Is Naahà ni Cornelio
10
Ne ziyà te inged he Sisarya zuen etew he kenà Hudiyu he egngezanan ki Cornelio.
Kepitan sikandin te kumpeniya te menge sundaru he Rumanu,
sikan is migngezanan te kumpeniya te menge tig-Italya.
2 Heini si Cornelio,
ne metinumanen te suǥù te Megbevayà.
Sikandin wey is tivuuk he pemilya zin,
minsan kenè dan menge Hudiyu,
ed-azap dan te Megbevayà.
Dekelà is tavang din te menge egkengeayuayu he menge Hudiyu wey layun sikandin ed-ampù diyà te Megbevayà.
3 Ne sengeandew te liwazè pa ebpenaug is andew zutun te mahapun,
mibpaahà ki Cornelio is belinsuǥuen te Megbevayà.
Ne nepurung memelmeleǥi ni Cornelio haazà.
Ne midseled dutun te valey haazà is belinsuǥuen ne migkeǥiyan din si Cornelio te,
“He Cornelio!”
4 Ne si Cornelio,
netengtengan din haazà is belinsuǥuen ne utew sikandin nahandek.
Ne ke sikandin te,
“Hengkey?”
Ne migkaǥi haazà is belinsuǥuen te,
“Midineg en te Megbevayà is ked-ampù nu ne neehè din is ketulanged nu ne kenè ke zin egkelipatan.
5 Ne ǥuntaan suǥua nu ziyà te inged he Hupi is ed-angey te etew he egngezanan ki Simon Pedro.
6 Diyà sikandin te valey te etew he egngezanan daan ki Simon he mememaal te ǥelemiten puun te lundis.
Diyà sikandin ed-ubpà te veyvey.”
7 Ne zutun mid-awà haazà is belinsuǥuen te Megbevayà.
Ne segugunà midtawag ni Cornelio is dezuwa he menge suluǥuen din wey is sundaru he sevaha zutun te menge sineriǥan din.
Ne heini he sundaru,
ed-azap daan te Megbevayà.
8 Midtudtul kandan ni Cornelio is nehitavù kandin ne midsuǥù din sikandan diyà te inged he Hupi.
Is Naahà ni Pedro
9 Ne hein neudtu te ilis he andew zutun,
diyè dan pa te zalan ne meǥaan dan en ebpekeuma ziyà te Hupi.
Ne te iyan haazà daan he timpu,
si Pedro,
mibpemenahik diyà te perenggayà he atep te valey he patag is atep din su ed-ampù te Megbevayà.
10 Ne hein netegteǥaad dutun,
nevitil utew ne egkaan pezem.
Ne te wazè pa melutù is sinuba zan,
duen impaahà te Megbevayà ki Pedro.
11 Neehè din is langit he nepuwasan ne zuen midteyuntun he iring te layag he utew meluag.
Midhiketan is heepat he kilid din ne midteyuntun.
12 Ne zutun te seled is langun he menge kelasi te keranapranap,
iring te menge langgam wey menge uled wey menge tagbis.
13 Ne zuen migkaǥi ziyà te ki Pedro te,
“He Pedro,
lapè ka wey ka mekekaan.”
14 Ne midtavak si Pedro te,
“Kenà a,
Nengazen,
su wazè e pa mekekaan te minsan hengkey he meremerik he iring keniyan su indawey te kesuǥuan.”
15 Ne mid-umanan keǥiyi sikandin te,
“Is migkaǥi te Megbevayà he meupiya,
kenè nu keǥiya he meremerik.”
16 Ne ketetelu en mesublì haazà is langun he menge lalag diyà te ki Pedro,
ne zutun,
in-ulì diyà te langit haazà is midteyuntun.
17 Ne te kemulu pa ed-is-isipa ni Pedro ke hengkey is kehuluǥan dutun te neehè din,
nekeuma zutun te inged kes menge suǥù ni Cornelio.
In-insè dan ke hendei is baley ni Simon.
