Is Ketudluanan Mehitenged te Impemuhat Diyà te Kenà Tutuu he Megbevayà
8
Ne mehitenged te insè niw ke idtuǥut be kenitew te menge tumutuu ke egkeenen tew is usa he impemuhat diyà te menge tarù he ed-ezapen,
netuenan tew te langun he heini is menge tarù he ed-ezapen ne wazè dan gehem kenitew.
Ne minsan ke netuenan ta he wazà gehem dan kenita,
egkehimu he ebpegalbu ki tenged kayi te netuenan ta emun wazà heini metueni te menge zuma ta.
Umba egkeǥiyen ku heini su kenè ki ebpeketavang te menge zuma ta pinaaǥi zà te netuenan ta,
kekenà,
pinaaǥi te ǥaǥew ta kandan.
2 Is etew he kunaan din ke zekelè en is netuenan din,
is hustu he ibpesavut pezem kandin te Megbevayà,
wazè din pa metueni.
3 Ne haazà mulà is etew he mahal ziyà te gehinawa zin is Megbevayà,
iyan sikandin kes migkaǥi te Megbevayà he ǥaked din.
4 Ne mehitenged te kegkaan te usa he impemuhat duen te menge tarù he ed-ezapen,
netuenan tew he kenè man Megbevayà is iring dutun su sebsevaha zà is tutuu he Megbevayà.
5 Mezakel utew is menge tarù he megbevayà he ed-ezapen te menge etew ne egkeǥiyen te menge etew he ziyà ed-ubpà haazà is menge megbevayà te langit wey zini te tanà,
ne edhimuwen dan he menge ziwata zan wey menge egalen dan.
6 Ne minsan pa zutun,
sikitew,
netuenan tew mulà he sebsevaha zà is kenitew he Megbevayà he iyan Amey tew he nenlimbag te minsan hengkey.
Iyan sikandin edlingahaan tew te minsan hengkey he timpu.
Ne sebsevaha zà daan is Nengazen tew he iyan si Jesu Kristu.
Pinaaǥi kandin nelimbag is minsan hengkey,
ne pinaaǥi zaan kandin mibeǥayan kiw en te veǥu en he untung.
7 Iyan,
duen menge zuma tew he tumutuu he wazà mesayud he wazà gehem te tarù he Megbevayà diyà te kandan.
Ne utew mereǥen kandan is ked-ewai zan te imbilinbilin kandan he tuluuwen mehitenged te tarù he megbevayà.
Ne emun egkaan dan te egkeenen he impemuhat,
iyan egketaǥù te isip dan he neketampu zan dutun te ked-ezapa te tarù he megbevayà.
Ne tenged kayi ebpekezezaat te ǥehinawa zan su kunaan dan ke nekesalè dan su nekekaan dan te usa he impemuhat diyà te tarù he megbevayà.
8 Ne sikitew,
netuenan tew he kenà iyan is egkeenen tew wey is kenè tew egkeenen igkesuat te Megbevayà su emun egkaan ki te usa ne wazè din pulus diyà te Megbevayà ne emun kenè ki egkaan te usa ne iring din ded daan.
9 Ne minsan pa zutun kinahanglan he purungi niw isipa heini is intuǥut en keniyu su kela ke tenged keniyu egkesanggen is kedtuu te sevaha he wazè pa sikandin mekesavut te hustu.
10 Su penenglitan,
ke zuen duma ta he wazà sikandin mekesavut te hustu,
ne sikita is nekesavut mulà,
neehè ki zin is egkaan dutun te valey he zutun ed-ezapen is tarù he megbevayà,
ne egkeuwit sikandin ne edtampu zaan sikandin he egkaan,
iyan,
egkepenulayan is isip din su kunaan din ke tutuu he ed-ezapen haazà is ed-ezapen dan dutun.
11 Ne tenged te nesavut ta he kenà tutuu he ed-ezapen haazà is mibpemuhatan,
nezeetan heini is duma ta he midlibri te silut pinaaǥi te kebpatey ni Kristu.
12 Ne emun pinaaǥi kayi te ulaula ta ebmesakit is gehinawa te menge zuma ta he tumutuu,
nekesalè ki ziyà te kandan ne nekesalè ki zaan diyà te ki Kristu.
13 Ne emun egkehimu he egkepenulayan is duma ku he tumutuu pinaaǥi te kegkaan ku te usa,
ne kenà ad maan te minsan keenu egkaan te usa.