23
Ne si Pablo,
midtengtengan din haazà is nengetiǥum he menge ebmeǥurangen ne ke sikandin te,
“Menge suled,
wazà buring te zengeg ku ziyà te etuvangan te Megbevayà taman en guntaan!”
2 Ne zutun,
si Eneniyas sikan is lavew he memumuhat,
migkeǥiyan din is menge etew zutun te uvey ni Pablo he tebpia zan is bèbè din wey mesiluti sikandin.
3 Ne migkeǥiyan sikandin ni Pablo te,
“Sikew is tarù is ked-azap din te Megbevayà,
siguradu Megbevayà is edsilut kenikew.
Su sumalà is ibpenurù te kesuǥuan tew,
ebpimpinuu ka keniyan is edsusi kediey,
iyan,
edsupaken nu is kesuǥuan su insuǥù nu he tebpie e zan.”
4 Ne zutun migkaǥi is menge etew he uvey ni Pablo te,
“Maan is ed-insultuwan nu is lavew he memumuhat he mibpilì te Megbevayà?”
5 Ne midtavak si Pablo te,
“Wazà a mesayud he iyan sikandin lavew he memumuhat.
Su netuenan ku is migkaǥi te insurat he Lalag te Megbevayà he,
‘Kenè niw insultuwi is edumala keniyu.’ ”
6 Ne naahà ni Pablo he menge Sedusiyu is duma zutun te nengetiǥum he menge ebmeǥurangen,
ne is duma,
ne menge Perisiyu.
Ne tenged dutun,
mibpekezaǥing is egkaǥi te,
“Menge suled,
Perisiyu a ne Perisiyu zaan is ginikanan ku.
Iyan ketezengan ke maan is mid-uwit e zan dini te keniyu ǥuntaan is:
edtuu a he keuzemà ebenhawen te Megbevayà is menge minatey.”
7 Ne zutun te nekaǥi zin haazà,
ne is menge Sedusiyu wey Perisiyu,
nekedsumpakì dan ne nevahinbahin is langun te sikandan.
8 Umba nekedsumpakì dan su is menge Sedusiyu,
ibpenurù dan he kenà egkevanhew is menge minatey.
Egkeǥiyen dan he wazà menge mulin-ulin ne wazà daan menge velinsuǥuen he ebpuun diyà te langit.
Ne is menge Perisiyu,
edtuu zan mulà he zuen kegkevanhew wey menge mulin-ulin wey velinsuǥuen te Megbevayà.
9 Umba,
mid-iseg dan mebmeǥurub dutun is ebpevenbensaǥey.
Ne zutun midhitindeg is menge Perisiyu he menge menunudlù te kesuǥuan ne ke sikandan te,
“Wazà mezaat he netuenan dey he mibeelan kayi te etew.
Kela ke tutuu iyan he zuen mulin-ulin wey ke velinsuǥuen be te Megbevayà he mibpekidlalag kandin.”
10 Ne mid-iseg dutun is kegkesumpakì dan ne tenged dutun insuǥù te kepitan diyà te menge sundaru zin he eǥawa zan si Pablo zutun te menge etew wey iulì diyà te kutà.
Su nahandek sikandin su kela ke pitaspitasa zan si Pablo.
11 Ne zutun te kebmezukilem din,
mibpaahà ki Pablo is Nengazen tew he si Jesus ne migkaǥi te,
“Sarig ke zà su iring te impenudtul nu is kedtuu nu kedì dini te Hiruselim,
kinahanglan daan he ibpenudtul nu ziyà te inged he Ruma.”
Is Bitiyara Mehitenged te Kedhimetayi ki Pablo
12 Ne hein nepawà midtiǥum is menge Hudiyu su zuen pezem ed-ul-ulahan dan ki Pablo.
Ke sikandan te,
“Kenè kiw egkaan wey ed-inum taman te kenè tew pa egkepatey si Pablo.”
13 Ne subra te kepatan he etew haazà is menge Hudiyu he mid-uuyun-uyun he edhimatey ki Pablo.
14 Ne zutun midhendiyè dan te menge punuan he menge memumuhat wey te menge ebmeǥurangen ne ke sikandan te,
“Utew neheǥet is uyun dey he kenè key egkaan wey ed-inum taman te kenè dey pa egkepatey si Pablo.
15 Ne sikiyu wey is tivuuk he menge ebmeǥurangen,
pesurati niw is kepitan te menge sundaru he Rumanu.
Ne keǥiya niw zutun he uwita zin si Pablo zini su wey niw mepurung meimbistiga te mid-ulaula zin.
Ne sikami,
andam key su edhimetayan dey te kenè pa ebpekeuma zini.”
16 Is anak te etevey ni Pablo,
nekezineg dutun te ed-ul-ulahan dan ne midhendiyà te kutà ne midtudtulan din si Pablo.
