Is Surat Pehendiyà te Ipisu
2
Ne impelaus din is lalag din te,
“Pesurati nu is belinsuǥuen te Megbevayà he ebantey te menge tumutuu he ziyà te inged he Ipisu,
ne isurat nu is menge lalag ku ziyà,
ke sikew te,
‘Siak si Jesus is egawed te pitu he vituen diyà te kewanan ku he velad ne iyan a zaan edhipanew kayi te teliwazà te pitu he sulù.
2 Netuenan ku is langun he menge ulaula niw;
netuenan ku he edhaǥù kew ne meinentusen kew te kemereǥenan tenged te kedtuu niw.
Netuenan ku zaan he kenè niw idtuǥut he zuen menge lalung he etew he menge zuma niw,
su sikan is menge etew he migkaǥi he menge epustul sikandan ni Jesus,
migezaman niw ne zutun netuenan niw he kenà tutuu he menge epustul sikandan.
3 Netuenan ku he ed-antus kew te mereǥen tenged te kedtuu niw kediey ne minsan pa zutun kenè niw ed-isipen he ed-engkezan niw is kedtumana niw te menge suǥù ku.
4 Iyan,
duen netuenan ku he ulaula niw he kenà meupiya su hein aney kew meketuu,
dekelà is gehinawa niw kediey,
ne ǥuntaan malù en edeisek is gehinawa niw kediey.
5 Tentenuzi niw sikan is kedekelaa niw zengan kediey ziyà te ǥehinawa niw;
iniyuǥi niw is mezaat he ulaula ne ul-ulaha niw is meupiya he mid-ulaula niw zengan su emun kenà,
ebeyaan ku sikiyu.
Ne id-awè ku is sulù niw ziyà te selevukè din emun kenè niw edlikuan is daan he ulaula niw.
6 Duen daan egkesuatan ku he ulaula niw su igkepauk niw is menge mezaat he ulaula te menge Nikuleyta he igkepauk ku zaan.
7 Is minsan hentei keniyu,
mebpemineg kayi te egkeǥiyen te Waǥas he Mulin-ulin diyan te keniyu te menge tumutuu!
Is etew he ebpekezaag ki Setanas,
edtuǥutan ku he mekekaan sikandin te veǥas te kayu he iyan puunà te untung he wazà pidtemanan he ziyà te ed-ubpaan te Megbevayà.’ ”
Is Surat Pehendiyà te Ismirna
8 Ne ke sikandin maan te,
“Pesurati nu is belinsuǥuen te Megbevayà he ebantey te menge tumutuu ziyà te inged he Ismirna,
ke sikew te,
‘Iyan heini menge lalag ku te puunà te langun ne egkepengkusan daan te langun.
Minatey a ne nevanhew.
9 Netuenan ku is kegkeantus niw te kemeresayan;
netuenan ku he egkengeayuayu kew.
Ne minsan pa zutun sepian kew utew pinaaǥi te kedtuu niw.
Netuenan ku he kenà benar is id-ituk keniyu te menge etew he egkaǥi he menge Hudiyu zan,
iyan,
kenà sikandan tutuu he Hudiyu su mibpekid-upakat dan ki Setanas.
10 Kenè kew mahandek te meǥaan niw en igkerasey.
Si Setanas,
meǥaan din en ibpepirisu is duma keniyu su ebpenulayen kew zin.
Ne seled te sepulù he andew ebpekeantus kew te kemereǥenan.
Mebmetinumanen kew te menge suǥù ku taman te kemetayen su ebeǥayan ku sikiyu te kuruna he iyan is untung he wazà pidtemanan.
11 Is minsan hentei keniyu,
mebpemineg kayi te egkeǥiyen te Waǥas he Mulin-ulin diyan te keniyu te menge tumutuu.
Is etew he ebpekezaag ki Setanas,
kenè en egkeragkes te silut he iyan is ikezuwa he kemetayen.’ ”
Is Surat Pehendiyà te Pirgemu
12 Ne ke sikandin maan te,
“Pesurati nu is belinsuǥuen he impevantey te Megbevayà diyà te menge tumutuu he ziyà te inged he Pirgemu,
ke sikew te,
‘Siak si Jesus is egkaǥi;
iyan a sikan is duen din sundang he zezuwa is gerangan din he meǥarang utew.
13 Netuenan ku he sakup ni Setanas is inged niw.
Ne minsan pa zutun midhemenan niw is kedtuu niw kedì ne wazè niw engkezi is menge penurù ku minsan dutun te kedhimetayi ki Entipas dengan.
Metinumanen sikandin he ebpenudtul te menge lalag ku,
ne midhimetayan sikandin diyan te inged niw he nesakup ni Setanas.
