Is Kebpesipelahi wey Kebpekedsusuwey te Menge Tumutuu
8
1-2 Ingkesuat utew ni Seulu is kedhimetayi zan ki Esteban.
Ne inleveng si Esteban te menge tumutuu te Megbevayà.
Utew zan ingkeseeng haazà ne midlendaǥan dan.
Ne puun dutun te andew te kebpatey ni Esteban,
is menge tumutuu,
ebpemesipelahan en sikandan te menge punuan he menge Hudiyu ziyà te Hiruselim,
ne mibpemelaǥuy zan ne nekedsusuwey zan diyà te tivuuk he prubinsya he Hudiya wey Semarya.
Iyan dà wazà mekepelaǥuy is menge epustul.
3 Ne si Seulu,
egkesuatan din he mezezeeti zin is upakat te menge tumutuu ne mezaat is ed-ul-ulahan din kandan.
Midsusi zin is kada valey ne midakep din is menge tumutuu ne mibpen-uwit din is menge maama wey menge vahi ne mibpirisu zin.
4 Ne sikan is nemekedsusuwey he menge tumutuu he nemelaǥuy,
impesavut dan diyà te menge inged is Lalag te Megbevayà.
5 Ne si Felipe,
is sevaha kayi,
ne midhendiyà sikandin te inged dutun te prubinsya he Semarya ne inwali zin diyà te menge tigSemarya ke hentei sikan is mibpilì te Megbevayà he ibpahadì.
6 Ne is mezakel he menge etew zutun,
hein nesavut dan haazà is inwali ni Felipe wey hein neehè dan is menge egkein-inuwan he mibeelan din,
mibpurung dan mebpemineg te impesavut din kandan.
7 Mezakel is nengeulian din he etew he edlelungen te mezaat he mulin-ulin ne nekekulahì is menge mezaat he mulin-ulin te ked-awè dan dutun te edlelungen dan.
Ne elin daan nengeulian din is menge piang wey mibpematey is divaluy he lawa.
8 Ne utew nengelipey is menge etew zutun he inged.
Si Simon he Selemengkiru
9 Ne zuen etew he tigSemarya he selemengkiru he egngezanan ki Simon.
Nepipira en he tuig ne kemulu zà duen igkengeinuinu te menge etew is menge vaal zin.
Impetuu zin is menge tigSemarya he kenà sikandin etew zà duen.
10 Ne mibentayan is menge lalag din te minsan hentei ziyà te Semarya,
menge lavew se kenà lavew.
Ne ke sikandan te,
“Heini is gehem he egemiten din,
gehem te Megbevayà he egngezanan te Lavew he Gehem.”
11 Umba edsundanan dan sikandin su neuǥet en is ked-uwita zin kandan pinaaǥi te menge ketau zin.
12 Ne hein impesavut ni Felipe is Meupiya he Tudtulanen te kedhadì te Megbevayà wey is gehem te ngazan ni Jesu Kristu,
neketuu zan ne sikandan is menge vahi wey menge maama,
mibpebewtismu zan,
ne minsan si Simon,
kes selemengkiru,
neketuu zutun.
13 Ne hein nebewtismuwan si Simon,
mibpekiduma sikandin ki Felipe ne neinuinu sikandin utew zutun te kegkeehaa zin te menge singyal wey menge egkengein-inuwan he edhimuwen ni Felipe.
14 Ne nezineg te menge epustul ziyà te Hiruselim he neketuu en te Lalag te Megbevayà is menge tigSemarya.
Ne tenged dutun midsuǥù dan diyà si Pedro wey si Juan.
15 Ne midhendiyè dan ne in-ampù dan he meveǥayi is menge tumutuu he tigSemarya te Waǥas he Mulin-ulin,
16 su wazè pa zutun ulini is menge tumutuu he tigSemarya te Waǥas he Mulin-ulin,
su iyan pa nehimu kandan is nebewtismuwan sikandan wey metueni he zuen dan en kebpekidsevaha ki Jesus.
17 Ne midepenetan sikandan ni Pedro wey ni Juan ne puun dutun mid-ulinan sikandan te Waǥas he Mulin-ulin.
18 Ne zutun naahà ni Simon he ed-ulinan is menge etew te Waǥas he Mulin-ulin emun egkezepenetan te zezuwa he epustul.
Ne ebeǥeyan din pezem sikandan te selapì,
19 ke sikandin te,
“Beǥayi a zaan kayi te ǥehem niw su wey a mekezepenet te etew ne egkeulinan te Waǥas he Mulin-ulin.”
20 Ne migkaǥi si Pedro te,
“Berakat he siluti ka te Megbevayà ne zèdeeti zin is selapì nu su maan is neisip nu he egkepemasa is gehem he ibeǥey te Megbevayà.
