10
Ne egkesavut te en he is kesuǥuan he imbilinbilin ni Moises,
ne alung dà;
ne is langun he meupiya he egkehimu pinaaǥi ki Kristu,
ne iyan hustu he impaalung dutun te kesuǥuan.
Su insuǥù dutun te kesuǥuan he kinahanglan kada tuig,
ne layun edhimuwa is menge kebpemuhat.
Ne tenged kayi egkesavut ta zaan he pinaaǥi kayi te kebpemuhat kenà egkehimu he ebmetazeng is menge etew.
2 Su emun pinaaǥi zutun he paaǥi nelumpiyuwan is menge ulaula te menge ed-azap,
ne wazè en kinahanglan he ed-uman dan pa ebpemuhat su nengepesaylu en pezem is menge salè dan ne egkesavut dan dutun he kenè en sikandan edsilutan tenged te menge mezaat he ulaula zan.
3 Ne ǥeina te kada tuig dutun,
kinahanglan gihapun he ed-uman dan ebpemuhat ne netuenan dan he wazè bes maawà is menge salè dan.
4 Su kenà egkehimu te minsan hengkey he paaǥi he igkeawà te menge salè tew is lengesa te menge vaka wey menge kambing.
5 Ne egketuenan ta heini su zutun te timpu zengan he nekeuma si Kristu zini te kelibutan,
migkaǥi sikandin diyà te Amey zin he Megbevayà te,
“Kena iyan is menge ibpemuhat he ayam egkesuatan nu,
kekenà,
midlimbag nu is lawa he egkeǥamit ku,
ne iyan heini egkesuatan nu he ibpemuhat.
6 Su kenè nu iyan egkesuatan is kebpemuhata zan te menge ayam he edtutungen wey is lengesa te menge ayam he ibpemalis te menge salè dan.
7 Ne tenged kayi migkaǥi si Kristu ziyà te Megbevayà te,
‘Iyan impengetuvang ku kenikew su edtumanen ku en is egkesuatan nu sumalà is insurat he tagnà mehitenged kedì dutun te insurat he lalag nu,’ ”
ke sikandin.
8 Midhunaan din te egkaǥi he kenà egkesuatan te Megbevayà is menge halad wey menge kebpemuhat he edtutungen wey is lengesa te menge ayam he ibpemalis te salà.
Ne migkaǥi zin heini minsan pa te intelaan heini te kesuǥuan.
9 Ne mid-umanan din te egkaǥi te,
“Iyan impengetuvang ku kenikew su edtumanen ku en is egkesuatan nu.”
Ne tenged kayi egkesavut tew he mid-ilisan te Megbevayà is daan he paaǥi te kebpemuhat ne iyan in-ilis dutun is kebpemuhata te lawa ni Kristu.
10 Ne ǥeina te midtuman ni Jesu Kristu is egkesuatan te Megbevayà,
nengepalis is menge salè tew pinaaǥi te kesevaha zà he kebpemuhata zin te keugelingen din he lawa.
11 Ne zutun te zaan he paaǥi te ked-azap,
is menge memumuhat he Hudiyu,
ne andew-andew ziyè dan te simbahan edhithitindeg is edterebahu su edtumanen dan is baal zan te kebpemuhat.
Ne heini is menge kebpemuhat dan,
ne kenà gihapun ebpekeawà te menge salà te menge etew.
12 Iyan,
si Kristu mulà,
kesevaha zà sikandin mebpemuhat,
ne naawà dutun is menge salè tew ne kenè en heini kinahanglan he ed-umanan pa maan te minsan keenu.
Ne tuus te netapus din en heini is terebahu zin su mibpinuu sikandin diyà te lavew he pinuuwà te egkekewanan te Megbevayà su edhadì.
13 Ne kemulu pa sikandin dutun guntaan su edteǥazan din is timpu keuzemà he zutun egkevakus te Megbevayà is langun he menge kuntada zin wey sikandin mekehadì.
14 Ne tenged kayi te kesevaha zà he kebpemuhat din diyà te Megbevayà,
sikitew is mibpelisan din te salà,
midhimu kiw zin he metazeng te wazà pidtemanan.
15 Ne zuen daan ibpenurù kenitew te Waǥas he Mulin-ulin dutun te insurat he Lalag te Megbevayà he edhenduen te,
16 “Siak is Nengazen,
iyan heini veǥu en he paaǥi
he edtukuzen ku zutun te menge sakup ku keuzemà wey ku sikandan mezawat.
Idsurat ku is menge suǥù ku ziyà te ǥehinawa zan wey ziyà te isip dan,”
ke sikandin.
17 Ne mid-uman sikandin megkaǥi te,
“Is menge salè dan wey is menge mezaat he ulaula zan,
edlipatan ku,
ne kenè ku en maan ed-isipen.”
18 Ne zutun,
geina te nengepesaylu zin en heini is langun,
wazè en kinahanglan he zuen pa ibpemuhat he id-awà te menge salè ta.
Is Ked-uvey Ziyà te Megbevayà
19 Ne,
menge suled,
tenged te mibpehimatey si Jesus ne impetiǥis is lengesa zin,
wazè en kegkelenew ta te kedseled pinaaǥi te ked-ampù dutun te utew mahal he ruǥu he seled te kurtina.
20 Su si Jesus,
midhimu zin is ibayè ta pinaaǥi te kebpemuhata te lawa zin,
ne heini is ibayà,
ne ebpekeveǥey te untung he wazè din pidtemanan.
