2 Ẹphe sụ:

“Ọle ọ tọo bụkwaru nta-a,

aabọ iphe-a;

a -nọnyakwaa ọ bụru ọgu ẹghirigha.”

3 O be gẹ Jizọsu nọ lẹ Betani;

o jee ibe Sayịmonu onye ekpenta shi eme.

Noo ya;

ọ nọdukwadu l'ẹka ono eri nri;

nwanyị lanụ gudeẹpho mgbere,

ama ntụmatu bata.

Mgbere ono bẹ manụ,

eshi mkpọ,

ere ire shii,

bụ manụ-nadụ jiru ejiji.

Nwanyị ono bya akụ-kwofuẹpho olu mgbere ono bya eworu manụ ono wụa Jizọsu l'ishi.

4 Ẹhu ghuahaa ndu harụ nọdu l'ẹka ono eghu.

Ẹphe sụ:

“?Bụ gụnu bẹ e gude emebyishi ẹguru manụ ọwa?

5 Manụ ono sụru g'ee-reta iya iphe,

dụ g'ụkporo pangu lẹ pangu iri gude keshiaru ndu akpa nri.”

Ẹphe baaharụ nwanyị ono mba.

6 Jizọsu sụ phẹ:

“Unu haa ya.

 ?Bụ gụnu meru g'o gude unu nọdu epfuchi iya nchị?

 ?Unu ta amadụ l'ọo ọkpobe iphe bẹ o meru mu ẹgube ono?

7 Ndu akpa nri bẹ unu l'ẹphe anọ tekenteke;

teke dụkpoepho unu ree;

unu emeeru phẹ iphe-ọma.

Obenu lẹ mbẹdua ta abụdu tekenteke bẹ mu l'unu a-nọdu.

8 Ọo iphe,

nwanyị-a a-dụ ike mee bẹ o meru ono.

O vuwaa ụzo tee ogwẹhu mu manụ gude kwakọbe mu k'a -ta asụ teke ee-li mu.

9 Gẹ mu gbukwaaru iya unu tororo;

iphe,

bụkpoo ẹkameka,

a sarụ ozi-ọma-a lẹ mgboko-a mgburugburu bẹ aa-kọjeekwapho akọ iphe-a,

nwanyị-a meru-a gudeje nyata iya.”

10 Jiudasu Isukariyọtu,

onye lanụ l'ime ụmadzu iri l'ẹbo ono bya atụgbua jepfushia ndu-ishi uke Chileke gẹ ya deru Jizọsu ye phẹ l'ẹka.

11 Ẹphe nụmae ya phọ;

ẹhu tsọahaa phẹ ụtso.

Ẹphe kwee ya okpoga.

Ọ chọahaa ụzo,

oo-shi deru iya ye phẹ l'ẹka.

12 O rwua l'eswe,

abahụ l'ọbo-iphe,

aatajẹ buredi,

ekoduru ekoko ono,

bụ mbọku ono bẹ ẹphe egbuje nwatụru ọbo Ojeghata;

ndu etsoje Jizọsu sụ iya:

“?Bụ awe bẹ ọ dụ ngu g'anyi je edoziaru ngu g'ị nọdu ria nri ọbo Ojeghata ọbu?”

13 Ọ bya ezia ụmadzu ẹbo l'ime ndu etsoje iya nụ bya asụ phẹ:

“Unu bahụ l'ime mkpụkpu Jierúsalẹmu.

Unu -rwuẹpho ẹka ono bẹ ọ dụru nwoke,

e-vuru ite,

mini dụ byapfuta unu.

Unu tsoru iya.

14 Ẹka o jenyaaru ọ bahụ;

unu je asụ onye nwe unuphu ono l'onye ezije unu iphe sụru:

‘?Dẹnu ẹka mu a-nọdu mu lẹ ndu etsoje mu nụ ria nri ọbo Ojeghata?’

15 Oo-goshi unu ụlo-eli;

goshi unu ọma ụlo,

nọ lẹ k'eli iya;

mkpuru ono hakpọepho ọsa,

e dobechawaru oshi;

dozichawaa ya g'ọo-du;

l'a nọdu iya ria nri.

Unu bahụ ẹka ono je akwakọberu anyi nri ọbu.”

16 Ndu etsoje iya nụ tụgbua bya abahụ l'ime mkpụkpu ono.

Ọ bụerupho g'o pfuru phẹ iya bụ g'iphemiphe,

dụ.

Ẹphe nọdu l'ẹka ono kwakọbeahaa nri ọbo Ojeghata ono.

17 O be l'ụzenyashi;

yẹle ụmadzu iri l'ẹbo ono swịru bahụ l'ẹka ono.

