Is Kegkaǥi te Menge Kineǥiyan he Kenà Egkesavut
14
Umba,
menge suled,
kinahanglan he iyan niw ipehuna ziyà te ǥehinawa niw is kebmahala niw te menge zuma niw.
Ne meupiya zaan ke ebuyuen niw is menge ketau he ibeǥey te Waǥas he Mulin-ulin,
lavew en is kedseysaya te impesavut te Megbevayà.
2 Ne emun duen ebpintezan te kineǥiyan he kenè din egketuenan,
iyan din egkelelaǥan is Megbevayà ne kenè din iyan egkelelaǥan is menge zuma zin he etew su kenè dan egkesavut is egkeǥiyen din.
Haazà is egkeǥiyen din,
ne in-ulin kandin te Waǥas he Mulin-ulin,
iyan,
in-eles haazà su wazà ebpekesavut.
3 Iyan,
ke zuen etew he edseysayen din is impesavut kandin te Megbevayà,
menge zuma zin mulà is egkelelaǥan din ne ebpeketavang heini su egkeheǥet is kedtuu zan,
ne egkesembaǥan sikandan,
wey egkelig-enan is kebpekeantus dan te mereǥen.
4 Ne haazà is etew he egkaǥi te kineǥiyan he kenè din egketuenan,
kandin dà he ǥehinawa is egketevangan din.
Iyan,
haazà is etew he edseysayen din is impesavut kandin te Megbevayà,
egketevangan din mulà is menge zuma zin he tumutuu.
5 Egkesuatan ku pezem he ikeveǥey keniyu te langun is ketau te kegkaǥi te kineǥiyan he kenè niw egketuenan,
iyan,
utew pezem deyzey ke igkeveǥey keniyu is ketau te kedseysey te ibpesavut te Megbevayà.
Su zekelà is pulus te kedseysey te ibpesavut te Megbevayà,
kenà te kegkaǥi te kineǥiyan he kenà egketuenan,
asal,
duen ded daan pulus kayi ke zuen ebpekeluwas su zutun ebpeketavang te langun he menge tumutuu haazà is egkeǥiyen.
6 Ne penenglitan,
menge suled,
ke ebpekeuma a ziyan ne iyan dà egkeǥiyen ku keniyu is pinaaǥi zà te kineǥiyan he kenè niw egketuenan,
hengkey is pulus din?
Deyzey ke idseysey ku keniyu is impesavut kedì te Megbevayà ne emun kenà haazà,
ne kinahanglan he zuen ibpenurù ku keniyu he tuluuwen wey ke penurù be he impesavut kedì,
ne human duen pulus te egkeǥiyen ku.
7 Su penenglitan,
is menge belvelayen he edaǥing,
ke zuen ebpemulala wey ke ebpengutiyapì be,
iyan,
kenè din egketuenan is ked-epad,
ne kenà egkesavut te menge zuma ke hengkey is in-epad din.
8 Ne iring din ded daan ke zuen sundaru he edhiyup te vudyung su ibpesavut din is menge zuma zin he ebpekidtebek dan en,
iyan,
ke kenà keladu is daǥing dutun,
kenè dan egketuenan ke hengkey is ibpesavut din dutun te kedhiyup din ne kenè dan edseǥipaan.
9 Ne sikiyu zaan,
menge suled,
iring kew kayi te ebpengutiyapì wey edhiyup te vudyung su emun egkaǥi kew te kineǥiyan he wazà duen ebpekesavut,
ne wazà pulus te egkeǥiyen niw.
10 Utew medmezakel is menge kineǥiyan dini te kelibutan,
ne te kada sevaha kayi zuen ebpemekesavut.
11 Iyan,
ke zuen ebpekidlalag kedì ne kenè ku egkesavut ke hengkey is egkeǥiyen din,
ne kenà egkehimu he ebpezumehè key su kenè key edsinevutà.
12 Ne sikiyu,
menge suled,
geina te egkesuatan niw he meveǥayi kew te menge ketau he ibeǥey te Waǥas he Mulin-ulin,
kinahanglan he iyan niw vuyua is menge ketau he ebpekeheǥet te kedtuu te langun niw te menge tumutuu.
