2 Berakat he mehizuwi kew,

mebmelinawen kew,

wey ikeǥaǥew kew te Megbevayà.

3 Minahal ku he menge suled,

minsan pa te iyan aney he egkesuatan ku is ebaal a te surat he ibpeuwit ku ziyan wey ku ikeseysey ziyan te keniyu is kedlibriya kenitew te Megbevayà,

iyan,

utew en guntaan epiki he ebpesuratan ku sikiyu wey ku sikiyu mesembaǥi.

Kinahanglan,

menge suled,

he pekezesen kew sukul te menge etew he edhelinen dan pezem is tutuu he tuluuwen he imbeǥey te Megbevayà.

Haazà is tuluuwen,

imbeǥey zin kenitew te menge ǥaked din ne kinahanglan he kenè en ed-umanan te minsan hentei.

4 Umba kinahanglan he egkeǥiyen ku heini su zuen menge etew he nekeamur keniyu,

iyan,

id-eles dan he kenà hustu is edtuuwan dan.

Wazè dan kedtahud te Megbevayà;

edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun beliǥeǥawen is Megbevayà ne ebpeseyluwen kiw zin gihapun.

Kenè dan edtuu he si Jesu Kristu,

iyan dà egalen tew wey Nengazen tew.

Dengan dà isurat te menge ebpeneuven te Megbevayà ke hengkey is silut kandan.

5 Netuenan niw en is egkeǥiyen ku,

iyan,

ed-umanan ku pa egkeǥiya ziyan te keniyu wey niw kenà melipati.

Dengan midlibri te Megbevayà is menge pinilì din he etew ne impeǥuwè din sikandan diyà te ǥinhedian he Ihiptu,

iyan,

dutun te nekeǥuwè dan en,

mibpenhimetayan din is duma kandan he wazà medsarig kandin.

6 Isipa niw zaan is menge velinsuǥuen din dengan diyà te langit.

Mid-engkezan dan is ketengdanan he imbeǥey zin kandan ne mid-ewaan dan is hustu he ed-ubpaan dan.

Tenged dutun mibpirisu zin sikandan diyà te utew merusirem.

Mibakus din te kedina he kenà egkezeetan te wazà pidtemanan su idtaǥad sikandan taman te kenè pa egkeuma is andew keuzemà te kedsiluti zin kandan.

7 Isipa niw zaan is menge meǥinged dutun te menge inged he Suduma wey Gumura wey is menge inged he uvey zutun.

Neiringan dan haazà is menge velinsuǥuen su utew subra is mezaat he menge ulaula zan.

Is menge maama zutun,

ne kenà iyan dà is menge vahi midhilevetan dan,

kekenà,

neked-eeriǥè dan is pudu menge maama ne tenged dutun midsilutan sikandan te hapuy ne nehimu haazà he petizaan te Megbevayà te langun keuzemà he edsilutan din te hapuy he kenà egkeevukan.

8 Ne iring din ded daan haazà is menge etew he ebpenurù te tarù diyan te keniyu.

Edtumanen dan is meremerik he ulaula he egkeǥiyen dan he impenurù kandan pinaaǥi te teǥeinep.

Kenè dan ebpesakup te Megbevayà ne edsumpeliten dan is menge kedesenan diyà te langit.

9 Ne minsan si Miguel,

sikan is lavew he velinsuǥuen te Megbevayà,

kenà sikandin ed-ulaula te iring dutun su hein minatey zengan si Moises,

mibpelewanà si Miguel wey si Setanas ke hentei is ebpekeangken te lawa ni Moises.

Ne wazà mekeǥehem si Miguel he edsulà ki Setanas.

Iyan dà lalag din kandin is:

“Iyan edsawey kenikew is Megbevayà.”

10 Iyan,

haazà is menge etew mulà he ebpenurù te tarù,

edsumpeliten dan is kenè dan egkesavut.

Iring sikandan te menge leew he langgam he kenà ebpekeisip-isip su is ulaula he egkesuatan te lawa zan,

iyan edtumanen dan ne iyan haazà ebpekezezaat kandan.

11 Kehizu zan!

Mid-iringan dan is mid-ulaula zengan ni Kain.

Mid-iringan dan is paaǥi ni Belaam he utew sayep su minsan netuenan dan he mezaat is ed-ul-ulahan dan,

ed-ul-ulahan dan gihapun su susuaten sikandan te selapì.

Iring te midsukul si Kuri te Mebevayà,

midsukul zan daan ne edsilutan sikandan iring te midsilutan daan si Kuri.

