahig diyà te kelibutan.

Ne mibpatey is mezakel he menge etew tenged dutun te wahig su mibmepait utew.

12 Ne zutun midhiyup te ikeepat he velinsuǥuen is budyung din.

Ne nesuǥat is iketelu he vahin te andew,

wey is iketelu he vahin te vulan,

wey is iketelu he vahin te menge vituen.

Ne tenged kayi naawà is kerayag te iketelu he vahin te menge vituen.

Ne seled te iketelu he vahin te timpu te kada andew,

mibmerusirem utew.

Ne iring din ded daan seled te iketelu he vahin te timpu te kada kezukileman.

13 Ne zutun te kemulu ku pa kebantey nezineg ku is egkeǥiyen te vanug he edlayang he utew mibpeketikang diyà te udtuwan.

Ne ketetelu sikandin megkaǥi te mezaǥing he lalag,

ke sikandin te,

“Kehizu utew te menge meǥinged diyà te kelibutan.”

Ne mid-uman sikandin megkaǥi te,

“Utew mekehandekhandek is egkeulaula su meǥaan en edhiyupa te tetelu pa he velinsuǥuen is menge vudyung dan!”