Is Surat Pehendiyà te Sardis
3
Ne ke sikandin maan te,
“Pesurati nu is belinsuǥuen he impevantey te Megbevayà diyà te menge tumutuu he ziyà te inged he Sardis.
Ke sikew te,
‘Iyan a si Jesu Kristu is egkaǥi;
iyan a ebayàbayà te Wagas he Mulin-ulin he pitu is gehem din.
Ne iyan a zaan egawed te pitu he vituen.
Netuenan ku is menge ulaula niw.
Mezakel is egkaǥi he zuen niw en untung he wazà pidtemanan,
iyan,
kenè kew en edsunud kediey.
2 Kenè kew lipezeng,
kekenà,
lig-eni niw is egkesamà he zesen te kedtuu niw su henduen be te egkeawè en.
Netuenan ku he utew zekelà is kurang niw su is menge ulaula niw,
kenà egkesuatan te Megbevayà.
3 Kenè niw lipati is impenurù keniyu he midawat niw zengan,
kekenà,
hemeni niw ne ewaa niw ziyà te ǥehinawa niw is kenè niw kedtuu.
Su emun kenè niw ed-iniyuǥan is menge ulaula niw he mezaat,
ebeyaan ku sikiyu zutun te timpu he kenà a keniyu ebpeebuten su iring te tekawen is kebpekeuma ku.
4 Deisey kew zà diyan te Sardis is wazà mevuringi is bisti zin,
he ke và dà egkeǥiya,
wazà medtampu te mezaat he ulaula.
Ne ebpekezuma kew kedì he edsun-uzan te meputì su zait kew he ebpekiduma kedì.
5 Is minsan hentei he ebpekezaag ki Setanas,
edsun-uzan sikandin te meputì ne kenè ku ebpenasen is ngazan din diyà te libru he zutun isurat is menge ngazan te ebeǥayan te untung he wazà pidtemanan.
Ne ziyà te etuvangan te Amey ku he Megbevayà wey is menge velinsuǥuen din,
ed-engkenen ku sikandin he ǥaked ku.
6 Is minsan hentei keniyu,
mebpemineg te egkeǥiyen te Waǥas he Mulin-ulin diyan te keniyu te menge tumutuu ku!’ ”
Is Surat Pehendiyà te Piledilpya
7 Ne ke sikandin en maan te,
“Pesurati nu is belinsuǥuen te Megbevayà he ebantey te menge tumutuu ziyan te inged he Piledilpya.
Ne ke sikew te,
‘Siak si Jesus is egkaǥi;
iyan a sikan is egkeseriǥan he mibpilì te Megbevayà.
Imbeǥey kedì is keǥehem te kedhadì te ǥinhedian ku iring te kedhadì dengan ni Hadì David.
Ne emun duen ebpuwasan ku wey mekeseled dutun te ǥinhedian ku,
kenè en egkelekevan te minsan hentei.
Ne emun duen etew he edlekevan ku,
kenè en daan egkepuwasan te minsan hentei.
8 Netuenan ku is menge ulaula niw.
Ne minsan pa te pirapira kew zà he leǥas,
metinumanen kew te menge lalag ku ne wazè niw engkezi is kedtuu niw kediey.
Umba,
is gemawan he ibayè niw,
mibpuwasan ku en ne kenè en egkelekevan te minsan hentei,
he ke và dà egkeǥiya,
wazè en ebpekesanggen keniyu te ibpeulaula ku keniyu.
9 Ne haazà is menge etew he egkaǥi he menge Hudiyu sikandan,
tarù is egkeǥiyen dan su menge sakup sikandan ni Setanas.
Edhimuwen ku he mekeluhud sikandan diyan te etuvangan niw.
Ne zutun egketuenan dan he iyan kew mahal zini te ǥehinawa ku.
10 Ne tenged te metinumanen kew te suǥù ku he med-antus kew,
ebentayan ku sikiyu wey kew kenè en ebpekesaǥad te limas he egkeantus te tivuuk he menusiyà he ibpenggezam kandan.
