Ruma 5

Is Kebpeked-uliey te Meupiya he Kedepità

Guntaan,

tenged te midtuu ki en ki Jesus,

mid-isip ki en te Megbevayà he metazeng he iring te wazè ki keenu mekesalà,

ne tenged kayi pinaaǥi te mid-ulaula te Nengazen tew he si Jesu Kristu melinew en is kedepitè tew te Megbevayà.

2 Tenged te kedtuu tew ki Jesus midhimu zin en he meǥeǥawi kenitew is Megbevayà.

Umba zekelà is kelipey ta su egkeperateng ta he keuzemà ebpekeambit ki te utew kegkelavew te Megbevayà.

3 Ne kenà duen dà taman su ebelesen te kelipey is menge kemereǥenan he nengeseǥazan ta su netuenan ta he pinaaǥi kayi edlumbazen ki wey ki mehimu he meinentusen.

4 Ne emun meinentusen ki,

igkesuat heini te Megbevayà,

ne emun netuenan ta he igkesuat te Megbevayà is menge ulaula ta,

ne kenà ebperis he zuen meupiya he egkeperateng ta.

5 Ne umba kenà egkehimu he kenè tew egkekuwa keuzemà is impenaad kenitew te Megbevayà su pinaaǥi te Waǥas he Mulin-ulin he imbeǥey zin kenitew,

egketuusan ta he ingkeǥaǥew ki te Megbevayà.

6 Isipa nu is gaǥew kenita te Megbevayà.

Su zutun te timpu he intelaan te Megbevayà,

hein wazà minsan hengkey he egkeulaula ta he ebpekehimu he melibri ki te silut,

mibpehimatey si Kristu he elili kenita te mesinupaken.

7 Mezelag dà buwa he zuen etew he ebpehimatey he elili te minsan metazeng he etew.

Egkehimu vuwa he zuen etew he ebpekevurut he ebpehimatey he elili te etew he meupiya is ulaula zin.

8 Iyan,

is Megbevayà mulà,

impeehè din is gaǥew zin kenitew su mibpehimatey si Kristu he elili kenitew zutun te timpu zengan te kemulu kiw pa ed-ulaula te mezaat.

9 Ne emun pinaaǥi te kedtiǥis te lengesa ni Kristu mid-isip kiw en te Megbevayà he metazeng,

wey kiw pe be kenà melibri tenged ki Kristu te silut keuzemà te Megbevayà.

10 Su zutun te timpu zengan he kemulu ki kuntada te Megbevayà,

tenged te kebpehimatey te Anak din,

nehimu ki he emiǥu zin.

Ne emun iyan haazà,

guntaan te emiǥu ki zin en,

wey ki pe be kenà mehimu he melibri keuzemà te silut tenged te nevanhew en sikandin.

11 Ne kenà duen dà taman su utew zekelà is kelipey ta tenged te ǥaǥew kenita te Megbevayà he impeehè din pinaaǥi te Nengazen tew he si Jesu Kristu,

ne pinaaǥi zaan kandin nehimu ki en he emiǥu te Megbevayà.

Is Salà wey is Gaǥew te Megbevayà

12 Umba nehimu is mezaat he ulaula zini te kelibutan su pinaaǥi te kedsupak dengan te sevaha he etew he si Adan,

ne midhimu te Megbevayà he ebpatey sikandin tenged dutun te mid-ulaula zin.

Ne tenged daan dutun nekeeneb dini te kelibutan is kemetayen.

Ne ebpatey is minsan hentei he etew su wazà minsan hentei he kenà ed-ulaula te mezaat.

13 Ne minsan pa zengan te wazè pa iveǥey te Megbevayà is kesuǥuan,

mezaat en dutun is menge ulaula te menge etew,

iyan,

geina te wazè pa is kesuǥuan,

wazè pa isipa te Megbevayà he edsilutan sikandan.

