Is Menge Etew he Edtiyapan
7
Neipus haazà neehè ku is heepat he velinsuǥuen te Megbevayà.
Ebpemenhitindeg is kada sevaha kandan diyà te heepat he pesaǥì te kelibutan ne ed-elangan dan is heepat he keramag diyà te kelibutan su wey kenà mekeremaǥi is tanà wey is daǥat wey is menge kayu.
2 Ne zutun neehè ku zaan is sevaha pa he velinsuǥuen he ziyà ebpuun te zapit te edsilaan ne igkulang din is tiyap te wazè din kemetayen he Megbevayà.
Ne haazà is heepat he velinsuǥuen he insarig kandan is kedèdeeti te tanà wey zaǥat,
migkeǥiyan din sikandan.
3 Mezaǥing is kegkaǥi zin te,
“Kenè niw pa pendèdeeti is tanà wey zaǥat wey menge kayu taman te kenè dey pa egkesevukan te tiyap is menge vuked te menge suluǥuen te Megbevayè tew.”
4 Ne nezineg ku zutun is kezakel te menge etew he edsevukan te tiyap,
ne nenggatus wey kepatan wey heepat he libu sikandan langun.
Ne ebpemuun sikandan diyà te sepulù wey zezuwa he kepuun te menge kevuwazan ni Israyil.
5 Te menge kevuwazan ni Huda,
ne sepulù wey zezuwa he libu sikandan is midtiyapan.
Te menge kevuwazan ni Rubin,
ne sepulù wey zezuwa he libu.
Te menge kevuwazan ni Gad,
ne sepulù wey zezuwa zaan he libu.
6 Te menge kevuwazan ni Asir,
ne sepulù wey zezuwa zaan he libu.
Te menge kevuwazan ni Neptali,
ne sepulù wey zezuwa zaan he libu.
Te menge kevuwazan ni Menasis,
ne sepulù wey zezuwa he libu.
7 Te menge kevuwazan ni Simeon,
ne sepulù daan wey zezuwa he libu.
Te menge kevuwazan ni Levi,
ne sepulù wey zezuwa he libu zaan.
Te menge kevuwazan ni Isekar,
sepulù wey zezuwa he libu.
8 Te menge kevuwazan ni Sebulun,
sepulù wey zezuwa he libu.
Te menge kevuwazan ni Jose,
sepulù wey zezuwa he libu.
Te menge kevuwazan ni Benjamin,
sepulù wey zezuwa he libu is midtiyapan daan.
Is Mezakel he Menge Etew Ziyà te Langit
9 Ne neipus haazà ne neehè ku is utew medmezakel he menge etew he kenè en egkevilang tuus te utew mezakel.
Diyè dan ebpuun te minsan hendei he ǥinhedian wey tribu wey kepuun wey minsan hengkey he kineǥiyan.
Diyè dan ebpemenhitindeg te etuvangan te pinuuwà te Megbevayà wey ziyà te etuvangan te nati he kerehidu.
Midsun-uzan sikandan te meputì ne ebpemengulangkulang dan te zehunen he menge subpang.
10 Mibpekezaǥing dan is egkaǥi te,
“Deliǥa is Megbevayè tew he mibpinuu ziyà te pinuuwè din te kedhadì wey zeliǥa zaan is nati he kerehidu su nelibri kiw zan te silut!”
11 Ne zutun daan ebpemenhithitindeg is langun he menge velinsuǥuen te Megbevayà.
Neelingkusan dan haazà is pinuuwà te edhadì wey te menge ebmeǥurangen wey te heepat he linimbag.
Ne heini is menge velinsuǥuen te Megbevayà,
midlangkeb dan dutun te etuvangan te pinuuwà te edhadì su ed-ezapen dan is Megbevayà.
12 Ne migkaǥi zan te,
“Benar iyan su zait is Megbevayè tew he edeliǥen wey ebentuǥen wey edtehuzen wey ebpeselematan su iyan dà sikandin lavew he metau,
iyan sikandin mekeǥeǥehem wey mezesen;
deliǥa sikandin te wazà pidtemanan!”
13 Ne zutun migkeǥiyan a te sevaha zutun te menge ebmeǥurangen,
ke sikandin te,
“Hentei heini is mibpenun-uzan te meputì wey hendei zan ebpememuun?”
14 Ne midtavak a te,
“Iyan ka nesayud.”
Ne ke sikandin te,
“Heini is menge etew,
ebpemekeuma sikandan he ebpuun dutun te zekelà he kemeresayan diyà te lumpad te kelibutan.
Mibpemìpian dan is menge bisti zan diyà te lengesa te nati he kerehidu wey zan mehimu he meputì,
he ke và dà egkeǥiya,
nepalis en is menge salè dan.
15 Umba,
diyè dan edhitindeg te etuvangan te pinuuwà te Megbevayà.
Andew wey mezukilem ne ziyè dan te simbahan te Megbevayà ne edtumanen dan dutun is egkesuatan din.
Ne is Megbevayà he ziyà ebpimpinuu te pinuuwè din te kedhadì,
iyan edlingahaan dan.
16 Kenè dan en egkengevitil;
ne kenè dan en egkengemezahan;
kenè dan en daan egkengetutung te andew wey minsan hengkey he utew meinit.
17 Su is nati he kerehidu he ziyà te teliwazà te pinuuwà te edhadì,
iyan sikandin ed-elima kandan.
Ibpeturedu zin kandan is ebpuunan te menge wahig he ebpekeveǥey te untung he wazà pidtemanan.
Ne is Megbevayà,
id-awè din en is keseengan kayi te menge etew,”
ke sikandin.