3 Ne zutun in-awà te nati he kerehidu is ikezuwa he tiyap dutun te velesahan,

ne nezineg ku he migkaǥi haazà is ikezuwa he linimbag,

ke sikandin te,

“Genat ke en!”

4 Ne zutun midlepew is sevaha pa he kudà he utew meriǥà.

Is ed-untud dutun,

intuǥut kandin he mehimu zin he mekedtetebek is tivuuk he menusiyà su wey mekebpepetayà is menge etew.

Ne zuen imbeǥey kandin he melayat he sundang.

5 Ne hein in-awà dutun te nati he kerehidu haazà is iketelu he tiyap dutun te velesahan,

nezineg ku he migkaǥi is iketelu he linimbag,

ke sikandin te,

“Genat ke en!”

Ne neehè ku zutun he midlepew is kudà he meitem ne zuen timbangan he igkulang te ed-untud dutun.

6 Ne zutun henduen be te zuen migkaǥi ziyà te teliwazà duen te heepat he menge linimbag.

Ke sikandin te,

“Tetelu zà he salmun te veǥas he trigu is egkepemasa te inendawen te sengeetew.

Ne sengeǥantang dà wey tetelu he salmun te veǥas he sibada is egkepemasa te inendawen daan te sengeetew,

iyan,

kenè nu helina is bali te lana wey vinu.”

7 Ne in-awà dutun te nati he kerehidu is ikeepat he tiyap dutun te velesahan ne nezineg ku he egkaǥi is ikeepat he linimbag,

ke sikandin te,

“Genat ke en!”

8 Ne mid-ehè ku ne midlepew zutun is kudà he meputìputì is kekelawag din.

Si Kemetayen is ngazan te ed-untud dutun ne si Impirnu is ngazan dutun te edtinundug kandin.

Ne imbeǥey kandan te zezuwa is kebayàbayà dutun te ikeepat he vahin te tivuuk he menusiyà wey zan mehimetayi pinaaǥi te gira wey vitil wey ebpenhalin he zaru wey ebpemekekaid he menge langgam.

9 Ne in-awà dutun te nati he kerehidu haazà is ikelima en he tiyap dutun te velesahan.

Ne neehè ku zutun te zizalem te vangkù he pemuhatà is menge ǥimukud te menge etew he midhimetayan tenged te kedtuu zan te Lalag te Megbevayà wey tenged daan te kedsengyawa zan dutun te lalag.

10 Ne mibpekezaǥing dan is edhangyù,

ke sikandan te,

“Sikew is mekeǥeǥehem he Nengazen,

waǥas ka wey metinumanen ka!

Sengemenu keluǥayad is kebpeketaǥad dey taman te kenè nu pa ebelesan te silut is menge etew ziyà te kelibutan tenged te kedhimetayi zan kenami?”

11 Ne zutun impemeǥey ziyà te uman sevaha kandan is meputì he kumbalà.

Ne migkeǥiyan sikandan te Nengazen he medhimeley zan dè pa taman te egkeamin egkevunù is menge zuma zan daan he suluǥuen te Megbevayà he edhimetayan daan iring kandan.

12 Ne neehè ku he id-awà dutun te nati he kerehidu is ikeenem he tiyap dutun te velesahan.

Ne zutun midlinug he utew mezesen ne mibmeitem is andew ne henduen be te manggad he saku he meitem utew.

Ne mibmeriǥà is bulan he iring te lengesa.

13 Ne nengeulug dini te tanà is menge vituen he iring te menge mehilew he veǥas te kayu he igira emun egkesuǥat te keramag ne egkengeulug.

14 Ne zutun nahanew is langit iring te velesahan he edlulunen ne is uman buntud wey is uman pulu ziyà te zaǥat,

naawà dutun te nesevukan dan.

15 Ne zutun,

is minsan hentei he etew,

is menge hadì diyà te kelibutan,

is menge velentuǥen he etew,

is menge egalen te menge sundaru,

is menge sepian wey is menge zekelà is keǥehem din,

wey minsan daan is menge uripen wey kenà uripen,

mid-eles dan diyà te menge vudsi wey ziyà te zizalem te menge zekelà he vatu ziyà te menge vuntud.

16 Ne mibpemengulahì dan diyà te menge vuntud wey menge vatu.

Ke sikandan te,

“Lilizi key su wey key kenà maahà te ebpimpinuu ziyà te pinuuwà te edhadì he ziyà te langit ne wey key zaan kenà meumahi te pauk te nati he kerehidu.

17 Su neuma en is timpu te kedsiluti zan kenami te menusiyà ne wazà ebpekesukul kandan.”