3 Ne hein nepawà,

nekezunggù key ziyà te Sidun,

ne si Julio,

midtulengezan din si Pablo su midtuǥutan din he mekepenumbaley sikandin diyà te menge emiǥu zin dutun wey zan meveǥayi te egkinehenglanen din.

4 Ne mid-awè key ziyà,

ne ǥeina te kenè dey egkehimu te edsinuǥung is bendes te keramag,

diyè key mebayà te zivaluy te pulu he Sipru he egkeelangan haazà is keramag.

5 Ne hein nekerapas key en te zaǥat he ziyà te uvey te menge prubinsya he Silisya wey Pempilya,

midunggù key ziyà te inged he Mira he ziyà te prubinsya he Lisya.

6 Ne zutun,

nekeahà is serhintu te sevaha he barku he tig-Elihendriya he edhendiyà te tanà he Italya ne impeuntud key zin.

7 Ne utew menaney haazà is hipanew zey ne nepipira he andew zutun ne human key mekelavey te inged he Nidu asal nereǥenan key.

Ne ǥeina te kemulu zey pa egkesinuǥung is bendes te keramag,

midhalin key te ibayà ne ziyè key mebayà te zivaluy te pulu he Krita he egkeelangan haazà is keramag,

ne midlevayan dey is beyvey he egngezanan te Salmun.

8 Ne wazè key mebpekeziyù te veyvey ne utew mereǥen is hipanew zey.

Ne hein neuǥet nekezunggù key ziyà te egngezanan te Memeupiya he Dungguan he uvey te inged he Lasya.

9 Ne ǥeina te utew en neuǥet is hipanew zey,

nesepenan key te mezaat he timpu te kedlayag su tipenguzan;

ne piligru en haazà is hipanew te barku.

Umba midsembaǥan sikandan ni Pablo te,

10 “Henduen be te zuen egkehitavù kenitew ke edlaus kiw.

Egkezeetan heini is barku wey is karga ne zuen daan ebpatey kenitew.”

11 Iyan,

is serhintu zutun,

wazè din pemineǥa haazà is sambag ni Pablo su midsarig te lalag te kepitan wey lalag te teǥiǥaked dutun te barku.

12 Ne is dungguan dutun,

kenà meupiya he edsevukan te barku emun tipenguzan.

Umba,

iyan egkesuatan te kezekelan te menge zuma zey is edlaus key en wey key mekeuma ziyà te Pinisi ke egkehimu.

Su is Pinisi,

dungguan diyà te pulu he Krita he neelangan is keramag ne zutun is meupiya he edsevukan te barku taman te egketapus haazà is tipenguzan.

13 Ne zutun ebpuun en ebpengeramag,

asal kenà mevendes he ziyà ebpuun te zapit te Libya.

Ne kunaan dan ke iyan edtuman is neisip dan,

umba midtines dan is perivatu zutun te barku ne migenat key.

Ne wazè key mebpekeziyù te veyvey te pulu he Krita.

14 Ne te wazè pa utew meuǥet dutun,

mibegyuwan key.

Nekeuma is utew mevendes he keramag he egngezanan te Ebagat.

Diyà ebpuun haazà is keramag te zapit te tanà.

15 Ne nesuǥat is barku.

Ne ǥeina te kenè en ebpekeetuvang is barku zutun te keramag,

mibpesagdan dey en ke hendei ed-uwita is barku te keramag.

16 Ne hein diyè key en te uvey te pulu he Kewda,

malù key neelangi te keramag.

Ne zutun te utew key nereǥeni,

neteǥel zey mekuwa is avang he eguyuzen te barku.

17 Mibitbit dan ne in-untud dan.

Ne zutun mibagkes dan haazà is barku te menge pisì su wey kenà mewaǥey.

Ne ǥeina te egkehandek dan su kela ke mewaǥey is barku ke mekesukung te memevavew he tanà he uvey zutun te veyvey te tanà he Libya,

ne in-awè dan is layag ne mibpesagdan dan is barku ke hendei ed-uwita te keramag.

18 Ne ǥeina te kemulu pa is bagyu zutun te mid-ilis he andew,

impuun dan impenimbag is menge karga zutun te barku su wey kenà melened.

19 Ne te mid-ilis pa zutun he andew minsan is menge himan wey menge ǥelemiten te menge terebahanti zutun te barku,

impenimbag dan en elin.

20 Ne seled te mezakel he andew wazà mebpaahà kenami is andew wey menge vituen ne wazè pa med-engked haazà is bagyu he utew mezesen.

Ne zutun wazè dey en isipa he egkelibri key pa.

21 Ne zutun,

neuǥet he wazè dey nekaan ne midhitindeg si Pablo ne migkaǥi te,

“Menge zuma ku,

angin ke mibpemineg kew te sambag ku he kenè kiw ed-awà diyà te pulu he Krita,

su kenè tew ǥeina egkeseǥazan heini is hitavù kenitew.

22 Ne edhengyuan ku sikiyu ǥuntaan he kenè kew mahandek su wazà minsan sevaha kenitew he egkepatey,

iyan dà egkezeetan heini is barku.