Ne hein diyè dan en te ǥawas uvey te ǥemawan,
18 mibpenelehuzen dan ne mid-insè dan te,
“Duen be meǥeliyug niw he egngezanan ki Simon Pedro?”
19 Ne si Pedro zutun,
kemulu zin pa ed-isipa ke hengkey is ibpesavut te neehè din.
Ne zutun migkeǥiyan sikandin te Waǥas he Mulin-ulin te,
“Duen tetelu he etew he ebpen-ahà kenikew.
20 Gaanggaan ka penaug ne kenè ka melenew he eduma kandan su iyan a midsuǥù kandan.”
21 Ne mibpenaug si Pedro ne migkeǥiyan din sikandan te,
“Iyan a ebpen-ahaan niw.
Hengkey is tuyù niw kedì?”
22 Ne migkaǥi zan te,
“Impehendini key ni Kepitan Cornelio.
Metazeng sikandin he etew.
Ed-azap sikandin te Megbevayà,
ne telehuzen daan sikandin te langun he menge Hudiyu.
Migkeǥiyan sikandin te velinsuǥuen te Megbevayà te,
‘Ipaangey nu si Simon Pedro wey nu mezineg is ibpesavut din,’ ”
ke sikandan.
23 Ne impeseled dan ni Pedro ne impehizeǥè din sikandan te sengekezukileman.
Hein Diyà si Pedro te Valey ni Cornelio
Ne te nepawà dutun,
miduma si Pedro kandan.
Ne zuen daan miduma he menge tumutuu he tigHupi.
24 Ne nepawè pa zutun,
ne human dan mekeuma ziyà te Sisarya.
Ebpeebuten sikandan ni Cornelio ne midtiǥum din is kezuzumahi zin wey menge emiǥu zin.
25 Ne hein edseled en si Pedro zutun te valey,
midsinuǥung si Cornelio ne midluhud kandin su ed-azap.
26 Iyan,
impehitindeg sikandin ni Pedro he egkaǥi te,
“Hitindeg ka su etew e zà daan iring kenikew.”
27 Ne mibpekibitiyara si Pedro kandin dutun te edseled dan en.
Ne zutun naahà ni Pedro is mezakel he nengetiǥum dutun te valey.
28 Ne migkeǥiyan din sikandan te,
“Netuenan niw en he sikami is menge Hudiyu,
indawey kenami te tuluuwen dey is kebpekiduma wey kebpenumbaley ziyà te iring keniyu te kenà menge Hudiyu.
Iyan,”
ke si Pedro,
“impesavut kedì te Megbevayà he kenè din egkesuatan he isipa ku he meremerik is minsan hentei su edewaten din is langun.
29 Ne tenged dutun,
kayi te mibpeveyaan a keniyu,
ne wazà a melenew he edhendini.
Ne ǥuntaan tudtula niw ke hengkey is igkinehenglana niw kedì.”
30 Ne midtavak si Cornelio te,
“Heepat en he andew ǥuntaan,
te iring kayi he uras dini a te valey te liwazè en ebpenaug is andew su ed-ampù a.
Netekewtekew a te mibpaahà kedì is maama he ebpenganlag is bisti zin.
31 Ke sikandin te,
‘Cornelio,
midineg en te Megbevayà is ked-ampù nu,
ne wazè din daan melipati is tavang nu te menge etew.
32 Ne ǥuntaan ipaangey nu te menge suluǥuen nu ziyà te inged he Hupi is etew he egngezanan ki Simon Pedro.
Diyà ed-ubpà te valey te etew he Simon daan is ngazan din he mememaal te ǥelemiten puun te lundis.
Diyà te veyvey is baley zin.’
33 Umba,”
ke si Cornelio,
“segugunè ku sikew impeveyai ne selamat utew su nekeuma ka kayi.
Ne ǥuntaan nengetiǥum key en dini te etuvangan te Megbevayà su ebpemineǥen dey is minsan hengkey he insuǥù din kenikew he ipesavut kenami.”