21 Wazè nu kelavet wey ketenged kayi te ebpeveelan kenami su netuenan te Megbevayà he kenà metazeng is egkeisip nu.
22 Ewaa nu ziyà te ǥehinawa nu heini is mezaat he neisip nu ne vuyù ka te pesaylu ziyà te Nengazen su kela ke peseyluwa ke zin te neisip nu
23 su neuripen ka te kegkesina ne kenè nu egkelikayan is memezaat he ulaula nu.”
24 Ne migkaǥi si Simon te,
“Iampù a keniyu te Nengazen;
hengyui niw sikandin he kenà meulaula kedì is silut he migkaǥi nu.”
25 Ne seled te nepipira he andew zutun,
si Pedro wey si Juan,
mibpenudtul zan is keaǥi ni Jesus wey impesavut dan is lalag te Nengazen.
Ne zutun mid-ulì dan diyà te Hiruselim.
Ne ziyà te imbayè dan he mezakel he menge inged te prubinsya he Semarya impesavut dan te menge etew zutun is Meupiya he Tudtulanen.
Si Felipe wey Kes Upisyal he Tig-Itiyupya
26 Ne zuen belinsuǥuen te Nengazen he migkaǥi ziyà te ki Felipe,
ke sikandin te,
“Hipanew ka ǥuntaan ne hendiyè ka te zivavà,
diyà te kersada he ed-awà te inged he Hiruselim pehendiyà te inged he Gasa,”
ke sikandin.
(Ne heini he zalan,
kenè en guntaan utew ibayà.)
27-28 Ne migenat dutun si Felipe.
Ne zuen dutun etew he tig-Itiyupya he midhendiyà te Hiruselim su edsimba te Megbevayà.
Upisyal sikandin he sineriǥan te kendaki he ke và dà egkeǥiya,
bai,
diyà te Itiyupya.
Insarig kandin te vai is langun he ketiǥeyunan din.
Ne hein ed-ulì en haazà is upisyal he ed-untud te kelisa ebesahan din sikan is libru he insurat dengan ni Esaias he ebpeneuven te Megbevayà.
29 Ne zutun migkeǥiyan si Felipe te Waǥas he Mulin-ulin te,
“Hendiyè ka ne uvayi nu heeyan is kelisa.”
30 Ne hein nekeuvey si Felipe zutun,
nezineg din haazà is upisyal he ebasa zutun te insurat ni Esaias.
Ne ke si Felipe te,
“Egkesavut nu ve heeyan is ebesahan nu?”
31 Ne midtavak haazà is upisyal te,
“Ebmenumenu a te kedsavut kayi te wazà edseysey kedì?”
Ne impeuntud din si Felipe.
32 Iyan ebesahan dutun te upisyal is insurat ni Esaias dengan he edhenduen te,
“Iring sikandin te vuutan he kerehidu
he migkuwa zan su edhimetayan.
Ne wazà migkaǥi zin su iring sikandin
te nati he kerehidu he kenà ed-erang ke ed-elutan.
33 Mid-eled-eled dan sikandin
ne kenà metazeng is kedsiluti zan kandin.
Wazà egkeǥuǥud he kevuwazan din
su mevavè dà utew is untung din
dini te kelibutan.”
34 Ne mid-insà haazà is upisyal ziyà te ki Felipe te,
“Hentei vuwa is egkeǥiyen kayi te ebpeneuven te Megbevayà?
Iyan be sikandin wey ke selakew en be he etew?”
35 Ne zutun midseysayan sikandin ni Felipe.
Midhunaan din haazà is ebesahan te upisyal ne impesavut din kandin is Meupiya he Tudtulanen te keaǥi ni Jesus.
36 Ne netegteǥaad dutun nekeuma zan te wahig,
ne migkaǥi haazà is upisyal te,
“Wahig en heini;
egkehimu ve ke ebewtismuwan a kenikew?”
37 Ne midtavak si Felipe te,
“Egkehimu emun hustu en is kedtuu nu.”
Ne midtavak haazà is upisyal te,
“Neketuu ad;
edtuuwan ku he Anak te Megbevayà si Jesu Kristu.”
38 Ne impeteren din haazà is kelisa ne mibpenaug dan is dezuwa,
si Felipe wey haazà is upisyal,
ne midhendutun dan te wahig ne mibewtismuwan sikandin ni Felipe.
39 Ne hein migaun dan dutun te wahig,
intik-ew in-awà dutun si Felipe te Waǥas he Mulin-ulin ne nahanew te ked-ahà dutun te upisyal.
Ne haazà is upisyal,
midlaus pehendiyà te inged din ne utew zekelà is kelipey zin.
40 Ne si Felipe,
diyè en maahà te inged he Asdud ne midlaus medhipanew is ebpenudtul te Meupiya he Tudtulanen diyà te langun he menge inged he ibayè din taman te nekeuma sikandin diyà te Sisarya.