2
Umba egkeǥiyen ku heini su egkesuatan ku he metueni niw ke maan is ebpenigudu a edhaǥù tenged keniyu wey tenged daan te menge tumutuu ziyà te inged he Leudisiya wey is minsan hentei he tumutuu ziyan he iring keniyu wazè pa mekekilala kedì.
2 Iyan idhaǥù ku su wey melig-eni is kedtuu niw te Megbevayà pinaaǥi te kegkeupakat niw wey pinaaǥi te kebmahala niw te uman sevaha keniyu.
Egkesuatan ku he meheǥet is kegkesavut niw te impenurù keniyu he iyan kes impezayag te Megbevayà keniyu mehitenged ki Kristu.
3 Su iyan dà sikandin ebpekeveǥey te minsan hengkey he tutuu he ketau wey tutuu he kedsavut.
4 Egkeǥiyen ku heini su wey wazà mekekabig keniyu he minsan hentei pinaaǥi te menge ketezengan he henduen be te hustu,
iyan,
tarù.
5 Su minsan te wazà a ǥuntaan diyan te keniyu,
layun ku sikiyu ed-isipa.
Igkelipey ku sikiyu su netuenan ku he mibpurungan niw te ed-ulaula is meupiya he ulaula wey melig-en daan is kedtuu niw ki Kristu.
Is Kelibriyanan Pinaaǥi te Kebpekidsevaha Tew ki Jesu Kristu
6 Ne ǥeina te midawat niw si Jesu Kristu he Nengazen niw kinahanglan he is menge ulaula niw,
ne zait te upakat niw kandin.
7 Purung kew pendalid diyà te kandin;
purungi niw istudyuwi is menge ulaula zin;
purungi niw tuuwi sikan is tutuu he tuluuwen he impenurù keniyu.
Ne kinahanglan he layun niw peselemati te Megbevayà is gaǥew zin keniyu.
8 Andam kew su kela ke zuen egkabig keniyu pinaaǥi te kebpenurù te tuluuwen he tarù ne wazè din pulus su imbilinbilin dà te menge etew.
Kenà haazà hustu he tuluuwen su kenà ebpuun diyà te ki Kristu.
9 Umba egkeǥiyen ku heini su si Kristu,
nehimu sikandin he etew.
Duen din lawa,
iyan,
minsan pa kayi is minsan hengkey he ziyà te Megbevayà ne ziyà te kandin.
10 Ne sikiyu zaan,
pinaaǥi te kebpekidsevaha niw ki Kristu,
nekepurung kew en mekeazen te untung he imbeǥey keniyu ni Kristu.
Ne iyan si Kristu sikan is edhadì te minsan hentei he kedesenan he zuen din keǥehem wey kebayàbayà.
11 Ne tenged kayi,
minsan kenè kew menge Hudiyu,
is midhimu keniyu te Megbevayà,
ne iring duen te kedsirkunsidara zengan te menge Hudiyu su nehimu kew en he menge ǥaked te Megbevayà pinaaǥi te kebpekidsevaha niw ki Kristu.
Iyan,
selakew heini,
su kenà pinaaǥi te kebpelii te lawa zà duen,
kekenà,
in-awà ni Kristu is gehem te mezaat he kebayà te lawa niw.
12 Ne tenged kayi inleveng kew zuma kandin dutun te kebewtismuwi keniyu,
ne nevanhew kew zaan duma kandin su nekidsevaha kew kandin tenged te midtuuwan niw he mekeǥeǥehem is Megbevayà.
Iyan sikandin sikan is mibanhew ki Kristu.
13 Ne sikiyu,
wazè niw pa zengan untung he wazè din pidtemanan tenged te memezaat is menge ulaula niw te kenà menge Hudiyu wey tenged te midtuman niw is memezaat he kebayà te lawa niw.
Ne minsan pa zutun,
mibeǥayan kew te Megbevayà te untung he wazè din pidtemanan ne nevanhew kew en duma ki Kristu.
Mibpesaylu kiw te Megbevayà te langun he menge salè tew.
14 Ne minsan pa te wazè kiw medtuman te insurat he kesuǥuan din,
pinaaǥi te kebpatey ni Kristu ziyà te krus,
in-awè din is kesuǥuan ne tenged kayi wazè en igkesiluti zin kenitew.
15 Ne haazà is menge kedesenan he mezaat he mulin-ulin he zuen dan keǥehem te kebayàbayà,
in-awà te Megbevayà is keǥehem dan,
ne pinaaǥi te kedsulituwa zin kandan pinaaǥi te kebpatey ni Kristu ziyà te krus,
impeehè din he wazè dan en kebpekesukul.
16 Umba,
menge suled,
kenè niw itetenged is edsudì keniyu emun kenè niw ebpezumdumahan is egkesuatan dan he ibpeulaula keniyu mehitenged te kegkaan wey ked-inum,
wey mehitenged daan te kedsilibra te menge mahal he menge andew wey kedsilibra te intrada te hayag wey menge andew te kedhimeley.
17 Su is menge iring dutun,
ne nehimu zengan he alung dà.
Ne ziyè pa te huziyan is teǥialung dutun he iyan si Kristu.
18 Duen daan menge etew he egkaǥi he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen.
Ne ibpenurù dan he kinahanglan he ebpekeazap ki te menge velinsuǥuen te Megbevayà ziyà te langit.
Kenè niw,
menge suled,
itetenged is kedsudì dan keniyu su is iring dutun he etew,
ne ebpezalig dà,
iyan,
wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.
19 Ne wazè dan en upakat ki Kristu he iyan ed-uwit kenitew.
Iyan si Kristu puunà te zesen te kedtuu tew ne pinaaǥi kandin ed-iseg is kezesen te upakat tew te langun he tumutuu sumalà is egkesuatan te Megbevayà,
iring te lawa tew,
ne ed-iseg daan is desen din ne kenè ebpekedsusuwey pinaaǥi te kegkevagkes kayi zutun te menge uǥat din.
20-22 Na,
menge suled,
geina te iring te minatey ki en duma ki Kristu,
wey kenè ki en maan egkeveyveyaan te menge kenà hustu he tuluuwen,
kinahanglan he kenè kew en maan mebpemineg te menge suǥù te menge etew he menge kuntada te Megbevayà.
Menge suǥù heini te menge etew zà duen.
Egkaǥi zan he zuen menge egkeenen he kenà ibpekaan kenitew te Megbevayà,
ne minsan is kegezami wey is kegewezi zà kayi ne wazè din kun ituǥut kenitew.
Kenè niw,
menge suled,
pemineǥa is iring dutun su wazà pulus te idawey zan su emun egkeenen tew is egkeenen ne egkeawà heini.
23 Haazà is menge etew,
henduen be te hustu is ibpenurù dan.
Egkaǥi zan he kinahanglan he ed-ezapen ta is menge velinsuǥuen te Megbevayà,
wey kinahanglan he ebminusen ta is pid-etawan ta wey kinahanglan daan he edresayen ta is lawa ta.
Ne minsan pa kayi,
kenà hustu heini is ibpenurù dan su is menge suǥù he iring kayi,
ne kenà heini ebpeketavang kenita te kedsukul te mezaat he kebayà te lawa ta.