Juona Prie tu Gad
“Sieka ou mi did a sofa,
mi baal out tu di LAAD,
an im ier mi;
mi baal out fram di batam a el,
an im ier mi.
3 Yu fling mi wie dong iina di sii,
an mi singk wie dong a di batam.
Aal a yu wiev dem,
iivn yu big big wiev dem
wash uova mi.”
4 Den mi se:
“Yu ron mi we fram yu!”
Bot mi ago luk agen tu yu uoli templ.
5 Di waata kova mi so til it almuos joun mi,
sii wiid aal rap roun mi ed.
6 Mi singk go wie dong a di batam a di sii,
a di ruut a di mountn dem;
mi ton prizna iina di ort.
Mi se tu miself se:
“Mi naa go eva get out a yaso!”
Bot,
LAAD Gad,
yu tek mi out a di pit,
yu gi mi bak mi laif.
7 Wail mi laif a lef mi,
mi memba di LAAD,
an mi praiya go op tu yu iina yu uoli templ.
8 Di uol a di piipl dem we a luk tu faalz gad
a ton dem bak pan aal a di lov we Gad av fi dem.a
9 Bot mi ago tangk yu wen mi gi yu mi sakrifais.
Di speshal pramis we mi mek tu yu,
mi ago kip it.
Di LAAD a di onggl wan we kyan siev piipl.
10 Den di LAAD aada di fish fi vamit out Juona,
an di fish vamit im out pan jrai lan.