4 Ne haazà is menge ketau he ibeǥey kenitew te Waǥas he Mulin-ulin,

ne kenà ed-iiring-iring,

iyan,

sevaha zà is puunè dan he iyan is Waǥas he Mulin-ulin.

5 Ne kenà daan ed-iiring-iring is ebpeveelan te Megbevayà te kada sevaha kenitew,

iyan,

umba edtumanen tew su wey tew mepenunuat sikandin is sebsevaha zà he Nengazen.

6 Sikitew is tumutuu,

mezakel is ebpeveelan kenitew,

iyan,

iyan ed-ulin te kada sevaha kenitew is Megbevayà wey mehimu te kada sevaha is ebpeveelan kandin.

7 Ne kada sevaha kenitew te menge tumutuu,

ne zuen imbeǥey kandin he ketau he iyan tuus he mid-ulinan sikandin te Waǥas he Mulin-ulin.

Umba imbeǥey haazà diyà te kandin su wey zin metevangi is menge zuma zin he tumutuu.

8 Ne ziyà te zuma ibeǥey pinaaǥi te Waǥas he Mulin-ulin is ketau te kedseysey te tutuu he tuluuwen;

ne ziyà te zuma pa ibeǥey pinaaǥi te ǥehem te Waǥas he Mulin-ulin is ketau te kedseysey te memezalem he ibpepenurù te Megbevayà.

9 Ne ziyà te zuma pa ne ibeǥey is utew meheǥet he kedtuu ne is duma,

ne ebeǥayan te ǥehem su wey zin mevewii is menge egkengezeruwan.

Ne egkehimu zan is iring kayi su iyan gihapun ed-ulin kandan is Waǥas he Mulin-ulin.

10 Ne ziyè pa te sevaha,

ibeǥey zaan te Waǥas he Mulin-ulin is gehem wey mekehimu sikandin te menge egkengein-inuwan;

ne ziyà te zuma pa ibeǥey is ketau te kedseysaya te impesavut kandin te Megbevayà;

ne te zuma pa ibeǥey kandin is kegketueni te ed-ulin,

ke ebpuun be te Megbevayà is ed-ulin wey ke mezaat he mulin-ulin ve haazà.

Ne zuen daan menge etew he ebeǥayan te Megbevayà te ketau te kegkaǥi te kineǥiyan he kenè dan egketuenan.

Ne zuen daan menge etew he ibeǥey kandan is ketau te kedluwas duen te egkeǥiyen kayi.

11 Ne is langun kayi he menge ketau,

ne ziyà ebpuun te Waǥas he Mulin-ulin,

minsan pa kayi te wazà med-iring-iring he ketau he ibeǥey zin sumalà is gustu zin he ibeǥey ziyà te kada sevaha.

12 Ne minsan pa te kenà ed-iiring-iring is ketau he imbeǥey kenitew te kada sevaha,

nesevaha kiw ǥihapun su iring kiw te sevaha zà he lawa ni Kristu he mezakel is menge parti zin.

13 Ne sikitew is langun,

Hudiyu se kenà Hudiyu,

suluǥuen se kenà suluǥuen,

ne pudu kiw mibewtismuwan te sevaha zà he Waǥas he Mulin-ulin;

ne pinaaǥi kayi nehimu kiw en he sevaha zà he lawa,

ne mid-ulinan kiw pudu te sevaha zà he Waǥas he Mulin-ulin.

14 Is lawa te etew ne sevaha zà he lawa,

iyan,

mezakel is menge parti zin.

15 Penenglitan ke ebpekekaǥi is paa,

ne ke sikandin te,

“Kenà a parti te lawa su kenè e man belad.”

Ne minsan pa ke iyan heini egkekaǥi zin ne kenà egkehimu he kenà parti te lawa is paa.

16 Ne ke egkaǥi zaan is telinga ne ke sikandin te,

“Siak,

kenà a parti kayi te lawa su kenè e man mata.”

Ne minsan pa zaan ke iyan heini egkekaǥi zin,

parti zed gihapun sikandin te lawa.

17 Su emun ke pudu mata is lawa te etew ne kenà sikandin ebpekezineg.

Ne emun pudu telinga,

ne kenà ebpekehazek.

