2 Ebpesuratan ku sikiyu is menge ǥaked te Megbevayà diyan te inged he Kulusas he menge metinumanen te lalag ni Kristu.

Berakat he ikeǥaǥew kew te Amey tew he Megbevayà wey veǥayi kew zin te melinawen he kebpekesavuk.

3 Sikami,

emun id-ampù dey sikiyu,

layun key ebpeselemat diyà te Megbevayà he Amey te Nengazen tew he si Jesus tenged keniyu,

4 su nezineg dey is tudtul he mezesen is kedtuu niw ki Jesu Kristu wey zekelà layun is gaǥew niw te minsan hentei he etew he ǥaked te Megbevayà.

5 Umba mezesen is kedtuu niw wey zekelà is gaǥew niw su kenà egkeawà is perateng niw te langun diyà te langit he inteǥana keniyu te Megbevayà.

Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

6 Heini is migkaǥi he Meupiya he Tudtulanen,

pinaaǥi te kedtuu kayi,

mezakel en he menge etew ziyà te minsan hendei he inged is mibmeupiya is menge ulaula zan.

Ne kenà duen dà taman su ed-iseg ebmezakel is menge tumutuu pinaaǥi te Meupiya he Tudtulanen,

iring te layun daan ed-iseg ebmezakel is menge tumutuu ziyan te keniyu puun pa zutun te andew zengan he nezineg niw is tudtul te ǥaǥew kenitew te Megbevayà wey netuenan niw he venar iyan.

7 Impenurù keniyu heini ni Ipapras he minahal he zuma zey he suluǥuen ni Kristu.

Metinumanen sikandin te menge suǥù ni Kristu pinaaǥi te kedtavang din kenami.

8 Midtudtul zin kenami he zekelà is gaǥew niw te menge zuma tew he tumutuu tenged te mid-ulinan kew te Waǥas he Mulin-ulin.

9 Ne tenged kayi ibpenigudu zey sikiyu id-ampù puun pa zutun te andew zengan he nezineg dey is tudtul mehitenged te kedtuu niw.

Layun dey id-ampù diyà te Megbevayà he veǥayi kew zin te kegkesayud te langun he ulaula he ebpeveelan din keniyu,

he ke và dà egkeǥiya,

mehimu kew zin he mebmetau ne pinaaǥi te Waǥas he Mulin-ulin,

iveǥey zin keniyu is kegketuusi te meupiya wey mezaat.

10 Su emun ebeelan din is iring kayi,

ne human egkehimu is menge ulaula niw he zait he menge ulaula te menge etew he neǥaked te Nengazen tew,

ne egkehimu zaan he layun niw egkeveeli is egkesuatan din;

layun niw egkeulaula is minsan hengkey he menge meupiya he ulaula.

Ne layun daan ed-iseg is kegketueni niw te menge ulaula te Megbevayà.

11 Ne ibeǥey zin keniyu is dekelà he ǥehem he ebpuun te zekelà he ǥehem din,

ne tenged kayi te ǥehem layun niw egkeantus is kemereǥenan he zekelà is kelipey niw.

12 Ne kenà duen dà taman su zekelà dutun is kebpeselemat niw te Amey tew he Megbevayà tenged te kedhimuwa zin keniyu he zait he mekeambit kew zutun te langun he ibeǥey zin diyà te keniyu te menge ǥaked din he midteyawan is isip dan.

13 Midtevangan kiw te Amey tew he Megbevayà ne tenged kayi wazè kiw en maan meveyveyai te kerusireman,

14 Ne pinaaǥi kayi te Anak din,

nevelukasan kiw zin te kegkeuripen kenitew ni Setanas ne mibpesaylu kiw zin te menge ulaula tew he mezaat.

15 Heini is Anak te Megbevayà,

ne iyan kebpeǥawaǥawa te kenà egkeahà he Megbevayà.

