A bankai Yesu ara Bilatu
27
Kain n ka wansi n kpasani,
aku gba̱ aɗara̱kpi a pige na̱ nkoshi a sheshei a kaci ka Yesu tsa̱ra̱ a wuna yi.
2 Aku a sira yi a lazai n eyi ubana ara Bilatu gomuna.
Ukpa̱ u Yahuza
3 An Yahuza uza ɗa u nekei Yesu a asu u atokulalu a ne u wenei a kiɗa̱gai Yesu ugana u ukpa̱,
aku ukuna vi u gonoi u ɓa̱la̱ yi cika.
U bidyai ikebe i azurufa kamankupa vi u gonukoi iꞌya a asu u aɗara̱kpi a pige na̱ nkoshi mi.
4 U danai,
“Unyushi u ɗa n yain u ɗa na:
N na̱ka̱ ɗa̱ vuma ɗa bawu wa̱ri n unyushi u cingi tsa̱ra̱ i wuna yi.”
Aku a wushuki,
“Ndya i birika tsu?
Ukuna u vunu u ɗa nala vi.”
5 Yahuza wacangi ikebe yi pini a Kuwa ku Kashila̱ ki,
aku u lazai u ba u vuruki kaci ka ne a maɗanga hal u kuwa̱i.
6 Aɗara̱kpi a pige yi a ta̱sa̱i ikebe yi a danai,
“U wusha ta̱ ikebe i na yi adama a mpasa n vuma.
Mele ma dana ta̱ tsa ɓolomgbono iꞌya n ikebe i Kuwa ku Kashila̱ wa.”
7 Aku a ba a tsilai uyamba u vuma roku kamai ka mgbodo tsa̱ra̱ a ciɗa̱ngusu amoci a ɗa a ka kuwusa̱ a Urishelima.
8 Ili iꞌya i zuwai a ka isa̱ asu vi “Uyamba u Mpasa” ɗa gai la vi hal utuwa̱ aꞌayin a tagara̱da na vi.
9 Ili iꞌya Irimiya matsumate u danai vi i shaɗangu ta̱:
“A bidyai ikebe i azurufa kamankupa,
ikebe iꞌya aza a Isaraꞌila a wushuki a ka tsupa yi iꞌya gai la vi.
10 A tsilai uyamba u kamai ka mgbodo n ikebe yi,
tyoku ɗa Magono ma Zuba ma tonuko mu.” a
Yesu a kapala ka Bilatu
11 A aꞌayin a nala yi,
Yesu shamgbai a kapala ka Bilatu gomuna,
aku gomuna vi u wece yi,
“Aɗa magono ma aza a Yahuda mi?”
Yesu wushunku yi,
“Nala wa̱ri tyoku ɗa vu danai vi.”
12 Shegai an aɗara̱kpi a pige na̱ nkoshi aza ɗa a ka zama yi n unyushi vi a ka dansa n eyi,
u paɗai bini.
13 Gomuna vi u tonuko yi,
“Avu pana ili iꞌya a ka dansa a kaci ka vunu ki wa?”
14 Shegai Yesu dana ili wa,
aku gomuna vi u yain majiyan cika.
A kiɗa̱gai Yesu ugana u ukpa̱
15 Kayen dem a aꞌayin a Abiki a Upasamgbana,
gomuna vi u tsu a̱sa̱ka̱ ta̱ vuma u te a asuvu a kuwa ku aꞌali,
uza ɗa ama yi a ɗanga̱sai.
16 Aꞌayin a nala yi,
vuma roku u ɗa pini a kuwa ku aꞌali ki uza ɗa a ka isa̱ Baraba.
Ya dem u reve ta̱ vuma vi vuma u cingi u ɗa.
17 An kakuma̱ ka ama ki ka ɓolomgbonoi,
aku gomuna vi u wece le,
“Vuma u eni u ɗa ya ciga a a̱sa̱nka̱ ɗa̱ a asuvu a kuwa ku aꞌali?
Ya ciga a a̱sa̱nka̱ ɗa̱ Baraba ɗa,
ko gai Yesu uza ɗa a ka isa̱ Kawauwi.”
18 Gomuna vi u reve ta̱ ama yi a tuko ta̱ Yesu ara ne adama a malyon.
19 Gomuna vi pini ndishi a asu u afada,
aku uka u ne sukunku yi akani,
u danai:
“Kotsu vu yanka vuma u nala vi ili wa,
kpaci u yan ili i roku i cingi wa.
N yan ta̱ alavutanshi a kaci ka ne ara,
kpam a ɗa a foro mu ta̱ cika.”
20 Shegai aɗara̱kpi a pige na̱ nkoshi a leshei kakuma̱ ka ama ki a da a dana u a̱sa̱nka̱ le Baraba aku a dana a wuna Yesu.