11 Meǥaan e en ebpekeuma.
Hemeni niw is tutuu he tuluuwen he netuenan niw su wey kenà igkeveǥey ziyà te zuma is suhul he ibeǥey keniyu ke ebpekezaag kew ki Setanas.
12 Is minsan hentei he ebpekezaag ki Setanas,
edhimuwen ku sikandin he metahud su edhimuwen ku sikandin he iring te tukud diyà te valey ziyà te langit he zutun ed-ezapa is Megbevayè ku ne kenà haazà is tukud igkeawà dutun.
Ne idsurat ku ziyà te kandin is ngazan te Megbevayè ku wey is ngazan te inged te Megbevayà he iyan sikan is inged he veǥu he Hiruselim he ebpenaug he ebpuun te Megbevayà diyà te langit wey elin daan idsurat ku ziyà te kandin is beǥu he ngazan ku.
13 Is minsan hentei keniyu,
mebpemineg te egkeǥiyen te Waǥas he Mulin-ulin diyan te keniyu te menge tumutuu.’ ”
Is Surat Pehendiyà te Leudisiya
14 Ne ke sikandin maan te,
“Pesurati nu is belinsuǥuen te Megbevayà he ebantey te menge tumutuu ziyà te inged he Leudisiya,
ne ke sikew te,
‘Siak si Jesus is egkaǥi;
migeraran a te Metinumanen wey Egkeseriǥan su venar is egkeǥiyen ku.
Pinaaǥi kedì midlimbag te Megbevayà is minsan hengkey.
15 Nesayud a te langun he menge ulaula niw.
Kenè kew meinit ne kenè kew zaan meǥenew,
he ke và dà egkeǥiya,
kenè kew menge kuntada ku ne kenè kew zaan menge sakup ku.
16 Angin pezem ke meinit kew ne emun kenà,
ne meǥenew kew,
iyan,
geina te meǥelimendew kew zà,
idrepu ku sikiyu.
17 Egkaǥi kew te,
“Sepian kiw ne meupiya is kebpekesavuk tew ne wazè tew en kurang te minsan hengkey.”
Ne minsan pa zutun,
wazè niw metueni he mekehizuhizu kew utew su egkengeayuayu kew te kedtuu;
nengelakap is isip niw wey nengelevasan kew su wazè niw menge metazeng he ulaula.
18 Umba,
edsembaǥan ku sikiyu he pemesaha niw zini te kediey is waǥas he vulawan he migezaman diyà te hapuy,
he ke và dà egkeǥiya,
hustu he kedtuu,
ne tutuu en human he sepian kew.
Ne pemasa kew zaan diyà te kediey te meputì he bisti wey maawà is kegkeeled niw tenged te kegkelevasi keniyu.
Ne pemasa kew zaan te ibawì te kegkelakap niw su wey mehustu is ked-ehè niw.
19 Is langun he menge etew he mahal zini te ǥehinawa ku,
edsewayan ku wey edsilutan ku su wey mepenurù sikandan.
Ne tenged dutun purungi niw is ulaula niw wey iniyuǥi niw is ulaula niw he mezaat.
20 Pemineg kew su zini ad te ǥemawan niw is ebpenelehuzan.
Ke zuen etew he ebpekezineg kediey ne ebpuwasan e zin,
edseled a ne egkaan a zuma kandin,
ne egkaan daan sikandin duma kediey.
21 Is minsan hentei he ebpekezaag ki Setanas,
ibeǥey ku kandin is ketenged te kebpinuu he zurug kedì diyà te pinuuwè ku te kedhadì iring te nekezaag a zaan ki Setanas ne mibpinuu a he zurug te Amey ku.
22 Is minsan hentei keniyu,
mebpemineg te egkeǥiyen te Waǥas he Mulin-ulin diyan te menge tumutuu,’ ”
ke sikandin.