Juona
Juona a ron fram Gad
1
So nou,
Amitai bwai pikni Juona get a wod fram di LAAD we se:
2 “Gwaan dong a di big siti Ninive,
nou nou nou,
an tel dem se mi si dem a gwaan wid tumoch wikidnis.”
3 Bot Juona mek op im main fi go a Taashisha,
we did faar faar fram Ninive,
fi chrai ron we fram Gad.
Im go dong a Japa,
an fain wahn ship we a go Taashish.
So im pie im fier an go dong iina di ship fi go Taashish wid dem fi chrai go faar faar fram di LAAD.
4 Bot di LAAD jos sen wahn chrang piis a briiz pan di sii,
an it ton out iina wahn staam so chrang it shiek op di ship til it nieli mash op.
5 So den di siela-man dem kech dem fried an evri wan a dem baal out tu dem uona gad we dem sorv.
An dem staat dash we di tingz dem we dem av pan di ship fi mek it laita.
Bot aal dem taim de,
Juona did de wie dong iina di ship iina wahn diip piis a sliip.
6 Bot di kyaptin si Juona dong de an se tu im se:
“Uol aan de!
Ou yu miin fi a sliip?
Man git op an baal out tu di gad we yu sorv.
Im maita tek piti pan wi an no mek wi ded.”
7 Den evribadi se tu dem wan aneda:
“Kom mek wi jraa schraa fi fain out a uu bring dong da kraasiz ya pon wi.”
So dem jraa schraa an a Juona get di shaat wan.
8 Den dem se tu im se:
“Wi a beg yu tel wi a uu kaaz da kraasiz ya fi tek wi!
Wa kaina wok yu du?
We yu a kom fram?
Wich konchri yu kom fram?
Wich set a piipl yu bilang tu?”
9 Juona ansa dem an se:
“Mi a Iibruu an mi worship di LAAD.
Im a di Gad we ruul iina evn,
an a im mek di sii an di lan tu.”
10 Den di man dem kech dem fried bad bad,
an se tu im se:
“Ou yu fi du sitn laka dat?”
Kaaz Juona did don tel dem se im did a chrai ron we fram di LAAD.
11 So dem aks im se:
“Wa wi fi du tu yu fi mek da staam ya tap?”
Kaaz di staam did a get wosa.
12 So Juona se tu dem se:
“Chuo mi iina di sii an it wi sekl dong.
Mi nuo se a sieka mi di staam tek unu.”
13 Bot insted a dat dem chrai aad aad fi ruo di ship go lan.
Bot dat kudn apm,
kaaz di staam did a get wosara.
14 So dem baal out tu di LAAD an se:
“Du LAAD no mek wi ded kaaz wi tek da man ya laif.
No uol it gens wi LAAD,
kaaz a yu a du wa yu waahn fi du.”
15 So dem pik op Juona an chuo im iina di sii,
an di sii sekl dong.
16 So di man dem kech dem fried an staat rispek di LAAD nof nof.
Dis kaaz dem fi mek wahn sakrifais an mek som speshal pramis tu di LAAD.
17 Bot di LAAD did don lain op wahn big big fish iina di sii fi swala Juona.
An Juona en op iina di fish beli fi chrii die an chrii nait.