21 Gomuna vi u doku u wecei kakuma̱ ki,
“A asuvu a ama a re a na yi,
ya ya ciga n a̱sa̱nka̱ ɗa̱?”
A wushuki,
“Baraba.”
22 U wece le kpam,
“Niɗa ma yan n Yesu,
uza ɗa a ka isa̱ Kawauwi ki?”
A wushuki,
“A wandamgbana yi.”
23 U wecikei,
“Ndya i zuwai?
Ili i cingi i eni iꞌya u yain?”
A worukpoi cika,
“Wandamgbana ni.”
24 An u wenei ili iꞌa̱ la iꞌya wa yan kpam wa,
kpam ama a ka ciga ɗe a gita̱ uꞌya̱nga̱sa̱ atakasuvu a ama.
Pini nala,
u bidyai mini u sawai akere a ne a kapala ka le u danai,
“Kabirika mu n uwuna vuma u na wa,
eɗa ya yan u ɗa.”
25 Ya dem u wushuki,
“A̱tsa na̱ mmuku n tsunu a ka ka̱na̱ n unyushi u ukpa̱ u ne.”
26 Aku Bilatu a̱sa̱nka̱ le Baraba.
U zuwai asoje a bawin Yesu,
aku u na̱ka̱ le n eyi a ba a wandamgbana.
Asoje a yankai Yesu majari
27 Pini nala,
asoje a gomuna yi a bankai Yesu a asuvu a keɓile ku tsugono ku gomuna vi,
aku a kyawan yi gba̱ le.
28 A mondo yi aminya a ne a uka yi kunya ku san kpa̱ya̱ya̱.
29 A yain funi u awana a ukunka yi a kaci.
A zuwuka yi kalangu ka tsugono a kukere ku ulyaki ku ne.
A kuɗa̱ngi a kapala ka ne a ka yanka yi majari n dansi,
“Tsu na̱ka̱ vu ta̱ tsupige Magono ma aza a Yahuda.”
30 Pini nala,
a cikpunka̱ yi ata̱tsa̱.
A bidyai kalangu ki a lapusa yi n ka a kaci.
31 An a wowo yi uyanka majari,
aku a takpa yi kunya ku san ka a uka yi vi a gonoi a uka yi aminya a ne.
Pini nala,
a wutukpa̱ yi a lazai n eyi ubana a asu u ɗa a ka wandamgbana yi.
A wandamgbanai Yesu
32 Ele n a wuti,
aku a gawunsai n vuma u Sirani roku uza u kala Simo.
Asoje a ma̱tsa̱ yi u canga mawandamgbani ma Yesu.
33 Gba̱ le a rawai a asu u ɗa a ka isa̱ Golugota;
(wata,
Asu u Mako ma Kaci).
34 Asoje yi a na̱ka̱ yi mini ma cinwi ma a satarai n aguma̱ a akoni.b
An u peɗei ma,
aku u ꞌyuwain ma uso.
35 Aꞌayin a ɗa a kotso yi uwandamgbana,
aku asoje yi a yankai aminya a ne uruta.
36 Asoje a dusuki pini a asu vi a rongo yi a uwundya.
37 Zuba n kaci ka ne,
a zuwa ta̱ iryoci i ili iꞌya i zuwai a wandamgbana yi.
Ili iꞌya a korongi iꞌya na:
“YESU ƊA NA VI,
MAGONO MA AZA A YAHUDA.”
38 Asoje yi a wandamgbana ta̱ dem aza a maga̱la̱ka̱ a roku ama a re,
uza u te a kukere ku ulyaki ku ne uza u te tani a ku ugula̱ ku ne.
39 Ama ɗa a ka wura pini a asu vi a rongo yi ucira̱kpusa adama a magori.
40 A rongoi udansa,
“Vu da va wa̱sa̱ Kuwa ku Kashila̱,
aku vu doku vu mai ka a asuvu a aꞌayin a tatsu.
Adama a nala,
wauwa kaci ka vunu!
Avu Maku ma Kashila̱ ma baci,
cipa̱ pini a mawandamgbani mi!”
41 Aɗara̱kpi a pige n awenishiki a Mele na̱ nkoshi a yanka yi ta̱ dem majari.
42 A da,
“U wauwai aza roku,
shegai u fuɗa u wauwa kaci ka ne wa!
U da aya magono ma aza a Isaraꞌila!
Aya baci magono mi,
u cipa̱ pini a mawandamgbani mi wa̱ wa,
tsa̱ra̱ tsu pityanangu n eyi.