12 Ebpekezezaat sikandan te zengeg niw ke edtampu zan te keemuran niw su kenè dan mulà egkeeled dutun te kedtumana zan te mezaat he kebayè dan ke ebpekidtuǥen dan keniyu.

Iyan dà egkeisip dan is kandan dà he egkesuatan.

Wazè dan menge pulus;

iring sikandan te menge ǥapun he wazà duen uzan he mibpagwis te keramag.

Iring sikandan te menge kayu he kenà ebpemeǥas minsan pa te iyan en pezem timpu te kebpemeǥas.

Ne umba kenà ebpekepemeǥas su nepiley en ne neǥangu.

13 Iring daan sikandan te utew zezekelà he vaǥel ziyà te zaǥat ke zuen bagyu su iring is menge mekeeled-eled he ulaula zan te meremerik he vuràburà he ebpenlepew ziyà te veyvey.

Iring sikandan te menge vituen he nekesuwey te hustu he nesevukan dan su kenè en egkeseriǥan is ibpenurù dan.

Midteǥana te Megbevayà is utew merusirem he egkeubpaan dan te wazà pidtemanan.

14 Si Inuk,

sikan is ikepitu he lapis he kevuwazan ni Adan,

netagnè din dengan haazà is menge etew su migkaǥi sikandin te,

“Keuzemà ebpekeuma is Nengazen he edumahan te liblibuwen he menge velinsuǥuen din

15 su edsusiyen din is nengeulaula te minsan hentei he etew.

Edsilutan din is minsan hentei he lalung he wazè dan kedtahud te Megbevayà tenged te menge kelelalung he mid-ulaula zan wey tenged te kedsumpelita zan te Megbevayà.”

16 Ne haazà is menge etew he netagnà ni Inuk,

menge perelivak wey perevasul sikandan.

Iyan dan edtumanen is menge memezaat he kebayè dan.

Memepelevawen dan,

iyan,

edigdiǥen dan is menge zuma he etew su wey zan melimbungi.

17 Tentenuzi niw,

menge suled,

is netagnà dengan te menge epustul he midsuǥù te Nengazen tew he si Jesu Kristu.

18 Ke sikandan te,

“Keuzemà te ketepusan he menge andew ebpenlepew is menge etew he edsumpalit keniyu.

Iyan edtumanen dan is menge kebayè dan he supak te Megbevayà.”

19 Ne haazà is menge etew he netagnè dan,

iyan igkevahinbahin niw te menge tumutuu.

Iyan dà egkeisip dan is egkesuatan dan dini te kelibutan ne wazà diyà te kandan is Waǥas he Mulin-ulin.

20 Ne sikiyu mulà,

menge minahal ku he suled,

peniguduwi niw is kebpetebtevangè niw su wey meheǥet is kedtuu niw te tuluuwen he impetuuwan kenitew te Megbevayà.

Pekezesen kew ampù pinaaǥi te ǥehem he ibeǥey te Waǥas he Mulin-ulin.

21 Layun niw isipa is utew zekelà he ǥaǥew keniyu te Megbevayà dutun te kedteǥazi niw te timpu keuzemà he zutun ibpaahà kenitew te Nengazen tew he si Jesu Kristu is dekelà he hizu zin su zutun kenè kiw zin edsuwayan te wazà pidtemanan.

22 Is menge etew he zuwazuwa pa is kedtuu zan,

ipeehè niw kandan is hizu niw kandan.

23 Tevangi niw sikandan wey zan melibri te silut,

iring te kedsekelawa niw ziyà te hapuy te egketutung.

Is menge zuma he utew zekelà is salè dan,

ipeehè niw zaan kandan is hizu niw,

iyan,

andam kew su kela ke mepenulayi kew zaan pinaaǥi te meremerik he ulaula zan.

24 Utew zekelà is kebpeselemati tew te Megbevayà.

Iyan metau he edtavang kenitew su wey kenè kiw mekesuwey ziyà te kandin.

Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.

25 Edeliǥen tew sikandin su iyan dà sikandin Megbevayà;

iyan sikandin Menluluwas tew pinaaǥi te Nengazen tew he si Jesu Kristu.

Iyan sikandin egkevantug;

iyan sikandin hadì;

iyan sikandin mekeǥeǥehem;

iyan sikandin ebayàbayà dengan te wazè pa limbaǥa is minsan hengkey,

wey ǥuntaan,

wey keuzemà te wazà pidtemanan.