14 Ne minsan pa zutun,

puun pa te timpu ni Adan taman te timpu he zutun imbeǥey en is kesuǥuan diyà te ki Moises,

egketuusan he zuen mezaat he ulaula te menge etew su mibpematey ǥihapun is langun he menge etew.

Is ulaula zan he mezaat,

ne kenà iring dutun te mid-ulaula ni Adan su midsupak din is suǥù te Megbevayà,

iyan,

sikandan mulà,

wazè pa kesuǥuan he egkesupak dan.

Ne si Adan,

nehimu sikandin he alung te etew he ebpekeuma he iyan si Kristu.

15 Iyan,

kenè dan is dezuwa ebpeked-iring su is kedsupak dutun te sevaha,

ne kenà iring te kebmetazeng he edhimuwen te Megbevayà.

Sevaha zà he etew si Adan,

iyan,

tenged dutun te kedsupak din ebpematey is tivuuk he menusiyà.

Ne minsan pa zutun,

lavew pa he zekelà is nehimu pinaaǥi te ǥaǥew te Megbevayà su pinaaǥi te ǥaǥew te sevaha zà daan he etew he iyan si Jesu Kristu,

imbeǥey te Megbevayà is ketazeng ne midhimu zin he metazeng is utew mezakel he menge etew.

16 Ne iring din ded daan,

is nehimu ni Jesus tenged te kebmetazeng he edhimuwen te Megbevayà,

ne kenè man iring te nehimu te kedsupak te sevaha he etew he si Adan.

Su tenged te kedsupak ni Adan te kesevaha zà,

ne midhukuman is tivuuk he menusiyà he edsilutan te kemetayen.

Ne zutun te timpu he utew en mezakel is menge kedsupak te menge etew,

impaahà te Megbevayà is gaǥew zin ne midhimu zin is paaǥi wey kiw zin meisip he metazeng he iring te wazè kiw mekesupak.

17 Ne emun tenged te kedsupak dutun te sevaha zà he etew he si Adan,

ebpematey is tivuuk he menusiyà,

wey pe be kenà lavew pa he mekeinuinu is nehimu te sevaha zà daan he etew he si Jesu Kristu.

Su is minsan hentei he edawat te zekelà he ǥaǥew kandin te Megbevayà pinaaǥi ki Jesu Kristu,

ne ed-isipen sikandin he metazeng,

ne ebeǥayan sikandin te untung he wazè din pidtemanan ne ebpekehadì sikandin duma te Megbevayà.

18 Ne iring din ded daan,

egkeehè ta he tenged te sevaha he mezaat he mid-ulaula ni Adan,

nehukuman is langun he menge etew te silut,

iyan,

tenged te sevaha zaan he metazeng he mid-ulaula ni Jesu Kristu he iyan is kebpehimatey zin,

egkehimu he ed-isipen te Megbevayà he metazeng is langun he menge etew he edtuu ne ibeǥey kandan is untung he wazà pidtemanan.

19 Ne tenged te kedsupak te sevaha zà he etew nehimu is mezakel he mekesesalà,

iyan,

tenged daan te kebmetinumanen te sevaha zà he etew he si Jesus te ebpeveelan kandin te Megbevayà,

egkehimu he ed-isipen te Megbevayà he metazeng is mezakel he menge etew.

20 Ne umba imbeǥey te Megbevayà is kesuǥuan su wey med-iseg is kegketueni te menge etew te kezekelà te kedsupaka zan kandin.

Ne zutun te mid-iseg mebmezakel is menge kedsupak,

impeiseg ipezekelà te Megbevayà is gaǥew zin te menge etew.

21 Ne hein aney,

sikitew is menusiyà,

kenà egkehimu he kenè ki ebpekesalà,

ne tenged kayi ebpatey ki,

iyan,

guntaan pinaaǥi te ked-isipa te Megbevayà kenitew he metazeng,

impeehè kenitew te Megbevayà is gaǥew zin su wey kiw zin meveǥayi te untung he wazè din pidtemanan pinaaǥi ki Jesu Kristu he iyan Nengazen tew.