E Iesu a pris a tsunono pan i tarara
8
A ka koru a kapan te ranga nemulam e markato uana teka:
e Kristo nonei a pris a tsunono pan i tarara.
Nonei e gumna tara pal matou tere Tamanen i Kolö.
2 Nonei e kuieiena a toukuin Pris i tanen tara makum a göagono koru tara luman lotu te kui e Sunahan.
3 A mamana pris pan hoboto e kamer a toukui tegi hala menaien a man kaan halhala puku na u haats tere Sunahan.
Na a pris a tsunono pan i tarara ega ka has mei ta ka tega hala naien.
4 Sanena nonei tega kaia i puta,
nonei egoma antunan pris ii,
taraha u pris i ka hakapa tegi halan a manka te matsköna tara Lo turu Jiu.
5 Kaba a toukui i taren e haharuei tuun nena a luman lotu hamana i Kolö.
Taraha,
pöata te katsin hatakeia e Mosis a luman lotu labalaba,
be Sunahan e ranga menen,
“Alö go tara kap hanigein tego kui hapopo naia lö a mamanaka tara markato tu haröte ii lia lö turu pokus i Sinai.”
6 Kaba a toukui te lui e Iesu e pan bala nena a toukui ti kamei u prisira i manasa,
taraha nonei te ranga bera noura tere Sunahan,
na nonei te hatagalena u hia hanhaniga u tsimus i tarara gono mei e Sunahan,
na u hanhaniga teka e niga bala nena u hia hanhaniga na i manasa,
taraha u hia hanhaniga teka e la gono menama a manka man niga na man mana.
7 Sanena u hia hanhaniga tutuun te nigan töa be Sunahan tema antunan kato lelenei tu hia hanhaniga tu tsimus.
8 Kaba e Sunahan noahas te sabe tima niga uai u katuun i tanen,
ba nonei e poeiena:
“A pöata e la nama romana
balia te kitse gou u hanhaniga u tsimus
gono mer u katuun hobotora
i Israel na i Juda.
9 U hia hanhaniga teka ema markato uanoi turu hanhaniga
ti kato gono merai lia u tuburen
tara pöata tu pile ramen lia i limaren
me luba ragu meien a han i Itsip.
Kaba nori ima kukutie ii u raranga turu hanhaniga i tar
balia a Tsunono ema haniga ra gien.”
10 Ba Tsunono e mar ranga mera neien teka,
“Nonei u hia hanhaniga u tsimus
te kato gono megoi lia u katunura i Israel.
Alia e hakei goua a lo i tar turu hakhakats i taren na i tori ren,
ba nori te hakats kap nitöa narouen bate kukutie ren.
Ba lia te tsunono ragouen
ba nori te hun katuun uariou i tar.
11 U katuun u tetenei na u katuun u kapan has ema antunan hatuts lel raroui u toularen
bate poeier,
‘Atei sileiam a Tsunono,’
taraha,
nori hoboto ena atei sile riou lia,
u katuun u tetenei na u katuun u kapan has.
12 Ba lia te taatagi ragouen bate luba nagou a man markato a man omi i taren.
Ba lia tema antunan hakats sil lel na goi a man markato a man omi ti katoeien.”
13 Pöata te ranga naia e Sunahan u hia hanhaniga u tsimus tega katoeien romana,
ba nonei e ranga nena u hia hanhaniga te kato mameien e toutounei hakapa.
Na ka te toutouneina ema ka lel menei ta nitagala,
na ema pina noi ba nonei te taia nou.