17 Ne si Pablo,
mid-umew zin is sundaru ne ke sikandin te,
“Dumaha nu heini is kenakan diyà te kepitan su zuen egkeǥiyen din kandin.”
18 Ne haazà is sundaru,
miduma zin haazà is kenakan diyà te kepitan ne ke sikandin te,
“Kes pirisu he si Pablo,
mid-umew e zin ne migkaǥi zin kedì he ibpezuma zin kedì heini is kenakan dini te kenikew su zuen egkeǥiyen din kenikew.”
19 Ne zutun,
is kepitan,
mid-aǥak din haazà is kenakan dutun te uvey zà ne hein iyan dan dà,
mid-insà te,
“Hengkey,
Mama,
is egkeǥiyen nu kedì?”
20 Ne midtavak haazà is kenakan te,
“Is menge Hudiyu,
mid-uyun dan he keeselem,
edhengyuan ke zan he uwita nu si Pablo ziyà te ketiǥuman te ebmeǥurangen su ebpurungan dan kun ed-imbistigaha te mid-ulaula zin.
21 Iyan,
kenè nu ituǥut su zuen menge kepatan he etew he ed-eles su ed-ayan kandin.
Meheǥet is uyun dan he kenè dan egkaan wey ed-inum taman te kenè dan pa egkepatey si Pablo.
Mid-andam dan en ne iyan dà edteǥazan dan is suǥù nu.”
22 Ne zutun migkaǥi haazà is kepitan te,
“Kenè nu,
Mama,
tudtula ziyà te minsan hentei he midtudtulan a kenikew.”
Ne zutun impeulì din is kenakan.
Is Kedheteza ki Pablo Ziyà te Gubirnedur
23 Ne haazà is kepitan,
mid-umew zin is dezuwa he sineriǥan din ne ke sikandin te,
“Ipaandam niw is dezuwa he ǥatus he sundaru su edsuǥuen ku sikiyu ziyà te inged he Sisarya.
Ipezuma zaan is kepituwan pa he egkukudà wey is dezuwa pa he ǥatus he ebevangkew.
Kinahanglan he ipaandam niw sikandan taman te alas nuwibi kan te mezukilem su iyan kegenat niw.
24 Kuwa kew te menge kudà he ebpeuntuzan ki Pablo.
Ne purungi niw ventayi sikandin para wazà mehitavù kandin taman te ebpekeuma kew ziyà te ki Gubirnedur Felix.”
25 Ne mibeelan dutun te kepitan is surat he ibpeuwit din diyà te gubirnedur.
26 Ke sikandin te,
“Surat heini ni Claudio Lisyas diyà te ki Gubirnedur Felix.
Kumusta ka.
27 Heini is etew he ibpeuwit ku ziyan,
midakep te menge Hudiyu ne edhimetayan dan pezem.
Iyan,
nezineg ku he sakup sikandin te inged tew he Ruma,
umba miduma ku is menge sundaru ne mibeyaan ku ne miduma ku para kenà mehimetayi.
28 Geina te edsusiyen ku ke hengkey is insumbunga zan kandin,
mid-uwit ku sikandin diyà te ketiǥuman te menge ebmeǥurangen dan.
29 Ne zutun netuenan ku he wazè bes mezaat he ulaula zin he zait he igkepirisuwa wey igkepehimetayi kandin.
Iyan dà insumbunga kandin is kedsupaka zin te menge vetasan dan dutun te kesuǥuan dan.
30 Ne hein netuenan ku he ed-eyanan sikandin te menge Hudiyu,
neisip ku he ibpeuwit diyan.
Ne migkeǥiyan ku is menge midsumbung kandin he ziyan dan ebpekeetuvang te kenikew.”
31 Ne zutun te nepasad te kepitan haazà is surat din,
midtuman te menge sundaru is insuǥù din kandan su migkuwa zan si Pablo ne migenat dan.
Ne te iyan haazà he kezukileman nekeuma zan diyà te inged he Entipatris.
32 Ne zutun te mid-ilis he andew midlikù haazà is ebpemenhipanew he menge sundaru ne iyan dà duma ni Pablo is menge sundaru he ebpemen-untud te kudà.
33 Ne midlaus dan diyà te Sisarya ne imbeǥey zan sikan is surat diyà te gubirnedur ne impalad dan kandin si Pablo.
34 Ne mibasa zin haazà is surat ne in-insè din ki Pablo ke hendei sikandin he prubinsya mesakup.
Ne hein midtavak si Pablo te,
“Sakup a ziyà te prubinsya he Silisya,”
35 migkaǥi haazà is gubirnedur te,
“Wey ku en edsusiya is insumbunga kenikew ke ebpemekeuma is midsumbung.”
Ne zutun,
impeventayan din te sundaru si Pablo ne ziyè din isavuk te turuǥan ni Hadì Hirudis.