13 Ne tenged kayi,
is etew he ebpekekaǥi te kineǥiyan he kenè din egketuenan,
kinahanglan he iampù din he meveǥayi sikandin te ketau te kedluwas te egkeǥiyen din.
14 Su emun edlelaǥan ku is Megbevayà te kineǥiyan he kenè ku egketuenan,
ne egkehimu he ed-ampù a pinaaǥi te Waǥas he Mulin-ulin,
iyan,
wazà mekeseled diyà te isip ku haazà is egkeǥiyen te vèbè ku.
15 Tenged kayi egkesuatan ku he mekeampù a he ed-ulinan te Waǥas he Mulin-ulin,
iyan,
egkesuatan ku zaan he mesavut te menge zuma ku ke hengkey is egkeǥiyen ku.
Ne emun egkanta a,
egkesuatan ku he ed-ulinan a is egkanta te Waǥas he Mulin-ulin,
iyan,
kinahanglan daan he egkesavut haazà is egkentahan ku.
16 Ne penenglitan ke edalig kew te Megbevayà he ed-ulinan kew te Waǥas he Mulin-ulin,
iyan,
kenà egkesavut haazà is egkeǥiyen niw,
is etew he sikan pa edsimba,
kenà sikandin ebpekepeǥumbenar zutun te egkeǥiyen niw su kenè din egkesavut.
17 Minsan ke utew meupiya haazà is migkaǥi niw he kebpeselamati te Megbevayà,
kenà ebpeketavang te kedtuu zutun te etew.
18 Ebpeselematan ku te Megbevayà is kebpekekaǥi ku te kineǥiyan he wazà duen egketau.
Mezakel is kediey he kegemita kayi te ketau kenà is keniyu.
19 Iyan,
minsan pa zutun,
emun diyà a te ketiǥuman te menge tumutuu,
kenè ku egemiten su meupiya pa zutun is kegkeǥiya ku te minsan lelima zà he lalag he egkesavut he ebpeketavang te menge zuma ku,
kenà is kegkeǥiya te liblibuwen he menge lalag he kenà egkesavut.
20 Kinahanglan,
menge suled,
he kenà iring te ked-isip te menge vatà is ked-isipa niw kayi.
Iyan dà ulaula te vatà he meupiya he ed-iringan,
haazà is kenè dan kegketueni te ked-isip te mezaat.
Iyan,
kinahanglan he iring te ked-isip te meǥurang is ked-isipa niw kayi.
21 Su zuen insurat he Lalag te Megbevayà he edhenduen te,
“Edsuǥuen ku ziyan te keniyu te menge Hudiyu is menge etew he selakew is kineǥiyan dan su kenè dan menge zuma niw he Hudiyu.
Ibpekaǥi ku sikandan diyan te keniyu,
iyan,
minsan pa zutun te utew igkeinuinu heini,
kenè kew ebpemineg te ibpepenudtul ku kandan diyan te keniyu.”
Iyan heini Lalag te Megbevayà.
22 Ne tenged kayi egkesavut ta he heini is ketau te kegkaǥi te kineǥiyan he kenà egketuenan,
ne ibeǥey heini te Megbevayà su wey metueni te kenà menge tumutuu he ebpuun heini ziyà te Megbevayà.
Iyan,
haazà is ketau te kedseysey te impesavut te Megbevayà,
imbeǥey zin heini su wey meheǥet is kedtuu te menge etew he nemeketuu en.
23 Umba,
ke nengetiǥum is menge tumutuu wey egemiten te langun dutun is ketau te kegkaǥi te kineǥiyan he kenè dan egketuenan wey ke penenglitan duen edseled dutun he menge bisita he sikan pa meketuu wey ke kenè be tumutuu ne kunaan dan ke ebuneǥen kew.
24-25 Iyan,
ke iyan ed-ul-ulahan te langun is:
edseysayen dan is ibpesavut kandan dutun te Lalag te Megbevayà,
ne haazà is bisita,
pinaaǥi zutun te nezineg din,
egkesavut din ke hengkey is ked-isipa te Megbevayà dutun te mezaat he menge isip din,
ne egketuenan din he mekesesalè bes sikandin ne ebpekedsendit.