43 U pityanangu ta̱ n Kashila̱,
adama a nala a̱sa̱ka̱ Kashila̱ ka wauwa yi,
wa ciga yi baci.
U dana ta̱ dem,
‘Mpa Maku ma Kashila̱ ma.’ ”
44 Aza a maga̱la̱ka̱ a ɗa a wandamgbanai kaɓolo n eyi vi ele dem a yanka yi ta̱ kadyanshi ka gbani.
Ukpa̱ u Yesu
45 An kaara ka rawai a kaci,
aku uyamba vi gba̱ u likpa̱mgba̱na̱i n karimbi hal ubana ulapa uwule u tatsu.
46 Pini nala,
Yesu salai,
“Eloyi,
Eloyi,
lama sabaka̱tani?”
Wata,
“Kashila̱ ka va̱,
Kashila̱ ka va̱,
ndya i zuwai vu varangu mu?”
47 Aza ɗa aꞌa̱ri pini a asu vi kushani a pana̱ka yi,
aku a danai,
“Iliya ɗa wa isa̱!”
48 Kute‑kute,
uza u te u le u sumai u ba u bidyai kashaku,
u ukai ka a asuvu a mini ma kalam,
aku u sirai ka a kalangu u na̱ka̱i Yesu tsa̱ra̱ u soi.
49 Shegai aza ɗa a buwai vi a danai,
“Shamgba ve tsu wene ko Iliya vi wa tuwa̱ u wauwa yi!”
50 Pini nala,
u salai,
aku uma u ne u wuta̱i.
51 Kute‑kute,
kunya ka a ba̱ra̱kpa̱i a asuvu a Kuwa ku Kashila̱ ku karamgbanai kure,
ili iꞌya i bidyai a zuba utuwa̱ a iyamba.c
Aku likimba u gba̱ɗa̱i,
atali a ɓatsa̱sai.
52 Asaun kpam a kukpusa̱i,
ama a Kashila̱ ushani aza ɗa a kuwusa̱i a ꞌya̱nga̱sa̱i.
53 A wuta̱i a asaun yi.
An Yesu ꞌya̱nga̱i a ukpa̱,
a banai a Urishelima ilyuci i uwulukpi,
a wenikei kaci ka le a asu u ama ushani.
54 An katigi ka asoje n asoje a ɗa aꞌa̱ri kaɓolo n eyi a wenei iyamba i gba̱ɗa̱i n ili iꞌya i gita̱sa̱i,
aku a panai uwonvo,
a danai,
“Mayun ɗa,
Vuma u na Maku ma Kashila̱ ma!”
55 Aka ushani aza ɗa a wuta̱i a Galili a tonoi Yesu tsa̱ra̱ a ɓa̱nga̱ yi a shamgbusai mɓa̱ri a ka wundya mawandamgbani mi.
56 Asuvu a le alya Meri Magadaliya,
n Meri (mma u Yakubu n Isuhu),
na̱ mma u Yakubu n Yahaya mmuku n Zabidi.
Kaciɗa̱ ka Yesu
57 Vuma roku u ɗa pini uza ɗa wa̱ri n utsa̱ri cika uza u kala Isuhu u Arimatiya.
Eyi katoni ka Yesu ka.
N kuvuli ku nala ki ka u tuwa̱i a Urishelima.
58 U banai ara Bilatu u foloi a na̱ka̱ yi ikyamba i Yesu.
Bilatu tonukoi asoje a ne a na̱ka̱ yi.
59 U cangai ikyamba yi u ka̱ta̱la̱i iꞌya n kunya ku shinga.
60 U ukai ikyamba yi a kasaun ka savu ka ne ka a saɗarai a katali.
U gindala̱kpai katali ka pige u kimba̱i utsutsu u kasaun vi,
aku u lazai.
61 Meri Magadaliya n Meri ire vi a dusuki evu n kasaun ki aꞌa̱ri uwundya.
Asoje aza a uwundya a kasaun
62 An kain ka wansai;
wata,
kain ka Ashibi ka la vi,
aɗara̱kpi a pige n Afarishi a banai ara Bilatu.
63 A danai,
“Uzapige,
tsu ciɓa ta̱ aꞌayin a ɗa uza u kaɓan u nala vi wa̱ri n uma u dana ta̱,
‘A yan baci aꞌayin a tatsu,
ma ꞌya̱nga̱ ta̱ a ukpa̱.’
64 Tonuko aza a uwundya kasaun yi a wundi ka mai hal aꞌayin a tatsu.
A yan baci nala wa,
atoni a ne a ka tuwa̱ ta̱ a boko ikyamba yi,
aku a tonuko ama u ꞌya̱nga̱ ɗe.
Kaɓan ka nala ki tani ka la ta̱ ka kagita̱ ugbonguro.”