E Melkisedek a pris
7
E Melkisedek a kingina i Salem,
na nonei a pris has tere Sunahan iasa koru.
Tara pöata te kopis ma e Abraham tara hiatatung te atung hamate merameien u king,
be Melkisedek e hitupali gono menen be kalale nen.
2 Be Abraham e lu kakatena a manka hoboto te lue men tara hiatatung tara maloto a makum me hala nena a töa makum tere Melkisedek.
A solo,
e Melkisedek e poeiena,
A king tara markato a niga na matskö.
Na e pei hasena,
A king tara masalohana,
taraha a solo e Salem e poeiena,
masalohana.
3 E möa tu töa tu buku tega ranga hatein e Melkisedek e ka mei ta tamanen na ta tsinanen na ta tubunen,
tsi tega ranga hatein nonei i posei,
na tega ranga hatei hasiin nonei e mate.
Nonei e here nei a Pien tson tere Sunahan.
Nonei a pris na tara mamana pöata.
4 Ba limiou te tatei tara marei talemiou nonei a tson a kapan koru,
taraha e tuburara noahas e Abraham te haleien a hamalotona makum tara manka hoboto te lue men tara hiatatung.
5 Alimiou e atei silemiou e Livai e hatubunaia tere Abraham.
Na u pris te hatubuna ria tere Livai te kukutier u raranga tara Lo tere Mosis te poeiena nori egi roron lu a hamalotona makum tara manka turu katunura i Israel.
U pris e roron lue ria a manka teka turu toularen,
noahasina te hatubuna has uaren tere Abraham.
6 E Melkisedek ema pala uai tere Livai.
Kaba nonei e lu noa hasi a hamalotona makum tere Abraham,
nonei a katuun te lui u raranga hamana tere Sunahan,
na e Melkisedek e kalala hasi e Abraham.
7 Ara e atei silera a katuun te panina te kalalena a katuun te teteneina.
8 Na hamalotona makum e roron hala menari turu pris te pala uar tere Livai,
tena materiou.
E Melkisedek e lu hasi a hamalotona a makum kaba nonei e töatöa nitöana,
te ranga has uana u Buku u Göagono.
9 Ara e atei silera a pala te hatubuna ria tere Livai e lueier a hamalotona makum.
Kaba pöata te hala naia e Abraham a hamalotona makum tere Melkisedek,
e here hasei e Livai e hala sila nai a hamalotona makum tere Melkisedek tere Abraham.
10 E manana,
e Livai e hatubunaia tere Abraham,
na nonei ima posa noe ii tara pöata tere Melkisedek.
Kaba ara e tatei poeiera e Livai e ka hakapaia i tuenreina e tubunen e Abraham tara pöata te hitupali gono meia e Melkisedek e Abraham.
11 E Sunahan e halarai a tei Israel a Lo,
na nonei e hopö kapir u pris ti pala uu tere Livai tegi tara kap menaien a Lo.
Sanena a toukui turu pris ti pala uu tere Livai egi kato hanigan töari u katuun,
e Sunahan sane ma tatei hopö kap nai a markato a tsimus turu pris te kukutiena a markato tere Melkisedek a pris,
batema markato uanei tara markato tere Eron a pris te pala u tere Livai.
Kaba e Sunahan e hopö kap hamanein a markato a tsimus turu pris.
12 Na te palisna a markato turu pris,
ba lo turu pris te tatei palis hasina.
13-14 U raranga teka e hatei nena a Tsunono i tarara.
Ara e atei silera nonei e pala uu tere Juda na ema pala ua ii tere Livai.
Na e möa ta töa ta katuun tere Juda tega kui ia tara makumun haats.
Pöata te ranga naia e Mosis a toukui turu pris,
nonei ema katoe ii tu töa tu raranga tara pala tere Juda.
E möa.
A taina pris te markato has uana tere Melkisedek
15 Na tana pris e butu hakapa tala te markato uana tere Melkisedek.
Nonei e Kristo.
16 Ara e atei silera nonei ima katoe ii a pris iahana a Lo te poeiena nonei ega hatubunaia tere Livai.
E möa.
E Sunahan te katoeien a pris tara nitagala tara nitöatöa i tanen tema antunan kapa nei.
17 Taraha,
u Buku u Göagono e poeiena:
“Alö e pris nitöa mou tara mamana pöata
te markato uu e Melkisedek.”
18 Na e Sunahan e hakapa mei a lo na i manasa,
taraha nonei a lo teka ema tagala ii,
e ka pinopino tuun.
19 A Lo tere Mosis ema kato hanige ii ta töa ta ka na ta katuun.
Kaba a maroro a niga bala koru e butu hakapa,
na ra e tatei la uara tere Sunahan te sila uara ra tara maroro teka.
20 E Iesu e butun pris gono mei u raranga tere Sunahan te mana uana iasa.
21 A pal tson i lui a toukui tara pris i manasa be möana ta katuun tega hamana uu iasa.
Kaba e Sunahan e katoe ii e Iesu a pris me ranga hamana has uana iasa me poeiena i tanen,
“Alia a Tsunono u kato hakapi u ranga te mana uana iasa.
Alia ema tatei palisegi u hakats i tar.
‘Alö e pris nitöa mou tara mamana pöata.’”
22 U ranga teka te manana iasa,
e haröto nena e Iesu e hatagalena u raranga tere Sunahan te kits gono meraien u katuun na e niga bala nena u rangana tara Lo na i manasa.
23 U pris ra i manasa i parpara koru,
taraha,
pöata te mateia a töa turu pris ba tai te palise nen bate la lasina.
24 Kaba e Iesu e ka nitöa nou,
na toukuin pris i tanen e möa ta kapakapa nen.
25 Na e Iesu e antunan lu pouts rena u katuun hoboto tara mamana pöata te la sila rima i tanen bate la uaier tere Sunahan,
taraha nonei e ka nitöa silena tego singo sil meraien tere Sunahan.
26 Na e niga koruna te ka menareira a pris a kapan koru te göagono koruna na tema ka töa koru menei ta ka ta omi i tanen na e möa ta ka tega kato homieien na e ka halhal barena u katuun u omi.
Na nonei e söata sei korue ria tara han tere tamanen i Kolö.
27 Nonei ema here ranei a palair u tsunono pan turu pris te roron haatsir turu mamana u lan bate haats mam sileier a man markato a man omi i taren bate töan haats sileier a man markato a man omi turu katuun.
Kaba e Iesu e möa.
Tara pöata te hala naien a peisanen tara tou mate,
nonei e katoeien u töa puku lasi u haats te hakapi u haats hoboto.
28 A Lo tere Mosis e hopö kap rena u katuun tuun tegi tsunono pan uaien turu pris,
kaba nori ema tagala nitöa sileri a markato a omi.
Kaba u raranga u mana koru te lama i murina a pöata tara Lo,
te hopö kapiin a Pien tson tere Sunahan te matskö nitöana tara toukuin pris teka te ka nitöa nou tara mamana pöata tema antunan kapa nei.