Ngil hoboto reiam u katuun
2
A matsi hahatoulana,
alimiou goma poeiemi a tson moni e nigana na katuun papala e omina.
E möa.
U mar hakats teka ema niga nei turu katuun te hamana uaier tere Iesu Kristo a Tsunono Pan i tarara.
2 Tara,
te tasunama a tson moni tara luman lotu te kamena u hasobö u niga na manka man kankanaha,
na te tasu has nama a katuun papala te ka mena u hasobö u omi.
3 Balö te tara mareiem a katuun te ka mena u hasobö u niga bate poeiem i tanen,
mi gum ia teka tara makum turu tsunono.
Balö te poeiem tara katuun papala,
alö go na tuol ia tara makum ili turu katuun papala,
tsi alö go gum ia i puta teka i rehina mour.
4 Te markato uamu lalö teka,
ba lö te poeiem a töa katuun e niga bala nena a tana katuun.
A mouna u hakats i tamölö e omina.
5 Hengoiam,
a matsomi i tar.
E Sunahan e hopö kapir u katuun papala tara han i puta,
u katuun te hamana haniga uaier tere Sunahan.
Be Sunahan te poeiena u mar katuun teka te ngile nen,
e lue riou a Nipepeito tere Sunahan.
6 Kaba alimiou e sigala ramiou u katuun papala.
U tson moni nori te pitaputa rariou limiou bate kout rariou limiou.
7 Nori u katuun te ranga homi ner a solo a niga tere Iesu Kristo te pala uami limiou.
8 Te kukutie moa limiou a lo pan tere Sunahan ti kolotein,
alimiou e kato hanigamou.
Taraha,
a lo pan tere Sunahan e poeiena,
alö go mar ngil koru mei a tana katuun temar ngil koru has mena milö a peisamölö.
9 Kaba te tara tune mia limiou a katuun ielesala bate poeiemiou,
a töa te nigana na tai e omina,
alimiou e katoemiou a markato a omi,
bate pekoemiou a lo tere Sunahan.
10 Taraha,
a katuun te kukute hanigeiena a man lo hoboto tere Sunahan bate pekoena a töa puku,
nonei e kato uana tara katuun te pekoena a man lo hoboto.
11 E Sunahan e poei,
alö goma tsikolo ii,
na nonei e pei hasi,
alö goma hipöli ii.
Te ma tsikolo mia lö kaba lö e puliem a tana katuun,
alö e peko noahasem a lo tere Sunahan.
12 E Sunahan e ona mera nei limiou romana a man lo te purese ba nena a katuun tara markato a omi.
Te marka uanen teka ba limiou te ranga hanigamiou bate kato haniga hasimiou.
13 E Sunahan ema antunan taatagi nanoi a katuun tema taatagi nanei a tana katuun.
Kaba te taatagi namia limiou a tana katuun i romana,
be Sunahan te taatagi has ranou limiou romana tara pöata te butuna u kout i tanen.
A nihamana na markato
14 A matsi hahatoulana,
u palair u katuun e poeier,
“Alia e hamana hanigagu,”
kaba nori ema kato hanigari.
A mar nihamana teka e la papala tununa.
Na mar nihamana teka e taguhu has ranou u katuun?
15 Hena,
a töa katuun ega möa tu hasobö na kannou i tanen ema antuna has nei.
16 Ba lö te poeiem i tanen,
“La tala mela a niniganiga.
Alö go na meimei ba lö tena nou hantuem.”
Kaba lö ema hale mien tu hasobö tsi ta tsi kannou.
Ga markato teka ema niga tala nei.
17 A markato turu nihamana e katouana teka:
tema hatara nanei u nihamana i tamölö ta toukui ta mana,
u nihamana i tamölö e matena.
18 A töa katuun e tatei poeiena,
“A palai e hamana hanigar na palai e kamer a markato a niga.”
Kaba,
te hamana mia lö batema kamemi ta markato ta niga,
ga ime temar atei sil megoi lia u nihamana i tamölö?
Kaba,
alö e tatei tara sila namia te hamana haniga uagu lia,
tara markato i tar.
19 Alimiou e mar hamana uamiou teka:
e Sunahan a töa puku.
Bara!
Kaba a nihamana teka ema antunanei.
Taraha,
u liliahaneia u omi e hamana has uaier iesana,
ba nori te toltololo mer a nimatout.
20 Alimiou u katuun u tutu tema atei silemi a ka teka:
a katuun te poeiena nonei e hamana hanigana kaba nonei ema kato haniga nei,
nonei e mastein hamanana.
21 Hena,
e Sunahan e hatara raira te kato hamatskö uu e tuburara e Abraham i matana e Sunahan tara pöata te hakeia e Abraham a pien tson i tanen e Aisak tara makumun haats.
22 E Abraham u nihamana i tanen e kui gono mei a markato a niga i tanen.
Na markato a niga i tanen te hatarein u nihamana i tanen.
23 Na u raranga tere Sunahan i manasa e butu hamana tala,
taraha e poeiena,
“E Abraham e hamani e Sunahan,
be Sunahan e ngöe neien a katuun a matskö i matanen.”
Na nori i ngö haseien a hahikapien tere Sunahan.
24 Ba limiou te tatei atei sil talemiou a ka teka:
a katuun te kato hanigana e nigana i matana e Sunahan.
Kaba te hamana puku nen,
ema antunanei.
25 Na e markato has uana iesana tara pöata tere Rehap a tahol tema Jiu ii e hapolasa ba hasiin a markato te lulu tson uaien i manasa.
Nonei e lasir a pal tson te hala rema e Josua mena hamous ranen me hala kopis pouts ranen tara tana maroro.
Be Sunahan e ngöe neien a tahol a matskö i matanen te markato haniga uaien teka.
26 Alimiou e atei silemiou a tuenrei na katuun e matena te ka halhal ba mena neien u namnamei i tanen.
Na e kato has uana iesana tara nihamana na markato.
A katuun te poeiena nonei e hamana hanigana kaba nonei ema kato haniga nei,
u nihamana i tanen e la papala tununa.