Juona go a Ninive
3
Den Juona get a wod fram di LAAD wahn sekan taim we se:
2 “Gwaan dong a di big siti Ninive,
nou nou nou,
an gi dem di mesij we mi gi yu.”
3 So Juona git op an go dong a Ninive,
jos laik wa di wod fram di LAAD tel im fi du.
Nou Ninive a did wahn big siti,
it tek bout chrii die fi waak chuu it.
4 Juona staat fi waak chuu di toun,
an pan di fos die,
as im a waak im a baal out:
“Unu onggl av faati die til di uol toun ton uova.”
5 Den di Ninive piipl dem biliiv Gad.
An dem kaal faastin an praiya an put aan som uol kluoz we mek out a krokos bag fi shuo se dem sari fi dem wikidnis — aal a dem,
fram di luowis wan dem tu di aiyis wan dem.
6 So wen di king fi Ninive ier bout aal we a gwaan,
im kom dong aafa im chuon,
an tek aaf im ruob,
an put aan som kluoz we mek outa krokos bag,
an im sidong iina ashiz.
7 Den im sen out aadaz tu di uol a Ninive:
“Dis a wa di king and im tap man dem se:
‘Nobadi no fi nyam notn,
dem no fi jringk no waata,
nat iivn di animal dem fi jringk aar iit.
8 Bot mek evribadi an di animal dem kova op wid krokos bag an baal out tu Gad wid aal a dem aat an suol.
Mek evribadi ton we fram dem wikidnis we dem a du an aal a dem vailens gens dem wan aneda.
9 Uu fi tel?
Gad maita chienj im main an tap im tempa fram bwail uova,
so wi no ded.’”
10 Gad si we dem a du an si se dem ton we fram dem wikidnis.
So im paadn dem an no mek di jojment tek dem we im se did ago apm.