18 Ẹphe rijeẹpho nri ono;

Jizọsu sụ phẹ:

“Gẹ mu gbukwaaru iya unu tororo;

ọ kwa onye lanụ lẹ g'unu nọ l'ẹka-a bẹ l'e-deru mu ye l'ẹka ndu achọ ishi mu;

mbụkwa onye mu l'iya tụkoru eri nri l'ẹka-a.”

19 O rwua phẹ l'obu.

Ẹphe jịahaa ya nanụ nanụ sụ:

“?Bụ mbẹdua?

 ?Tọo bụ mbẹdua?”

20 Ọ sụ phẹ:

“G'unu ha unu n'iri l'ẹbo bẹ ọ bụ onye lanụ;

onye mu l'iya yegbabẹru ẹka l'ọba-nri lanụ-a.

21 Abụbu-Ndiphe l'a-lakwa g'e deru iya l'ẹkwo-opfu Chileke.

Ọle nshịoro onye ono,

ee-shi l'ẹka iya deru Abụbu-Ndiphe ye l'ẹka ndu achọ ishi iya ono.

O gogo kakwaru onye ono ree;

ọme a ta nwụduru iya ilile.”

22 No iya;

Jizọsu bya ewota buredi bya ekele Chileke ekele g'ẹphe eri nri ono bya anyawashia ya bya anụgbaa phẹ bya asụ phẹ:

“Unu nggẹ ria.

Ọwa-a bụ ogwẹhu mu.”

23 Ọ bya ewolita okoro bya ekelekwaphọ Chileke ekele bya eworu iya nụ phẹ;

ẹphe tụko ngụa.

24 Ọ sụ phẹ:

“Ọwa-a bụ mee mu,

a gbashiru l'iswi ẹhu igwe ọha.

Chileke gude mee mu ono eme g'ọgbandzu,

shi mu l'ẹka vuru ire.

25 Sụ-a;

gẹ mu gbukwaaru iya unu tororo;

mu ta abyakwa angụbaa mẹe,

shi l'akpụru vayịnu gbiriri jasụ teke mu a-ngụ k'ọ̀phúú lẹ mgboko ọ̀phúú kẹ Chileke.”

26 Ẹphe kwechaa ebvu,

e gude aja Chileke ajaja;

bya ejeshia l'úbvú Olivu.

27 Jizọsu sụ phẹ:

“G'unu hakọta bẹ e-mechaa hakọta mu gbala;

mbụ g'e deru iya l'ẹkwo-opfu Chileke sụ:

‘Mu e-chigbu onye eche atụru;

g'atụru iya agbakashịhu.’

28 Teke e meẹrupho gẹ mu shi l'ọnwu teta dzụru ndzụ bẹ mu e-vukwaru unu ụzo jeshia Gálili.”

29 Pyịta sụ iya:

“Ndu ọphuu je l'a-hakọta ngu;

bẹ ẹphe a-hakwa ngu;

ọ kwa lẹ mbẹdua ta abyadụ aha ngu.”

30 Jizọsu sụ iya:

Gẹ mu gbukwaru ngu iya tororo;

“Ntanụ-a;

mbụkwa l'ẹnyashia bẹ oke-ọku bya ara ọ́rà ugbo labọ bẹ ị gọakwaru ugbo ẹto l'ị tị madụ mu.”

31 Pyịta kabaa ya epfushi ike sụ:

“Obetaru e je l'atụko mu lẹ ngu gbua;

mu ta abyakwa l'aha ngu ililekpọo.”

Ndu ọphuu tụko pfudzuru nno.

32 Ẹphe byarwutaẹpho l'ẹka eekuje Getusemeni;

ọ sụ ndu etsoje iya nụ:

“Unu nọdu anọo l'ẹka-a gẹ mu je epfuru yeru Chileke.”

33 O duta Pyịta waa Jiemusu waa Jiọnu ẹphe swịru tụgbua;

meji wata iya akụ photophoto;

ndzụ gụahaa ya.

34 Ọ sụ phẹ:

“Ha;

ẹgube ọwa!

Meji akụekwa mu phọ photophoto;

mbụ lẹ meji abyaakwaa mu atọfu.

Unu nọdukwa l'ẹka-a che nche.”

35 O jeribeẹrupho nwanshịi;

ọ daa kpurumu l'alị wata epfu anụ Chileke sụ g'a maru:

 ?oo-kwe g'iphe-ẹhuka kẹ nwa teke ono ta abyapfuta iya.

36 Ọ sụ:

“Nna;

Nna;

ọo ngu bụ onye a-dụ ike mekọta iphemiphe;

nafụnu mu okoro iphe-ẹhuka ọwa-a!

