Is Kebpenurù ni Juan Megbebewtismu
3
Mibpenlavey is menge tuig dutun ne zuen etew he egngezanan ki Juan Megbebewtismu.
Diyà sikandin te tanà he wazà duen ed-ubpà he etew seled te prubinsya he Hudiya.
Ne impesavut din te menge etew is Lalag te Megbevayà.
2 Ke sikandin te,
“Iniyuǥi niw is memezaat he ulaula su meǥaan en edhadì kenitew is Megbevayà he ziyà te langit.”
3 Ne si Juan,
iyan sikan is netagnà dengan ni Esaias he migkaǥi zin he,
“Duen keuzemà etew
ziyà te tanà he wazà duen ed-ubpà he etew.
Ne zutun egkezineg sikandin
te menge etew he edangep kandin is egkaǥi te,
‘Meǥaan ebpekeuma is Nengazen.
Hiǥewani niw is ibayè din;
tendanga niw is dalan he ed-ikulen din,
he ke và dà egkeǥiya,
endami niw is kebpekeuma zin.’ ”
4 Ne si Juan,
kukumbalà te midhavel he vulvul te kemilyu ne vevakes te lundis he neǥangu.
Ne terapan dà wey teneb is keuyaǥan din.
5 Ne mezakel he etew is midangep kandin he ebpemuun te inged he Hiruselim wey ziyà te zuma kayi he inged te tivuuk he prubinsya he Hudiya wey zuen daan mezakel pa he etew he ziyà ebpememuun te menge inged he uvey te wahig he Hurdan.
6 Ne haazà he menge etew,
intangdù dan is menge salè dan ne mibewtismuwan din sikandan diyà te wahig he Hurdan.
7 Ne naahà ni Juan is mezakel he etew he menge Perisiyu wey menge Sedusiyu he edhendiyà te kandin su ebpebewtismu.
Ne migkeǥiyan din sikandan te,
“Iring te ulaula te uled is ulaula niw su teruen kew.
Maan is edhendini kew?
Kunaan niw vuwa ke ebpekeǥawas kew te silut te Megbevayà.
8 Emun tutuu he mid-iniyuǥan niw en is ulaula niw he mezaat,
ipeehè niw pinaaǥi te menge meupiya he vaal niw.
9 Ne kenè niw iyan seriǥi is kevuwazan kew ni Abraham su wazà dutun pulus diyà te Megbevayà.
Su egkeǥiyan ku sikiyu he emun iyan egkinehenglanen te Megbevayà,
egkehimu he ebeelan din heini is menge vatu he kevuwazan ni Abraham.
10 Is ebpiley te kayu,
migkayew en su ebpemilayen din en is minsan hengkey he kayu he kenà meupiya is beǥas din su wey mevinsuli,
he ke và dà egkeǥiya,
is etew he kenà meupiya is ulaula zin,
edsilutan sikandin te Megbevayà.
11 Wahig is ibewtismu ku keniyu,”
ke si Juan,
“he tuus te mid-iniyuǥan niw is mezaat he ulaula,
iyan,
duen etew he ed-ilis kediey ne iyan ibewtismu zin keniyu is Waǥas he Mulin-ulin,
ne emun kenà,
ne hapuy.
Lavew sikandin kedì,
ne minsan is ked-uwit dà te sepatus din,
kenè e pa zait he suluǥuen din.
12 Geina te ibpedsivey zin te edtapid is menge metazeng wey is menge lalung he etew,
iring sikandin te ebpalid te parey he id-awè din is ukap.
Ne haazà is parey,
ederengdengen,
iyan,
is ukap,
edtutungen din diyà te hapuy he kenà egkeevukan,”
ke si Juan.
Is Kebewtismuwi ki Jesus
13 Ne zutun te timpu te kebpemewtismu ni Juan,
migenat si Jesus ebpuun diyà te prubinsya he Geliliya pehendiyà te wahig he Hurdan su ebpebewtismu ki Juan.
14 Ne si Juan,
kenà dutun egkesuat,
ne ke sikandin te,
“Iyan a zait he ebewtismuwan nu kenà te iyan ka ebpebewtismu kedì.”
15 Ne midtavak si Jesus,
ke sikandin te,
“Kenà,
su kinahanglan he ebeelan ta is iring kayi wey ta meveeli is langun he egkesuatan te Megbevayà.”
Ne zutun human mebpezumazuma si Juan,
ne mibewtismuwan din si Jesus.
16 Ne si Jesus,
hein nebewtismuwan en,
migaun dutun te wahig.
Ne zutun nepuwasan is langit ne naahà ni Jesus is Waǥas he Mulin-ulin he Megbevayà he iring te merepatik he edlugtanà diyà te kandin ne midlatun diyà te kandin.
17 Ne zutun nezineg is Megbevayà diyà te langit he egkaǥi,
ke sikandin te,
“Iyan heini Anak ku he utew ku minahal.
Utew ku sikandin igkelipey.”