Hein Diyà si Pablo te Ipisu
19
Dutun te kemulu pa si Epulus diyà te Kurintu,
diyà si Pablo mebayà te menge inged he zizaya te Ipisu ne midhendiyè en maan te Ipisu.
Ne neuma zin dutun is menge sumusundan daan ni Jesus.
2 Ne mid-insaan din sikandan te,
“Hein neketuu kew ki Jesus mid-ulinan kew ve te Waǥas he Mulin-ulin?”
Ne midtavak dan te,
“Wazà.
Sikan dey pa mezineg he zuen Waǥas he Mulin-ulin.”
3 Ne ke si Pablo te,
“Hengkey he penurù is midsunud niw zutun te kebewtismuwi keniyu?”
Ne ke sikandan te,
“Iyan kes impenurù dengan ni Juan Megbebewtismu.”
4 Ne ke si Pablo maan te,
“Sikan is kebewtismu he impenurù ni Juan,
ne tuus dà te ked-iniyuǥi te mezaat he ulaula,
asal impenurù daan ni Juan te menge tig-Israyil he kinahanglan daan he medtuu zan te ed-ilis kandin he iyan si Jesus.”
5 Ne hein nezineg dan haazà is lalag ni Pablo,
mibpemebewtismu sikandan wey metueni he zuen dan upakat te Nengazen tew he si Jesus.
6 Ne zutun mibpendepenetan ni Pablo te velad din is menge purù dan,
ne mid-ulinan sikandan te Waǥas he Mulin-ulin ne netekewtekew zan mekekaǥi te menge kineǥiyan he kenè dan egkesavut.
Ne midtudtul zan is impesavut kandan te Megbevayà.
7 Menge sepulù dan wey zezuwa he menge maama.
8 Ne kada Sebadu taman te tetelu he vulan mibpekiduma si Pablo te menge Hudiyu zutun te kedsimba zan,
ne wazè din ikelenew is kebpenurù din kandan.
Mezakel is menge ketezengan he imbeǥey zin kandan wey zan meketuu te penurù din mehitenged te kedhadì te Megbevayà.
9 Ne is duma,
mezesen is gehinawa zan ne wazè dan medtuu.
Utew mezaat is menge lalag dan diyà te simbahan he idsumpalit dan te tuluuwen he imbeǥey te Nengazen tew.
Ne tenged dutun,
mid-awà si Pablo zutun ne miduma zin is nengehimu en he sumusundan ni Jesus.
Ne kada andew edtiǥumen sikandan ni Pablo ziyà te valey ni Tiranu he nehimu he tulunghaan wey zan meistudyuwi is Lalag te Megbevayà.
10 Ne seled te zezuwa he tuig iyan haazà mid-ulaula zan,
ne insangyew is Lalag te Nengazen diyà te langun he menge Hudiyu wey se kenà Hudiyu he menge meǥinged dutun te prubinsya he Asya.
Is Menge Anak ni Isiva he Midtebek te Mezaat he Mulin-ulin
11 Ne utew zekelà is menge egkengein-inuwan he mibeelan te Megbevayà pinaaǥi ki Pablo.
12 Su minsan penuwilu zà wey ke tualya he neǥamit din,
ed-uwiten dan diyà te menge egkengezeruwan wey edlelungen te mezaat he mulin-ulin ne egkengeulian sikandan.
13 Ne zuen menge Hudiyu he ebpenhipanew su ebewian dan is menge etew he edlelungen te mezaat he mulin-ulin.
Ne neisip dan is egezaman dan ebewii is edlelungen te mezaat he mulin-ulin he egemiten dan is ngazan ni Jesus.
Ne migkeǥiyan dan is mezaat he mulin-ulin te,
“Pinaaǥi te ǥehem te ngazan ni Jesus he idsangyew ni Pablo,
ewai nu en heeyan he etew.”
14 Is mid-ulaula kayi,
iyan is pitu he menge anak te lavew he memumuhat he Hudiyu he egngezanan ki Isiva.
15 Ne zutun midtavak haazà is mezaat he mulin-ulin te,
“Egkekilala ku si Jesus ne netuenan ku zaan is etew he egngezanan ki Pablo,
iyan sikiyu,
hentei kew vuwa?”
16 Ne haazà is etew he edlelungen te mezaat he mulin-ulin,
mid-urembakan din sikandan ne mibuǥel zin ne mibpemindas din is menge bisti zan.
Ne tenged dutun,
nengehandek dan ne nekepelaǥuy zan dutun te valey he nengelevasan wey nengepelian.
17 Ne is langun he menge etew he tig-Ipisu,
menge Hudiyu wey se kenà Hudiyu,
nezineg dan haazà is tudtul mehitenged dutun ne nengehandek dan ne mid-iseg is kedtahud dan te ngazan te Nengazen tew he si Jesus.
18 Ne mezakel is sikan pa memeketuu zutun he mibpenudtul zan diyà te etuvangan te langun is memezaat he menge ulaula zan he ed-iniyuǥan dan.
19 Ne sikan is ebaal te kinaagman,
mid-uwit dan is menge libru zan te kebaal te kinaagman ne mibinsulan dan dutun te etuvangan te langun.
Ne migkuwinta zan is bali zutun te menge libru.
Ne menge kelimahan he libu he elad he selapì is bali zutun.