Ọle ọ kwa g'ọ tọ bụkwa iphe,

dụ mu l'uche l'e-me;

g'ọ bụkwaru iphe,

dụ gụbedua l'uche.”

37 Ọ byatashia;

Pyịta phẹ nọdu ekuwaa mgbẹnya.

Ọ sụ Pyịta:

“Sayịmonu!

 ?Iiku mgbẹnya?

 ?Tị dụdu ike nwụru ẹnya chefua nche awa lanụ?

38 Unu nwụru ẹnya;

pfuru nụ Chileke g'o to kwe g'unu nmalahụ l'ọhutama.

Mma nemadzụ bẹ ọ nọdujekpokwaa evushi evuvu ike;

obenu lẹ nemadzụ l'onwiya bẹ ike ta adụdu.”

39 Ọ tụgbukwaa ọzo bya ejekwa awata epfu anụ Chileke epfukwa iphe-a,

o shihawaa pfua.

40 Ọ bya alwaphutakwa azụ byatashikwa;

ẹphe nọdu ekukwaphọ mgbẹnya;

kẹle mgbẹnya jiru phẹ ẹnya ejiji;

ọphu ẹphe amadụ iphe,

ẹphe e-pfuru iya.

41 Ọ byapfutakwa phẹ phọ k'ugbo ẹto;

ọ sụ phẹ:

“?Unu nọkpoepho lẹ mgbẹnya g'unu nọ iya?

 ?Unu nọkpokwadaa lẹ nwatụta unme unu ọbu?

Ọ dụwaa ree nta-a.

O rwuwaru.

Abụbu-Ndiphe bẹ aabyaakwaa ederu ye l'ẹka ndu eme iphe-ẹji.”

42 “Unu gbẹshikwa g'anyi je.

Unu lekwa l'onye ọbu,

e-deru mu ye ọbu byaakwaru.”

43 Tọbudu iya bụ;

o gudekwadụa iphe ono l'ẹka epfu;

Jiudasu onye yịkwa-a l'ụmadzu iri l'ẹbo ono,

l'etsoje iya nụ-a byawa.

Yẹle igwe ọha swịwaru.

Ẹphe pagbaarụ mma mẹkpoo mgbọro.

Ndu ziru phẹ nụ bụ ndu-ishi uke Chileke mẹ ndu ezije ekemu mẹ ndu bụ ọgerenya.

44 Onye ono,

eme g'o deru iya ye phẹ l'ẹka onoya pfuwaru phẹ iphe,

ya e-me g'ẹphe gude maru onye ọphu ọ bụ.

Ọ sụhawaru phẹ:

“Ọo onye mu e-jepfu je etsutsua ọnu bụ onye ọphu ọ bụ.

Unu kpụta iya gude tụgbua;

unu eche iya nche ree.”

45 Abyarwuta,

Jiudasu abyarwuta;

o jepfu Jizọsu je asụ iya:

“Ọnyibe!”

Bya anma iya akpa tsutsua ya ọnu l'asha.

46 Ndu ono je azụpyabe Jizọsu;

kpụru iya tụgbua.

47 Onye lanụ,

pfụru lẹ mgboru phẹ l'ẹka ono mịepho mma iya swaramụ;

gbua nwokoro onye-ishi ndu-ishi uke Chileke;

pafụ iya nchị.

48 Jizọsu sụ ndu byaru iya egude:

“?Unu chịgbaa mma;

chịru mgbọro abya mu egude?

 ?Mu bụ onye ana nfụ?

49 Mu l'unu shikpọo anọduje mbọku-mbọku l'eze-ụlo Chileke;

ẹka mu ezi unu iphe;

ọphu unu egudekpọdaaru mu.

Ọle ọo g'iphe,

e deru l'ẹkwo-opfu Chileke mee g'e deru iya.”

50 Ndu etsoje iya nụ tụko parụ iya haa gbakashịhu.

51 Ọ dụru nwokorọbya lanụ,

tsoru Jizọsu.

Ẹbe ọ dụdu iphe,

o yeru l'ẹhu;

gbahaẹpho ẹkwa ọchaa,

ọ gbaphuru onwiya l'ẹhu.

E meahaa g'e gude iya.

52 Ọ parụ ẹkwa ọchaa ono haarụ phẹ;

kwofu gbaru ọto gbalaa.

53 Noo ya;

ẹphe kpụta Jizọsu kpụjeru onye-ishi ndu-ishi uke Chileke.

Ndu-ishi uke Chileke;

mẹ ndu bụ ọgerenya;

mẹ ndu ezije ekemu bya edzugbua.

54 Pyịta nọdu etso iya ụzenya ụzenya bya etsoru phẹ bahụ l'ibe onye-ishi ndu-ishi uke Chileke ono.

O je anọdu anọo l'ẹka ndu nche nọ;

nyaahaa ọku.

