Is Belesahan
5
Ne haazà is ebpimpinuu ziyà te pinuuwà te edhadì,
neehè ku he egewezan din diyà te kewanan he velad din is midlulun he velesahan.
Midsuratan is pesiziveluyà dutun te velesahan ne zuen pitu he tiyap he impezeket dutun su wey kenà meebriyi.
2 Ne zutun neehè ku is utew mezesen he velinsuǥuen te Megbevayà ne mibensag sikandin he egkaǥi te,
“Hentei is dait he ed-abri kayi te velesahan?
Hentei is dait he id-awè din heini is menge tiyap su wey mevasa heini?”
3 Ne wazà naahà diyà te langit,
dini te tanà,
wey ziyà te zizalem te tanà he zait he ed-abri zutun te velesahan wey ebasa zutun.
4 Umba mibmesakit is gehinawa ku ne midsineǥew a su wazà naahà he zait he ed-abri wey ebasa zutun te velesahan.
5 Ne zutun migkeǥiyan a te sevaha zutun te menge meǥurang.
Ke sikandin te,
“Kenè ka sineǥew su si Jesus,
sikan is migeraran he erimaung he kevuwazan ni Huda wey kevuwazan ni Hadì David,
iyan sikandin nekezaag ki Setanas,
umba zuen din ketenged te ked-abri te velesahan wey te ked-ewaa te pitu he menge tiyap dutun.”
6 Ne zutun duen neehè ku zutun te teliwazà te pinuuwà te edhadì wey te heepat he menge linimbag he kedesenan wey te menge ebmeǥurangen.
Iyan neehè ku zutun is:
duen edhithitindeg he nati he kerehidu ne neehè ku zaan dutun te lawa zin is menge tulak te palì din te kedhimetayi kandin dengan.
Pitu is sungey zin wey pitu zaan is mata zin he iyan is pitu he ǥehem te Waǥas he Mulin-ulin he edsuǥuen te Megbevayà he ibpeeneb din te tivuuk he kelibutan.
7 Ne haazà is nati he kerehidu,
mid-uvey ne migkuwa zin sikan is belesahan he ziyà te kewanan he velad te ebpimpinuu zutun.
8 Ne hein nekuwa zin en haazà is belesahan,
sikan is menge heepat he linimbag wey is menge keluwaan wey heepat he ebmeǥurangen,
midlangkeb dan diyà te etuvangan dutun te nati he kerehidu su ed-ezapen dan.
Ne zuen arpa te uman sevaha zutun te menge ebmeǥurangen ne zuen egewezan dan he menge lediyà he vulawan he nepenù te veyewà he edtutungen su wey zuen mehemut he evel ne iyan kehuluǥan dutun is menge ked-ampù te menge etew he ǥaked te Megbevayà.
9 Ne egkanta zan te veǥu en he kentahan,
ke sikandan te,
“Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà.
Ebpemuun sikandan diyà te minsan hengkey he kepuun wey kineǥiyan wey tribu wey ǥinhedian.
10 Midhimu nu he iyan dan edhedian nu;
ne midhimu nu zaan he menge memumuhat sikandan he iyan kebpemuhat dan is ked-ezapa zan te Megbevayà tew.
Ne ibpahadì nu sikandan diyà te kelibutan.”
11 Ne zutun mibpenlangulangu a ne nezineg ku is kegkanta te menge velinsuǥuen te Megbevayà.
Utew zan mezakel su edliblibuwen.
Ne zutun dan mebpemenhitindeg te nekeelingkus dutun te pinuuwà te edhadì duma sikan is menge linimbag wey menge ebmeǥurangen.
12 Ne migkanta zan is langun ne utew mezaǥing is kegkanta zan.
Ke sikandan te,
“Is nati he kerehidu he mibpehimatey,
dait sikandin he edeliǥen su dekelà is gehem din,
dekelà is naazen din,
dekelà is ketau zin,
dekelà is desen din.
Ebentuǥen dey,
edtehuzen dey wey edeliǥen dey sikandin!”
13 Ne zutun nezineg ku is kegkanta te langun he menge linimbag he ziyà te langit,
dini te tanà wey ziyà daan te zizalem te tanà wey ziyà te zaǥat.
Ne migkanta is langun he linimbag he ziyà te minsan hendei.
Ke sikandan te,
“Is ebpimpinuu ziyà te pinuuwà te edhadì wey is nati he kerehidu,
deliǥa sikandan,
tehuza sikandan,
wey ventuǥa sikandan te wazà pidtemanan su iyan dan mekeǥeǥehem!”
14 Ne zutun midtavak sikan is heepat he linimbag,
ke sikandan te,
“Metuman heini.”
Ne zutun midlangkeb en maan haazà is menge ebmeǥurangen ne mid-azap dan.