20 Ne iring dutun he paaǥi mid-iseg wey nekeeneb is gehem te Lalag te Nengazen diyà te menge etew zutun he inged.
Is Samuk Diyà te Ipisu
21 Ne zutun,
neisip ni Pablo is edhipanew he ziyà ebayà te menge prubinsya he Mesidunya wey Gerisya pehendiyà te Hiruselim.
Ke sikandin te,
“Emun ebpekehendiyà a te Hiruselim,
ebpekelaus e pa ziyà te inged he Ruma.”
22 Ne zutun,
impehuna zin diyà te Mesidunya is dezuwa he timbang din te ebaal te ebpeveelan te Megbevayà he si Timoteo wey si Irastu.
Asal mibpetaǥak dè pa sikandin diyà te prubinsya he Asya.
23 Ne zutun,
nehitavù is dekelà he samuk diyà te Ipisu tenged te tuluuwen he imbeǥey te Nengazen tew.
24 Duen dutun etew he pandey he egngezanan ki Dimitriyu.
Ne zekelà is genansya te menge sinuhulen din te kebpemaal te menge zeisek he pemuhatà he pelata he idtahud te ziwata zan he si Diana.
25 Ne haazà si Dimitriyu,
midtiǥum din haazà is menge sinuhulen din wey is menge iring dan he pandey ne ke sikandin te,
“Menge suled,
netuenan niw he mid-uswag kiw en kayi te kebpandey tew.
26 Siguradu neehè niw wey nezineg niw en is ebeelan kayi te etew he egngezanan ki Pablo.
Egkeǥiyen din he is menge ziwata he ebeelan te etew,
kenà hustu he ed-ezapen.
Mezakel is menge etew he nemeketuu te egkeǥiyen din ne kenà dini zà te inged tew he Ipisu,
kekenà,
te tivuuk he prubinsya tew he Asya.
27 Ne tenged kayi kela ke meepesi te menge etew heini is menge vaal tew.
Ne kenà duen dà taman su is lavew he ziwata tew he si Diana,
kela ke meisip te menge etew he wazà pulus kayi te simbahan din wey egkeawà daan is kegkevantug din.
Ne iyan sikandin edsimbahan te langun he menge etew kayi te Asya wey te minsan hentei te tivuuk he kelibutan.”
28 Ne zutun hein nezineg haazà te mezakel he nengetiǥum dutun he menge etew,
utew zan nengepauk engki Pablo ne mibpememensag dan te,
“Lavew si Diana,
is edsimbahan tew te menge tig-Ipisu!”
29 Ne zutun nekeeneb is samuk te tivuuk he inged.
Ne haazà is dezuwa he zuma ni Pablo,
si Gayu wey si Eristarku he menge tigMesidunya,
midakep sikandan te menge etew ne migègaanan dan uwita ziyà te tiǥumanan te menge etew.
30 Ne si Pablo,
edseled daan pezem dutun,
iyan,
wazà sikandin tuǥuti te menge zuma zin he sumusundan.
31 Ne zuen daan menge emiǥu zin he upisyal te prubinsya he Asya.
Duen midsuǥù dan diyà te kandin su wey zan sikandin mehengyui he kenà sikandin medseled dutun te tiǥumanan.
32 Ne is menge etew zutun te tiǥumanan,
utew midekelà is kedsinamuk dan.
Ebpeked-iilis-ilis dà is ebpememensag he kenà ebpeked-iiring is ibensag dan.
Deisey zà he menge etew is netau zutun te hitavù he ingketiǥum dan.
33 Kunaan te zuma ke iyan si Alejandro nekesalà su maan is impeetuvang sikandin te menge Hudiyu.
Ne si Alejandro,
imbayew zin is belad din he tuus te zuen egkeǥiyen din he ketezengan dutun te menge etew.
34 Iyan,
hein netuenan dan he Hudiyu sikandin,
mibpememensag dan med-uman te,
“Lavew si Diana he edsimbahan tew te tig-Ipisu.”
Ne seled te zezuwa he uras is kepememensag dan dutun.
35 Ne hein neuǥet en,
is sikritaryu zutun te inged dan,
ingkepeengked din haazà is kedsinamuk te menge etew.
Ke sikandin te,
“Menge zuma ku he tig-Ipisu,
netuenan en te minsan hentei he sikitew is menge tig-Ipisu,
insarig kenitew is simbahan te lavew he ziwata he si Diana wey is edselilayen he vatu he neulug he ebpuun te langit.
36 Wazà ebpekekaǥi he kenà tutuu heini.
Umba kinahanglan he maawà is keinit te ǥehinawa niw ne engked kew is edsinamuk.
37 Mid-uwit niw zini heini is menge etew he wazè dan mekepenakew ziyà te menge simbahan tew wey wazè dan daan sumpelita is diwata tew.
38 Ne emun duen idsumbung eni Dimitriyu,
duen andew he netail para te kebpenhusey,
ne zuen daan menge etew he netail he menhuhukum.
Kinahanglan he zutun dan isumbung.
39 Ne ke zuen pa id-insè niw kinahanglan he zutun kew med-insà te netail he kegketiǥum te menge etew.
40 Su kela ke iinsà kenitew ke maan is midsinamuk kiw kayi te neulaula ǥuntaan.
Ne wazè tew ketezengan ke maan is neulaula tew heini.”
41 Ne hein nekaǥi zin haazà impeulì din is menge etew.