Is Deisey he Velesahan
10
Ne zutun neehè ku is sevaha pa he mekeǥeǥehem he velinsuǥuen he ebpenaug he ebpuun te langit.
Midtaved diyà te kandin is gapun ne mibpeyungan is ulu zin te velugtu.
Iring te kedsiǥa te andew is buked din ne is menge paa zin,
ne henduen be te menge tukud he regreg.
2 Ne ziyà te velad din egewezan din is nevekar en he zeisek he velesahan.
Is kewanan he paa zin,
ne ziyè din iǥiek te lawed te zaǥat ne is givang,
ne ziyà te tanà.
3 Ne mibpekezaǥing sikandin is ed-umew ne is kezaǥing te egkeǥiyen din ne henduen te hiniǥer te erimaung.
Ne zutun te ked-umew zin,
mibales te pitu he veransì he utew mezaǥing.
4 Ne zutun te kebales te veransì,
idsurat ku pezem is nezineg ku,
iyan,
nezineg ku is egkaǥi ziyà te langit te,
“Ieles nu is ibpesavut kayi te pitu he veransì ne kenè nu isurat.”
5 Ne zutun,
sikan is belinsuǥuen he neehè ku he edhithitindeg he ziyà is sevaha he paa zin te tanà ne is sevaha ziyà te zaǥat,
imbayew zin diyà te langit is kewanan he velad din.
6 Ne impepirmahan din is egkeǥiyen din te wazà kemetayen he Megbevayà he nenlimbag te langit wey tanà wey zaǥat wey nenlimbag daan te langun he taǥù kayi.
Ke sikandin te,
“Kenè en heini ebpekesendud!
7 Ne emun edhiyupen dutun te ikepitu he velinsuǥuen is budyung din,
ne human dutun ed-ul-ulaha te Megbevayà is tuyù he in-eles din sumalà is migkaǥi zin dengan diyà te menge ebpeneuven din he menge suluǥuen din.”
8 Ne zutun mid-uman megkaǥi zini te kediey sikan is nezineg ku he egkaǥi ziyà te langit.
Ke sikandin te,
“Hendutun ka te velinsuǥuen he ziyà egiek is sevaha he paa zin te tanà ne is sevaha ziyà te zaǥat.
Ne kuwaa nu is belesahan he igkulang din he neebriyan en.”
9 Ne midhendutun a te velinsuǥuen ne mibuyù ku haazà is deisek he velesahan.
Ne migkeǥiyan e zin te,
“Kuwaa nu ne keena nu.
Meemis utew he iring te teneb diyà te vèbè nu,
iyan,
emun diyè en te ǥetek nu ne utew mepezes.”
10 Ne migkuwa ku haazà is deisek he velesahan diyà te velad din,
ne migkaan ku ne meemis iyan diyà te vèbè ku su iring te teneb,
iyan,
hein neeveleng ku,
ne mibmepezes utew ziyà te ǥetek ku.
11 Ne zutun duen migkaǥi zini te kediey,
ke sikandin te,
“Kinahanglan he iuman nu ipenudtul is ibpepenudtul kenikew te Megbevayà he egkeulaula te mezakel he menge hadì wey menge etew ziyà te minsan hendei he ǥinhedian wey minsan hengkey he kineǥiyan.”