4-5 Siak si Juan,

ne ebpesuratan ku is pitu he gurupu te menge tumutuu he ziyà te prubinsya he Asya.

Ibpengumew-umew ku he ikeǥaǥew kew te Megbevayà,

wey te Waǥas he Mulin-ulin,

wey ni Jesu Kristu,

ne iveǥey zan daan keniyu is melinawen he kebpekesavuk.

Is Megbevayà,

daan en sikandin te wazè pa limbaǥa is minsan hengkey;

kemulu pa sikandin guntaan wey kenà sikandin egkehanew te wazà pidtemanan.

Is Waǥas he Mulin-ulin he ziyà ed-ubpà te etuvangan te pinuuwà te Megbevayà,

ne pitu is gehem din.

Si Jesu Kristu,

iyan egkeseriǥan is lalag din.

Iyan sikandin kes nehuna he zuen din beǥu en he untung pinaaǥi te kegkevenhawa kandin.

Iyan sikandin ebayàbayà te menge hadì dini te kelibutan.

Dekelà is gehinawa zin kenitew.

Midlibri kiw zin te silut te menge salè tew pinaaǥi te kebpaaǥas din te lengesa zin.

6 Midhimu zin he iyan kiw edhedian din wey iyan kiw memumuhat he iyan kebpemuhat tew is ked-ezapa tew te Megbevayà he Amey zin.

Tehuza sikandin wey medhadì sikandin te wazà pidtemanan!

7 Ebpekeuma si Jesu Kristu he ziyà egkeahà te menge ǥapun.

Egkeahà sikandin te tivuuk he menusiyà ragkes is menge etew he mibpilak kandin dengan.

Ne is langun he kelasi te menusiyà dini te kelibutan,

ebpekesineǥew zan tenged kandin su egkehandek dan te silut.

Metuman heini is langun.

8 Is Nengazen tew he Megbevayà he mekeǥeǥehem he zaan en te wazè pa limbaǥa is minsan hengkey,

iyan ded sikandin guntaan wey minsan keuzemà te wazà pidtemanan.

Ke sikandin te,

“Iyan a sikan is alpa wey umiga,

he ke và dà egkeǥiya,

kes puunà wey egkepengkusan te minsan hengkey.”

9 Iyan a si Juan is sevaha he suled niw tenged te kedtuu ku ki Jesus.

Iring keniyu nekeantus a zaan te menge kemeresayan su sakup a zaan te ǥinhedian din.

Tenged te ingkepauk te gubirnu is kebpenudtul ku te Lalag te Megbevayà wey is kebpenurù ku te impesavut ni Jesus,

impesivey a ne ziyà a ibpeubpà te sengepupulu he egngezanan te Patmus.

10 Ne zutun te sevaha he andew he Duminggu,

utew mezesen is ked-uwita kedì te Waǥas he Mulin-ulin ne zuen impeehè din kedì.

Diyà te egkeiniyuǥan ku nezineg ku is egkaǥi he iring te vudyung su utew mezaǥing,

11 ne ke sikandin te,

“Is egkeehè nu,

isurat nu ne ibpeuwit nu ziyà te pitu he menge gurupu te menge tumutuu he ziyà te menge inged he Ipisu,

Ismirna,

Pirgemu,

Tiyetira,

Sardis,

Piledilpya,

wey ziyà daan te inged he Leudisiya.”

12 Ne midlilingey ku wey ku maahà ke hentei is egkaǥi ne neehè ku is pitu he sulù he vulawan.

13 Ne ziyà te teliwazà dutun te menge sulù,

duen neehè ku he henduen be te etew.

Meluǥayad is kumbalè din ne mibevanda te vulawan.

14 Is ulu zin wey vulvul zin,

ne utew meputì su iring te manggad he meputì.

Is mata zin,

ne henduen be te egkeregreg.

15 Ne is menge paa zin,

ne henduen be te ǥalang he midlangga he midlimbasan.

Ne is laǥeng din,

ne henduen be te zeǥurus te utew mezakel he menge wahig.

16 Ne ziyà te kewanan din migewezan din is pitu he vituen.

Ne edlepew ziyà te vèbè din is sundang he zezuwa is gerangan din he utew meǥarang.

Ne is buked din,

henduen te edsiǥa he andew he utew merayag.

17 Ne hein neehè ku sikandin,

nekelangkeb a ziyà te etuvangan din ne henduen a te minatey.

Ne indampè din kediey is kewanan he palad din ne ke sikandin te,

“Kenè ka mahandek su iyan a sikan is puunà wey kes egkepengkusan te langun.

18 Iyan a kes Megbevayà he wazè din kemetayen.

Mibpehimatey a ne ǥuntaan kenà ad maan ebpatey te minsan keenu.

Iyan a ebayàbayà te menge minatey,

ne zuen ku zaan keǥehem diyà te Iveyaan.

19 Isurat nu is ibpeehè ku kenikew,

is egkeehè nu he egkeulaula ǥuntaan wey is egkeulaula pa keuzemà.

20 Ibpesavut ku kenikew is in-eles dengan he kehuluǥan kayi te pitu he vituen he neehè nu he egewezan ku te kewanan he velad ku wey is kehuluǥan kayi te pitu he sulù he vulawan.

Is pitu he vituen,

iyan alung te pitu he velinsuǥuen te Megbevayà he ebantey te pitu he gurupu te menge tumutuu.

Ne heini is pitu he sulù,

ne iyan sikan is pitu he gurupu te menge tumutuu.”