Neherat is mata ni Juan. Duen mibpaahà kandin he ebpenganlag. Mibevanda te vulawan ne henduen te regreg is menge mata zin. Ne iyan haazà si Jesus, ne zuen ibpetudtul zin ki Juan diyà te pitu he grupu te menge tumutuu he ziyà te pitu zaan he menge inged. Ne nekedseselekawà is ibpekaǥi zin diyà te kada grupu mehitenged te kezekelà te kebmahala zan kandin wey te zuma zan he menge tumutuu wey ke zuen menge kurang dan.

Ne zuen daan nengekaǥi ni Jesus diyà te kandin wey zuen impeehè din diyà te kandin he mehitenged te egkengehitavù te huziyan he timpu su wey zin ikepetueni te zuma. Naahà ni Juan is Megbevayà wey si Jesu Kristu ziyà te langit he ed-ezapen te mid-aǥi en te kemetayen he menge etew he menge sakup din wey elin daan is menge velinsuǥuen. Neehè din daan is kedsiluti te Megbevayà te menge etew he wazà mebpesakup kandin wey is kedsiluti ki Setanas wey te zuma he menge mezaat he mulin-ulin.

Is utew impurtanti he tuyù ni Juan te kedsurata zin kayi ne iyan is wey melig-eni is ked-isip-isip te menge tumutuu he edlislisezen tenged te kedtuu zan ki Jesus. Su egkesavut ta kayi he egkepurung egkezaag te Megbevayà is langun he menge kuntada zin pinaaǥi ki Kristu. Ne edsuhulan din daan is metinumanen he menge etew zin. Diyà te huziyan he vahin kayi te surat egkevasa ta he ebaal is Megbevayà te veǥu he langit wey tana he ilis duen te edezeetan din. Ne egkeipus haazà ebpekeubpè en duma kandin is menge etew zin te wazà pidtemanan dutun te inged he edsiǥasiǥa he edlugtanà puun te langit. Egkeehè dan en sikandin ne id-awè din en is ebpekeveǥey kandan te seeng. Kenè en dutun ebmezukilem ne kenè en dutun egkinehenglanen is ebpekeveǥey te kerayag su is Megbevayà he Amey wey si Jesu Kristu, iyan kerayag dutun.