14 Duen nepipira he menge ulaula niw he kenè ku egkesuatan,
su zuen duma keniyu he edsunuzen dan is impenurù dengan ni Belaam.
Su si Belaam,
impenurù din dengan ki Balak is paaǥi wey mepenulayi is menge kevuwazan ni Israyil.
Iyan is kegkaan te impemuhat diyà te kenà tutuu he megbevayà wey is kedhilavet te kenè dan esawa.
15 Ne zuen daan duma keniyu he edtuuwan dan is menge penurù te menge etew he Nikuleyta.
16 Iniyuǥi niw heini is mezaat he ulaula su emun kenà,
meǥaan ku en sikiyu ebeyai ne edtebeken ku heini is menge etew.
Iyan gumaan ku heini is sundang dini te vèbè ku he iyan is lalag ku.
17 Is minsan hentei keniyu,
mebpemineg te egkeǥiyen te Waǥas he Mulin-ulin diyan te keniyu te menge tumutuu.
Is etew he ebpekezaag ki Setanas,
ebeǥayan ku sikandin te in-eles ku pa he egkeenen he mana he ziyà ebpuun te langit.
Ne ibeǥey ku zaan kandin is meputì he vatu he insurat dutun is beǥu en he ngazan.
Iyan dà egkesayud te ngazan dutun is ebeǥayan.’ ”
Is Surat Pehendiyà te Tiyetira
18 Ne ke sikandin maan te,
“Pesurati nu is belinsuǥuen he impevantey te Megbevayà diyà te menge tumutuu he ziyà te inged he Tiyetira.
Ke sikew te,
‘Siak is egkaǥi,
ne Anak a te Megbevayà;
is menge mata ku,
ne henduen be te egkeregreg,
ne is menge paa ku,
ne henduen be te ǥalang he midlimbasan.
19 Netuenan ku is menge ulaula niw,
dekelà is gehinawa niw kediey.
Mezesen is kedtuu niw.
Metinumanen kew te menge suǥù ku wey meinentusen kew te mereǥen.
Netuenan ku zaan he edhuna he mezakel is menge ulaula niw he meupiya ǥuntaan kenà te mid-ulaula niw he meupiya zengan te aney kew en meketuu.
20 Ne minsan pa zutun,
duen ulaula niw he kenè ku egkesuatan su sikan is bahi he si Hisibil he egkeǥiyen din he ebpeneuven sikandin te Megbevayà,
idtuǥut niw he ibpenurù din is mezaat he ulaula ziyà te menge suluǥuen ku.
Egkaǥi sikandin he kenà supak te Megbevayà is kedhilavet te kenè niw esawa wey is kegkaan te impemuhat diyà te menge kenà tutuu he megbevayà.
21 Neuǥet en is ked-entusa ku kandin wey zin meiniyuǥi is ulaula zin he mezaat,
iyan,
kenè din ed-iniyuǥan.
22 Ne ǥuntaan,
ibpehizeǥè ku su ebpigedahan ku sikandin te zaru.
Ne sikiyu is edtampu kandin te memahawag he vaal,
ebpigedahan ku zaan sikiyu te kemeresayan he utew mepait emun kenè niw ed-iniyuǥan haazà is menge ulaula zutun te vahi.
23 Ne is menge sumusundan din,
edhimetayan ku.
Is menge tumutuu ziyan te langun he menge inged,
egketuenan dan he iyan a nesayud ke hengkey is diyà te isip wey ǥehinawa te etew.
Ibeǥey ku ziyà te kada sevaha is engayan he igkeveǥey kandin sumalà te menge ulaula zin.
24 Ne sikiyu is duma ziyan te Tiyetira he wazà mekezawat te penurù dutun te vahi,
he ke và dà egkeǥiya,
wazè niw zewata is egngezanan te menge mezalem he penurù ni Setanas,
wazè en duma pa he ebpeveelan ku keniyu.
25 Iyan dà is:
hemeni niw is netuenan niw en taman te ebpekeuma a.
26-27 Sikiyu is ebpekezaag ki Setanas wey edtuman te egkesuatan ku taman te kemetayen,
is keǥehem he insarig kediey te Amey ku he Megbevayà,
idsarig ku zaan keniyu.
Ebpeveyveyaan ku keniyu is langun he menge inged diyan te kelibutan.
Utew mezesen is ked-uwita niw kandan;
egkengezaag niw is menge inged ne wazà ebpekesukul keniyu.
28 Ibeǥey ku zaan keniyu is mekevugwas.
29 Is minsan hentei keniyu,
mebpemineg kayi te egkeǥiyen te Waǥas he Mulin-ulin diyan te keniyu te menge tumutuu.’ ”