23 Geina te mezukilem,

is Megbevayà he iyan ed-ezapen ku,

mibpaahà kedì is belinsuǥuen din,

24 ne ke sikandin te,

‘He Pablo,

kenè ka mahandek.

Kinahanglan he ziyè ka mekeetuvang te lavew he hadì diyà te Ruma.

Ne is Megbevayà,

tenged te ǥaǥew zin kenikew,

intuǥut din daan he wazà minsan sevaha kayi te menge zuma niw he egkepatey.’

25 Umba,”

ke si Pablo,

“kenè kiw egkehandek,

su ebpekesarig a te Megbevayà he sumalà is impesavut din kediey,

iyan egkehitavù kenitew.

26 Iyan dà is idampil kiw ziyà te sengepupulu.”

27 Ne zutun te ikesepulù en wey heepat he kezukileman te ked-uuwita kenami te vagyu,

diyè key en te zaǥat he egngezanan te Miditiranyu.

Ne hein metaneb en is kezukileman,

is menge etew he ed-uwit te barku,

neisip dan he kela ke zuen en tanà diyà te uvey zey.

28 Ne tenged dutun mid-ulug dan is sevaha he perivatu ne netuenan dan he menge keluwaan dà he repa is kezalem te wahig.

Ne netegteǥaad maan dutun mid-umanan dan ne menge sepulù wey lelima zà he repa is kezalem din.

29 Ne zutun nahandek dan su kela ke mekesukung haazà is barku te menge vatu,

umba,

inhiket dan is heepat he perivatu ziyà te huziyan he zulung dutun te barku.

Ne egkesuatan dan pezem he mepawè en haazà.

30 Ne is menge terebahanti zutun te barku,

ed-ewaan key zan pezem te ebpemelaǥuy puun dutun te barku.

Impenaug dan is avang ne mid-ekalan key zan he egkaǥi zan he ebperivetuwan dan haazà is dulung he edhuna.

31 Iyan,

migkaǥi zutun si Pablo ziyà te serhintu wey menge sundaru zin te,

“Emun ed-ewaan kew te menge terebahanti kayi,

kenè kew en egkelibri.”

32 Ne zutun,

migetas te menge sundaru haazà is menge pisì he inhiket dutun te avang wey maanud haazà is avang.

33 Ne hein meǥaan en egkepawà,

midhengyuan ni Pablo sikandan is langun he megkaan dan.

Ke sikandin te,

“Sepulù en wey heepat he andew is kebpekeantus tew te kegkehandek ne wazà meselezi is getek tew te minsan hengkey.

34 Edhengyuan ku sikiyu he megkaan kew su wey kew meteǥui te zesen su wey kew melibri kayi.

Su wazà minsan sevaha keniyu he kenà egkelibri kayi te egkeulaula tew.”

35 Ne te nekaǥi ni Pablo haazà,

migkuwa te supas ne mibpeselematan din te Megbevayà ne mibpenevìtevì din ne migkaan din.

36 Ne zutun naawà is kegkeseeng dey ne langun te sikami,

migkaan key zaan.

37 Ne is kezakel zey te menge etew zutun te barku ne zezuwa key he ǥatus wey kepituwan wey heenem.

38 Ne hein nengehantey key en pudu,

intimbag dan diyà te zaǥat is karga zutun te barku he veǥas te trigu su wey mebmahagkap haazà is barku.

39 Ne hein nepawà dutun,

haazà is tanà he neuvayan dey,

wazà mekilala te menge terebahanti zutun te barku.

Neehè dan is nekesuyuk he zaǥat ne zuen dutun beyvey he pantad.

Ne neisip dan dutun he ke egkehimu,

meupiya ke igkepezunggù dan haazà is barku.

40 Ne zutun migetas dan is menge pisì he inhiket dutun te menge perivatu su wey metaǥak is menge perivatu,

ne mibpenhekad dan is menge vagkes dutun te menge vegsey he idtandang dutun te barku su egemiten dan.

Intaud dan is layag he ziyà te egkehuna he zulung su wey meuwit te keramag is barku pehendutun te tanà.

Ne zutun migenat is barku.

41 Ne nekesukung haazà is barku te mevavew he tanà ne mid-enget.

Is egkehuna he zulung kenè en egkewaleng,

iyan,

is huziyan he zulung egkerupet en te kezesen te zezekelà he menge vaǥel.

42 Ne neisip te menge sundaru he ebpenhimetayan dan is menge pirisu su wey kenè dan mekeǥaun dutun te veyvey ne kenè dan egkepeleǥuyan haazà is menge sundaru.

43 Iyan,

is serhintu,

kenè din egkesuatan he mehimetayi si Pablo ne wazè din ituǥut he mehimetayi sikandan.

Insuǥù din he med-agbur is metau he ed-emparas wey mekeǥaun,

44 ne is kenà metau he ed-emparas,

megeǥentungan te menge tabla wey te nengerupet he pengawid te barku ne medsunud dan.

Ne mid-ulaula zey haazà.

Ne sikami is langun,

nekeǥaun he wazà nekeizan kenami.