55 Ndu-ishi uke Chileke mẹ ndu ọgbo-ikpe ono g'ẹphe ha chọahaa iphe,

ẹphe a-sụ lẹ Jizọsu meru;

g'ee-shi kpee ya mpfugbu;

ọphu ọ dụdu iphe,

ẹphe hụmaru,

o meru.

56 A dụkpoo igwerigwe gude ibo gbaa ya ekebe;

ọphu ekebe phẹ adagbajẹdu.

57 Ndu agbẹshi dzụahaa ụka sụ:

58 Anyịbedua nụmakpooru lẹ nchị anyi l'ẹka oopfu sụ:

“Mu e-mebyishi eze-ụlo Chileke ọwa-a,

bụ nemadzụ gude ẹka kpụa ya-a;

l'ime abalị ẹto;

mu akpụa ọzo,

ete egudedu ẹka kpụa.”

59 Ọphu ekebe phẹ adakọtakwarupho l'ono.

60 Onye-ishi ndu-ishi uke Chileke bya agbalihu l'edzudzu-ọha ono bya ajịa Jizọsu sụ:

“?Tii yedu ọnu l'iphe,

bụ ekebe ọwa-a,

ẹphe agbagbaa ngu-a?”

61 Ọphu o pfuduru opfu;

ọ nọkirishiepho nwadoo.

Onye-ishi uke ono jịa ya ọzo sụ iya:

“?Bụ ngu bụ Kéreshi ọbu?

 ?Ị bụ Nwa Onye ono,

a gọru Ọnu-ọma nụ ono?”

62 Jizọsu sụ iya:

“Ee;

ọo mu bụ iya.

E -mechaa bẹ unu a-hụmakwaa Abụbu-Ndiphe l'ẹka ọ nọ l'ẹkutara Chileke,

bụ Ọkalibe-Kakọta-Ike.

Unu ahụmakwa iya phọ l'ẹka ọ nọ l'urwukpu shi l'imigwe abya.”

63 Onye-ishi ndu-ishi uke Chileke ono woru uwe nkiya zijaa sụ:

“?Bụbahunaa ekebe gụnu ọzo bẹ anyi achọkwadu?

64 ?Unu nụmawaru epfubyishi,

oopfubyishi Chileke?

 ?Bụ gụnu bụ ikpe unu?”

Ẹphe tụko nmaa Jizọsu ikpe ọnwu sụ:

“Iphe,

gbaru iya nụ bụ ọnwu.”

65 Ẹphe vụahaa ya ọnu-mini;

woru iphe kechia ya ẹnya;

chiahaa ya ẹchachi;

sụ iya:

“Pfunaa mpfuchiru ọbu!”

Ndu nche kpụta iya awagọ iya ẹka.

66 Gẹ Pyịta nọro l'etezi l'ụlo-ikpe ono;

onye lanụ l'ime ụnwumgboko,

ejeru onye-ishi uke ono ozi ghatashia;

67 bya ahụma Pyịta l'ẹka ọonya ọku;

bya elee ya ẹnya sụ iya:

“Ị yịkwa lẹ ndu etsoje nwọphu Nazaretu;

mbụ Jizọsu!”

68 Ọ gọfu sụ iya:

“O to dokwaru mu ẹnya!

Mu ta amakwa iphe,

iipfu.”

Ọ lụfu l'ẹka ono mbụ Pyịta;

je anọdu l'ọnu ọguzo.

Oke-ọku raa ọ́rà.

69 Nwamgbọko ono hụmakwa iya ọzo bya awatakwa epfuru ndu pfụru lẹ mgboru ẹka ono sụ phẹ:

“Nwoke-a yịkwa lẹ ndu etsoje Jizọsu.”

70 Pyịta gọfukwa ọzo.

Ọ nọepho nwanshịi;

ndu pfụgbaru lẹ mgboru ẹka ono sụ Pyịta:

“Ị yịchaa ya-a.

 ?Tị bụdu onye Gálili?”

71 Ọ wata eri angụ sụ gẹ Chileke gbukwaa ya ilu mẹ ọ -bụdu ire-lanụ bẹ ya epfu ono;

sụ:

“Mu ta amakwa onye ono,

unu epfu opfu iya ono.”

72 Oke-ọku raa ọ́rà teke ono teke ono k'ugbo ẹbo.

Pyịta nyata gẹ Jizọsu pfujeru ono sụ:

“Oke-ọku bya ara ọ́rà ugbo labọ bẹ ị gọakwaru ẹgo ugbo ẹto l'ị tị madụ mu.”

Ọ raahaa ẹkwa.