Is Kebpeǥuwaa ki Pedro Ziyà te Pirisuwan
12
Ne zutun he timpu,
ebpesipelahan ni Hadì Hirudis is duma he menge tumutuu ki Jesus.
2 Si Santiago,
sikan is suled ni Juan,
impetibas ni Hirudis su wey mebpatey.
3 Ne hein netuenan ni Hirudis he utew ingkesuat te menge Hudiyu is kedhimetayi ki Santiago,
impezakep din daan si Pedro.
(Nehitavù heini hein Pista te Supas he Wazè Din Tapey.)
4 Ne zutun te kegkezakep ki Pedro,
impepirisu sikandin ni Hirudis ne impalad din diyà te heepat he gurupu he menge sundaru he iyan eguwardya kandin.
Ne tig-epat he sundaru is kada gurupu.
Neisip ni Hirudis he emun egkeipus haazà is pista he egngezanan te Pista te Kedlevayi,
ed-imbistigahan din si Pedro ziyà te etuvangan te menge Hudiyu.
5 Ne tenged dutun diyà si Pedro te seled te pirisuwan he ebentayan dutun te menge sundaru.
Ne nenigudu med-ampù is menge tumutuu su edhengyuen dan diyà te Megbevayà he tevangi zin si Pedro.
6 Ne zutun te kezukileman he emun egkepawà dutun ibpeetuvang ni Hadì Hirudis si Pedro te menge etew,
ne si Pedro,
diyà ipehizeǥà te teliwazà te zezuwa he sundaru.
Midhiketan sikandin te zezuwa he kedina ne zuen daan menge sundaru he impevantey zutun te ǥemawan te pirisuwan.
7 Ne netekewtekew te zuen mibpaahà kandin he velinsuǥuen te Nengazen ne zuen daan neketayew zutun te seled te pirisuwan.
Ne migewezan dutun te velinsuǥuen si Pedro ziyà te kilid ne migunggel zin ne mibpukew zin.
Ke sikandin te,
“Enew ka gaanggaan.”
Ne zutundutun naawà is menge kedina ziyà te menge velad ni Pedro.
8 Ne migkeǥiyan sikandin te velinsuǥuen te,
“Bevakes ka wey sesepatus ka.”
Ne mibpemineg si Pedro.
Ne migkaǥi en maan haazà is belinsuǥuen te,
“Samput ka ne zuma ka kedì.”
9 Ne midsunud si Pedro kandin pehendiyà te ǥawas,
iyan,
wazè din metueni he kenè din teǥeinep dà haazà is kedtevangi kandin dutun te velinsuǥuen.
10 Ne midlevayan dan is aney en he guwardya zutun te ibayè dan ne human is ikezuwa,
ne te kebpekeuma zan dutun te lekeb he putew te pultahan he ziyà ipesinaru te inged,
netekewtekew mepuwas dà duen haazà te wazà mibpuwas duen ne migawas dan dutun.
Ne midlaus dan is dezuwa,
ne te kegketegteǥaad te kedhipanew zan ne nahanew haazà is belinsuǥuen,
ne netaǥak si Pedro zutun te sebsevaha zin.
11 Ne human mesavut ni Pedro he kenè bes teǥeinep dà haazà ne ke sikandin te,
“Tutuu ves iyan he midsuǥù te Nengazen is belinsuǥuen din ne midlibri e zin wey kenà a mekeizi te ǥehem ni Hirudis.
Nelibri ad guntaan te langun he mezaat he ed-ul-ulahan kedì he ebperetengen pezem te tivuuk he kehudiyuwan.”
12 Ne zutun te kegkesevuta zin kayi te langun,
midlaus diyà te valey ni Maria,
sikan is iney ni Juan he iyan kes Juan he ed-umawen daan ki Marcos.
Ne zutun te valey mezakel is nengetiǥum he menge tumutuu su ed-ampù dan diyà te Megbevayà.
13 Ne midteǥuktuk ni Pedro is pultahan te ibpeǥunselang dutun te lama.
Ne zuen dutun suluǥuen he vahi he egngezanan ki Ruda ne mid-ehè din su edsusiyen din ke hentei.
14 Ne nekilala zin is laǥeng ni Pedro,
iyan,
tenged te utew zin kegkesuat te kebpekeuma ni Pedro,
wazè din mepuwasi haazà su mibpelelaǥuy nasì is edlikù su ebpenudtulan din is menge zuma zin te nekeuma en si Pedro ne zutun en te ǥawas.
15 Ne migkaǥi is menge zuma zin te,
“Ebuneǥen ka!”
Iyan,
edteǥel si Ruda te,
“Kenà,
iyan en si Pedro.”
Ne ke sikandan te,
“Kenà iyan si Pedro,
kekenà,
iyan sikan is belinsuǥuen te Megbevayà he ebantey kandin.”
16 Ne wazà med-engked si Pedro he edteǥuktuk.
Ne hein mibpuwasan dan,
utew zan nengeinuinu su si Pedro en iyan haazà.
17 Ne in-uyew zin kandan he kenè dan megurub ne mibpenudtul zin kandan is paaǥi te Nengazen te kedlibriya kandin puun diyà te pirisuwan.
Ne migkeǥiyan din sikandan te,
“Tudtuli niw zaan si Santiago wey is menge zuma he suled tew.”
Ne mid-awà sikandin dutun,
ne midhendiyà te sengeinged.
18 Ne hein nepawà dutun,
utew nengeliveg is menge sundaru ziyà te pirisuwan su hendei vuwa si Pedro?
19 Impepengahà ni Hirudis,
iyan,
wazè dan sikandin maahà.
Ne impepengimbistiga zin sikan is menge guwardya ne impepenhimetayan din sikandan.
Ne zutun mid-awà si Hirudis diyà te prubinsya he Hudiya ne midtupang diyà te Sisarya ne ziyà med-ubpà.
Is Kebpatey ni Hirudis
20 Ne zutun he timpu nepeukan ni Hadì Hirudis is menge meǥinged diyà te menge inged he Tiru wey Sidun.
Mibpetavang dan ki Belastu he sineriǥan ni Hirudis he edumala te turuǥan din.
Ne nengetiǥum dan su edhendiyè dan te ki Hirudis su edhengyuan dan he maawà is pauk din kandan.
Umba mid-ulaula zan haazà su ziyè dan dà ebpekekuwa te keuyaǥan te inged dutun te hadì.
21 Ne zutun te andew he midtelaan ni Hadì Hirudis,
mid-etuvang dan kandin.
Insun-ud ni Hirudis is bisti zin te kedhadì ne mibpinuu ziyà te pinuuwè din te kedhadì ne midlelaǥan din sikandan.
22 Ne nengelipey zutun is menge etew.
Mibpengulahì dan is egkaǥi te,
“Kenà etew zà duen is egkaǥi,
kekenà,
diwata en.”
23 Ne segugunà midlatun diyà te lawa zin is daru he insavuk te velinsuǥuen te Nengazen su ingkesuat ni Hirudis haazà is ked-ezapa kandin te menge etew,
ne wazè din iyan ipaazap is Megbevayà.
Ne midtegkayan is lawa zin ne wazà utew meuǥet ne minatey.