21 Ne kenà duen dà taman su zuen te en utew lavew he memumuhat he ebayàbayà kenitew te menge sakup te Megbevayà.
22 Ne tenged kayi,
ed-etuvang ki en te Megbevayà,
ne kenà tarù is ked-ezapa ta kandin.
Edheǥeten ta is kedtuu ta ne kenè ki eduwazuwa.
Su netuenan ta he nepelisan ki en te lengesa ni Jesus ne netuenan ta zaan he in-awà kayi is menge salè ta.
Nengebewtismuwan kiw en he tuus te kedlumpiyuwi kenitew te Megbevayà.
23 Edhemenan tew is meheǥet he kebperateng te kedtulusa kenitew keuzemà te wazà duwazuwa su netuenan tew he metinumanen is Megbevayà ne edhimuwen din is impenaad din kenitew.
24 Kenà tew ed-ewaan dini te ǥehinawa tew is kebpepurpurungè tew su wey layun mahal zini te ǥehinawa tew is minsan hentei,
ne wey layun mehimu te uman sevaha kenitew is menge meupiya he ulaula.
25 Kenè tew ed-engkezan is kedtiǥum tew te ked-azap te Megbevayà;
kenè tew ed-iringan is duma he menge tumutuu he mid-engkezan dan en is kedsimba,
kekenà,
edtiǥum kiw su wey kiw mekepesemsembaǥà.
Utew heini kinahanglan,
lavew en emun egketuusan ta he meǥaan en is kedlikù te Nengazen tew he si Jesus.
26 Ne emun nesavut te en is tutuu he tuluuwen,
iyan,
edtuyuen te pa maan is layun ked-ulaula te mezaat he ulaula,
wazè en minsan hengkey he kebpemuhat he edewaten te Megbevayà wey maawà is salè ta.
27 Is etew he iyan heini ulaula zin,
ne iyan egkepengkusan din is mekelimlimezang he hukum kandin wey is utew meinit he hapuy he iyan idsilut te Megbevayà dutun te langun he edsukul kandin.
28 Su is minsan hentei zengan he wazè din tehuza is kesuǥuan he imbilinbilin ni Moises,
emun edtistiǥusan heini te minsan tetelu wey ke zezuwa ve he tistiǥus,
ne kenà egkehizuwan,
kekenà,
edhimetayan sikandin.
29 Ne emun iyan haazà,
wey pe be kenà utew meveǥat is idsilut dutun te etew ǥuntaan he edsumpeliten din is hizu kandin te Anak te Megbevayà.
Utew meveǥat is idsilut kandin su igkepesavut din pinaaǥi zutun te mid-ulaula zin he wazà pulus dutun te lengesa ni Jesus he ibpalis pezem kandin he iyan tuus te veǥu en he paaǥi te kebpekidsevaha te Megbevayà te menusiyà.
Meveǥat is silut kandin su edsumpeliten din is beliǥeǥawen he Waǥas he Mulin-ulin.
30 Su netuenan tew he migkaǥi is Megbevayà te,
“Iyan a ebales,
iyan a edsilut kandan tenged te menge ulaula zan he mezaat.”
Ne zuen daan insurat he lalag he edhenduen te,
“Edsusiyen te Megbevayà is menge ulaula te menge sakup din.”
31 Ne emun iyan edsilut is Megbevayà he wazè din kemetayen,
ne utew mekehandekhandek haazà is idsilut din!
32 Isipa niw is timpu zengan hein sikan kew pa meteyawi te tutuu he tuluuwen ne midtuuwan niw.
Utew mezakel is kemereǥenan he nengeeǥiyan niw,
iyan,
nekeantus kew ne wazà haazà ikeawà te kedtuu niw.
33 Mibpesipelahan kew ne midlupiǥan kew ziyà te etuvangan te mezakel he menge etew,
ne zuen timpu he mid-unungan niw is menge zuma niw te menge pesipala kandan su nehizuwan niw.
34 Ne nehizuwan niw,
ne midtevangan niw is menge tumutuu he nengepirisu.
Ne minsan pa te mibpen-ileg te menge etew is langun he menge azen niw,
midlipey kew gihapun su netuenan niw he zuen azen niw he utew pa meupiya ziyà te langit he kenà egkeileg diyà te keniyu te wazè din pidtemanan.
35 Umba,
menge suled,
kenè niw engkezi is kedsarig niw su emun meheǥet is kedsarig niw te Megbevayà,
egkezawat niw is suhul zin he utew meupiya.
36 Kinahanglan he meinentusen kew wey niw metuman is egkesuatan te Megbevayà ne human niw egkezawat is impenaad din keniyu.
37 Su zuen insurat he Lalag te Megbevayà he edhenduen te,
“Meǥaan en is kebpekeuma te edteǥazan niw ne kenà egkehimu he ebpekelimpas sikandin.
38 Ne haazà is menge sakup ku he nengehimu en he metazeng tenged te kedtuu zan kedì,
ebeǥayan ku sikandan te untung he wazè din pidtemanan.
Iyan,
ke zuen minsan hentei kandan he edsuwey tenged te kegkehandek,
utew ku igkeepes,”
ke sikandin.
39 Iyan,
sikitew,
menge suled,
kenè kiw iring te menge etew he edsuwey ne edsilutan sikandan te Megbevayà su mezesen mulà is kedtuu tew ne pinaaǥi kayi nelibri kiw en te silut.