Kahete hanigein u ranga
3
A matsi hahatoulana,
möa tu riri sileiam tegona hihatuts menami limiou a markato a nigana tere Sunahan.
Taraha,
e Sunahan ena tara hatagala koru noa romana tara pala te hatuts raier u katuun,
tegi hihatuts homi uaien.
2 Te antunan hakui nena a töa katuun a rungnen batema ranga nanei ta ka ta omi,
a katuun teka te antunan hakui haniga hasena a peisanen hoboto.
3 Ara e tatei hakera a leten laslas i runguna a hos bate hakuiera a tuenreinen hoboto temar ngil uarara.
4 Na tolaala has.
A tolaala pan e la mena a lomolomo a tagala,
kaba a tson tou e tou mena neien ime te ngil uanen tara pöata te kui noahase nen a hosen tou a tetenei.
5 Na miana a katuun e kato has uana iesana.
U mia,
nonei a makum a tetenei turu tuenrei hoboto,
kaba nonei e tatei ranga sesei nena a manka man kapan.
U tula u tetenei e tatei haatsena a latu pan.
6 Na u mia i tarara e kato has uana turu tula.
Nonei a töa puku a makum turu tuenrei,
kaba u mia i tarara e antunan kato homi pouts has ranoura,
na ra e tatei kato homi pouts hasera a peisarara.
Ara e antunan kato homiera a nikaka hoboto i tarara te ranga homi uana u mia i tarara.
U mia e kato uana tara han a omi i hel te haranga rena u katuun u omi ba nori te ranga homi nitöar,
e here nei u tula pan te roron habutena u tana u tula u parpara.
7 A katuun e antunan haleneiena a manka a man tötöa hobotora i puta,
na nonei e halena hakapa hasir a mankana i latu,
na u apena,
na manka te sil na turu tsiktsiki,
na u iena.
8 Kaba e möa ta katuun tego antunan kato halena a mianen bate ranga haniga nitöana.
U mia e ranga papala tununa.
Nonei e kato herenei a kökötsi a matuna te hihikotona.
9 A mia rara e ranga hanigana na e ranga homi hasina.
Ara e ranga haniga nera e Tamarara a Tsunono,
na ra e ranga homi has nera a katuun,
e Sunahan te kato here naia a katuun a peisanen.
10 U ranga u niga na u ranga u omi e butuna turu töa u mia.
A matsi hahatoulana,
a ka teka ema niga nei.
11 U ramun u angata na u ramun u mal e tatei butu nama tara töa kiou?
E möa.
Na u tasi ema tatei habutu hase nei u ramun u angata.
12 Na huana u kutu e antunan pusukuna turu ruein kakau?
E möa tala.
Na huanu kakau ema butu has neia turu uele.
Na te markato has uana u mia.
U hakats u nigana iasa
13 Te kana a katuun te hakats hanigana i gusumilimiou,
nonei ega kato haniga has.
Nonei e tatei kato hateteneiena a peisanen bate haröto nena a markato a niga i tanen te butu nama turu hakats u niga.
14 Kaba te tori homi koru na mialimiou a taina katuun ba limiou te hakats nemiou a peisa milimiou peisa,
alimiou e gamo ramiou u katuun bate poeiemiou,
“Alia a katuun a niga na lia e hakats hanigagu.”
15 U mar hakats teka ema butu nameia iasa.
E möa.
E butuna i puta.
Ema markato uanei te hakats uana u namnamei u niga.
E kato uana te hakats uana e Satan.
16 Pöata te hiomi ria u katuun bate hakats ner a peisaren peisa,
a nitutu na mamana mar niomi e butuna i gusuren.
17 Kaba a torina a katuun te kamena u hakats u nigana iasa e gogosona bate roron nolo pouts has rena a palai te hiaraharahar.
Nonei a katuun a kakamoto na e hahengona tara tana katuun.
Nonei e taatagi koru silena a katuun na e ka mena a markato a niga.
Nonei e atei silena ime tega markato uaien,
na nonei ema gamoe nei a tana katuun.
18 A katuun te roron nolo pouts rena a palai te hiaraharahar e kato uana tara katuun te lebeiena a kannou bate lue nou a hua i tanen i murimuri.
Taraha,
nonei a katuun teka e nolo pouts rena u katuun bate nigana i matana e Sunahan,
na nonei e taguhu rena a palai ba nori te kato has uar iesana.