18 Meupiya su kenà iring dutun is kedlimbaǥa te Megbevayà su te kedlimbaǥa zin te etew,

midlimbag din dutun te lawa te etew is langun he kenà ed-iiring-iring he egkinehenglanen din sumalà is egkesuatan te Megbevayà.

19 Su wazà lawa he sevaha zà he parti.

20 Is lawa ta he midlimbag te Megbevayà,

ne mezakel he parti,

iyan,

sebsevaha ǥihapun he lawa.

21 Ne tenged kayi kenà egkehimu he egkaǥi is mata ziyà te velad te,

“Sikew is belad,

kenè ku sikew egkinehenglanen!”

Ne iring din ded daan su is ulu,

ne kenà egkehimu he egkaǥi ziyà te paa te,

“Sikew is paa,

kenè ku sikew egkinehenglanen.”

22 Su kenà egkehimu ke kenè ta egkeǥamit haazà is menge parti te lawa ta he kunaan ta ke wazè ta zuen egkeǥemitan.

23 Ne is menge parti he iring kayi,

iyan ebpurungan ta.

Ne haazà is menge parti te lawa ta he kenà meupiya ke ed-ahaan,

ne edtembunan ta te bisti.

24 Ne haazà,

kenè en pezem kinahanglan he edtembunan pa maan is parti te lawa he meupiya en he ed-ahaan.

Umba iring kayi is kebeeli te Megbevayà te lawa ta su wey ta utew mepurungi is menge parti te lawa ta he henduen be te wazè din utew pulus.

25 Midhimu te Megbevayà is menge parti te lawa ta su wey zan mesevaha ne pinaaǥi zutun ebpekedtetevangè dan.

26 Ne ke egkezeruwan is sengeparti te lawa ta ne egkesekitan is tivuuk he lawa ta.

Ne iring din ded daan ke ebpurungan is sengeparti ne igkezeyzey te tivuuk he lawa ta.

27 Iyan kehuluǥan kayi te langun is:

sikitew is menge tumutuu,

ne menge parti kiw te lawa ni Kristu.

28 Ne is tivuuk he menge tumutuu,

mibeǥayan te Megbevayà is kada sevaha te kenà ebpeked-iiring-iring he ebpeveelan din.

Iyan aney he vaal zin is:

mibpilì din is menge etew he midhimu zin he menge epustul.

Ikezuwa,

imbeǥey zin diyà te zuma is ketau te kedseysey te impesavut te Megbevayà.

Iketelu,

ne mibeǥayan din is duma he menge etew te ketau te kebpenurù te lalag din,

ne mibeǥayan din is duma te ǥehem te kebpekehimu te egkein-inuwan.

Ne is duma pa ne mibeǥayan din te ǥehem te kebewii te menge egkengezeruwan.

Ne mibeǥayan din daan is duma te ketau te kedtevangi zan te menge zuma zan.

Ne is duma pa,

ne mibeǥayan din te ketau te ked-uwita zan te menge tumutuu.

Ne is duma pa,

mibeǥayan din te ketau te kegkaǥi te kineǥiyan he kenè dan egkesavut.

29 Kenà egkehimu he is langun he menge tumutuu,

ne pudu menge epustul wey kenà egkehimu he ebeǥayan is langun te ketau te kedseysey te impesavut te Megbevayà.

Ne kenà daan egkehimu he ebpenurù is langun,

ne kenà daan egkehimu he ebeǥayan is langun te ǥehem te kebpekehimu te egkengein-inuwan.

30 Ne iring din ded daan kenà egkehimu he ebeǥayan is langun te ǥehem te kebpemawì te egkengezeruwan.

Ne kenà daan ebeǥayan is langun te ketau te kegkaǥi te kineǥiyan he kenè din egketuenan.

Ne kenà daan egkehimu he ebeǥayan is langun te ketau te kedluwasa te egkeǥiyen kayi te metau he egkaǥi te kineǥiyan he kenè din egketuenan.

31 Itaǥù niw ziyà te ǥehinawa niw he iyan hustu he ebuyuen niw ziyà te Megbevayà sikan is menge ketau he utew zekelà is pulus din.

Iyan,

duen pa paaǥi he utew pa zekelà is pulus din.