Is Anak,

ne lavew sikandin te minsan hengkey he linimbag din

16 su pinaaǥi kandin te Anak te Megbevayà midlimbag te Megbevayà is minsan hengkey ziyà te langit wey zini te tanà,

sikan is egkeahà te etew wey is kenà egkengeahà he kedesenan he zuen dan keǥehem,

wey kebayàbayà,

wey kedhadì.

Is Anak,

mibpeveelan kandin te Amey zin he Megbevayà is minsan hengkey su wey zin meǥamit heini is minsan hengkey he linimbag din.

17 Ne elin daan ketezengan ke maan is lavew is Anak te Megbevayà su tenged te zaan en sikandin te wazè pa limbaǥa is minsan hengkey,

wey pinaaǥi kandin is hustu he kebpekesavuk wey egkengeulaula te langun he linimbag.

18 Wey tenged te iyan sikandin ebayàbayà te lawa zin,

he ke và dà egkeǥiya,

is langun he menge tumutuu kandin,

wey tenged daan te iyan sikandin ebeǥey te untung diyà te langun he menge tumutuu su iyan sikandin lavew te langun he egkengevanhew ne tenged kayi iyan sikandin lavew te minsan hengkey.

19 Ne egkesuatan te Amey tew he Megbevayà he ke hengkey sikandin,

iyan ded daan sikan is Anak din.

20 Ne egkesuatan din daan he pinaaǥi te Anak din meked-uliey te meupiya he kedepità sikandin wey is minsan hentei zini te tanà wey ziyà te langit.

Ne pinaaǥi te kedtiǥis duen te lengesa te Anak din diyà te krus egkehimu he menge emiǥu zin is minsan hentei.

21 Kenè kew zengan menge emiǥu te Megbevayà,

kekenà,

menge kuntada kew zin su layun mezaat is menge isip niw wey ulaula niw.

22 Ne minsan pa te iyan haazà,

midhimu kew ǥuntaan te Megbevayà he menge emiǥu zin pinaaǥi te kebpatey ni Kristu.

Umba mibpehimatey si Kristu su wey kew mehimu he menge etew he wazà mezaat he ulaula ne wazà igkesumbunga keniyu keuzemà emun ibpeetuvang kew zin diyà te Amey zin he Megbevayà.

23 Iyan,

kinahanglan he kenè niw engkezi is kedtuu te tutuu he tuluuwen,

kekenà,

lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen.

Heini is nekaǥi he Meupiya he Tudtulanen,

ne insangyew ziyà te menge etew ziyà te minsan hendei.

Siak si Pablo,

midsuǥù a wey ku ikesangyew is Meupiya he Tudtulanen.

24 Maambe ke ebpekeantus a ǥuntaan te merasey su iyan igkezeyzey niw.

Igkelipey ku heini su iring te kegkerasey ni Kristu edhimesazan ku en is langun he mereǥen he ibpaantus din kediey su wey mezeyzey is lawa ni Kristu,

he ke và dà egkeǥiya,

is menge tumutuu kandin.

25 Nehimu a he suluǥuen wey a meketavang te menge tumutuu.

Ne umba mibpilì a te Megbevayà su wey ku sikiyu metevangi is menge etew he kenà Hudiyu ne wey ku ikepurung ikepenudtul is Lalag te Megbevayà.

26 Ne zengan,

heini is Lalag,

ne in-eles te Megbevayà ne wazà ipezayag diyà te menge etew,

iyan,

guntaan ibpezayag din en kenitew te menge tumutuu kandin

27 su egkesuatan din he sikitew is menge ǥaked din,

ne egkesayud kiw ke hengkey is utew lavew he meupiya he edhimuwen din diyà te langun he menge etew.

Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

28 Sikami,

idsangyew zey si Kristu;

edleǥuyan dey is minsan hentei,

wey ebpenurù key kandan ebpurung sumalà is egkehimu zey he ketau su wey meketuu is langun ki Kristu,

ne wey sikandan keuzemà ikepeetuvang diyà te Megbevayà he wazà kurang te kedtuu zan.

29 Siak,

ebpenigudu a ebaal he edlig-enan te zekelà he zesen ni Kristu su wey metuman heini.