Ne zutun ed-ezapen din is Megbevayà ne ke sikandin diyà te keniyu te,
“Tutuu ves iyan he ed-ulinan kew te ǥehem te Megbevayà!”
Is Dait he Ed-ul-ulahan Dutun te Kegkaamur-amur te Menge Tumutuu
26 Umba,
menge suled,
ke edtiǥum kew,
iyan heini meupiya he ed-ul-ulahan.
Meupiya ke zuen sevaha he andam te kegkanta te kedalig te Megbevayà,
ne is sevaha,
ebpenurù,
ne is sevaha,
idseysey zin is impesavut kandin te Megbevayà,
ne zuen sevaha he egkaǥi te kineǥiyan he kenè din egketuenan,
ne zuen daan sevaha he edluwas kayi.
Ne minsan hengkey he ed-ul-ulahan niw zutun ne kinahanglan he ebpekeheǥet te kedtuu te menge tumutuu.
27 Ke zuen ebpemekekaǥi te kineǥiyan he kenè dan egketuenan,
ne zezuwa zà is megkaǥi,
ne emun kenà ne tetelu,
ne kenè dan mebperedredseey ne kinahanglan he zuen dutun metau he edluwas.
28 Su emun wazà ebpekeluwas dutun ne kinahanglan he wazà megkaǥi te kineǥiyan he kenà egketuenan.
Egkehimu ke egkaǥi haazà is etew ziyà te Megbevayà asal kenà edhabet,
kekenà,
diyà dà te isip din.
29 Ne iring din ded daan haazà is menge etew he edseysey te impesavut kandan te Megbevayà su egkehimu he zezuwa zà ne emun kenà ne tetelu is egkaǥi.
Ne kinahanglan he ebpemineg is langun ne ed-isipen dan ke hustu ve wey ke kenà haazà is egkeǥiyen.
30 Ne ke zuen ebpimpinuu zutun he ebpemineg ne ibpesavut kandin te Megbevayà is ibpekaǥi zin kandin,
ne kinahanglan he ed-engked egkaǥi haazà is nehuna su wey mekekaǥi haazà is duma zin.
31 Egkehimu he egkaǥi kew is langun,
asal,
kenè kew mebperedredseey ne zutun egkepenurù wey egkesembaǥan is langun.
32 Su is etew he ebpeneuven te Megbevayà,
egkehimu zin te ed-eǥen is gehinawa zin su wey kenà sikandin mekeredsà dutun te egkaǥi he iring din he ebpeneuven daan te Megbevayà.
33 Kenà egkesuatan te Megbevayà he mebperedredseey kew emun edtiǥum kew is edsimba kandin.
Su kenà iyan in-ulin kenitew is kegkeliveǥi,
kekenà,
iyan is melinawen he ulaula.
34 Ne zuen pa idtelaan ku keniyu he iyan daan ed-ul-ulahan te menge tumutuu ziyà te minsan hendei he inged.
Iyan is:
kenè niw ituǥut he zuen bahi he ebpenurù ke edtiǥum kew te kedsimba.
Mebpeninimè dan dà.
Su impenurù daan te kesuǥuan te menge Hudiyu he kenà mebayàbayà is menge vahi.
35 Ke zuen id-insà te vahi ne kinahanglan he kenè din iinsà dutun te valey he edtiǥuman,
kekenà,
iinsè din te esawa zin emun nekeulì dan en.
Su mekeeled-eled he ulaula is kegkaǥi te vahi zutun te kedtiǥum te menge tumutuu.
36 Kunaan niw vuwa ke ziyan dà ebpuun is Lalag te Megbevayà te keniyu!
Ne emun kenà,
ne kela ke kunaan niw ke iyan kew zà nepenurù te Lalag te Megbevayà.
37 Ke zuen etew he ed-isipen din he zuen ketau zin he imbeǥey te Waǥas he Mulin-ulin,
ne emun kenà,
ne zuen ibpekaǥi kandin te Megbevayà,
ne kinahanglan he ventayi zin is ibpesavut ku keniyu kayi te surat su kenà dini zà te kediey ebpuun heini he menge suǥù,
kekenà,
diyà te Nengazen.
38 Ne tenged kayi emun kenà haazà is etew ebpemineg kayi ne kenè niw zaan pemineǥa is egkeǥiyen din.