34 Ne zutun migkaǥi si Pedro te,
“Netuenan ku en he venar iyan he wazà ibpelavi te Megbevayà te minsan hentei,
35 su is meǥinged te minsan hengkey he inged dini te kelibutan,
emun edtehuzen din is Megbevayà wey metazeng is ulaula zin,
edewaten sikandin te Megbevayà.
36 Netuenan niw en is Meupiya he Tudtulanen he impesavut te Megbevayà kenami te menge kevuwazan ni Israyil su pinaaǥi ki Jesu Kristu he iyan Nengazen te langun he menge etew,
impesavut din he egkeawà is pauk te Megbevayà kenitew.
37 Ne netuenan niw zaan kes neulaula ziyà te tivuuk he tanà te menge Hudiyu,
iyan,
dutun mebpuun te prubinsya he Geliliya,
dutun te timpu he neipus ni Juan is kebpesavut din te kebewtismu.
38 Si Jesus he tigNeserit,
mibpeulinan sikandin te Megbevayà te Waǥas he Mulin-ulin ne mibeǥayan sikandin te zekelà he ǥehem.
Ne mid-eneb din is menge inged ne meupiya is baal zin diyà te menge etew ne nengeulian din is langun he edlelungen ni Setanas.
Neveelan din heini su kenà edsuwey kandin is Megbevayà.
39 Ne sikami,
ebpekepenistiǥus key kayi su neehè dey is langun he mibeelan din diyà te langun he menge inged te menge Hudiyu wey ziyà daan te Hiruselim.
Ebpekepenistiǥus key zaan he midhimetayan sikandin te menge Hudiyu pinaaǥi te kedrensanga kandin te krus.
40 Iyan,
mibanhew te Megbevayà seled te tetelu he andew ne impaahà kenami te Megbevayà he neuyag en.
41 Te nevanhew en sikandin wazà pudu mekeahà kandin is menge etew,
kekenà,
sikami zà is menge tistiǥus he zaan he mibpilì te Megbevayà.
Sikami,
nekekaan key wey nekeinum key zuma kandin hein nevanhew en sikandin.
42 Ne insuǥù din kenami he ipesavut dey te menge etew is Lalag te Megbevayà.
Insuǥù daan ni Jesus he ibpesavut dey he iyan sikandin sikan is intezù te Megbevayà he edsusi keuzemà te menge nengeulaula te menge etew he uuyag pa wey minsan is nemematey en.
43 Netagnà si Jesu Kristu te langun he ebpemeneuven dengan te Megbevayà ne migkaǥi zan he pinaaǥi te ǥehem te ngazan din,
is langun he edsarig kandin,
ebpeseyluwen din sikandan te menge mezaat he ulaula zan.”
44 Ne te kemulu pa egkaǥi si Pedro zutun,
mibulusan te Waǥas he Mulin-ulin is langun he etew he ebpemineg dutun.
45 Is menge tumutuu he Hudiyu he nemekezuma ki Pedro,
utew zan nengeinuinu su is Megbevayà,
mibpeulinan din daan te Waǥas he Mulin-ulin is minsan menge etew he kenà menge Hudiyu.
46 Su is menge Hudiyu zutun,
nezineg dan haazà is menge kenà Hudiyu he ebpendalig te Megbevayà wey netekewtekew zan pintezi te menge kineǥiyan he wazè dan dutun hanew ke hengkey haazà is egkeǥiyen dan.
47 Ne zutun migkaǥi si Pedro te,
“Heini is menge etew he kenà menge Hudiyu,
mibeǥayan daan sikandan te Waǥas he Mulin-ulin iring te sikitew is menge Hudiyu.
Ne tenged kayi kenà egkehimu he kenà sikandan egkebewtismuwan.”
48 Ne insuǥù ni Pedro he bewtismuwi sikandan wey metueni he nekidsevaha sikandan ki Jesu Kristu.
Ne hein nepasad haazà,
si Pedro,
midhengyuan eni Cornelio he med-ubpè dè pa ziyà te kandan seled te egkepipira he andew.