U pas te koloto menai e Pol tere
PILIMON
1
Alia e Pol,
alia e karabus silegu tu kui menai lia a toukui tere Iesu Kristo.
Alam mere Timoti,
e toularara e koloto menami u pas teka i tamölö.
O Pilimon,
alö a hahikapien i tamulam tu kui gono meraioulam.
2 Na u raranga teka e la uana turu kristen te roron hagum ria i luma i tamölö na tere Apia,
e hahinarara,
na tere Akipus has,
nonei te tuol hatagala gono meraiou ra turu Bulungana u Niga.
3 E Sunahan e Tamarara na e Iesu Kristo a Tsunono i tarara egi taatagi naioulö na egi hala hase ii lö a masalohana.
E Pilimon e ngilir u katuun tere Sunahan
4 Tara man pöata te singo sile gia lia alö tere Sunahan,
alia e haniga uagu i tanen.
5 Taraha,
alia u hengoen te ngil koru mera mi lö u katuun hoboto tere Sunahan na te hamana koru has ua mölö tere Iesu a Tsunono.
6 Alia e singo silegu u nihamana te hiararanga nerara ega hale ii lö ta niatei pan tara mamanaka a niga te la nama tara solona e Kristo.
7 A tsi toular,
a torir e sasaala koru me masa mena tu hengo menai lia te ngil koru merami lö u katuun tere Sunahan bate haniga ramen.
E Pol e harangata sil e Onesimus
8 Tara markato teka,
ba lia tema antunan matsingolo nagi tego ranga hatagala meilia lö tara solona e Kristo tego kato menai lö a toukui tego kati lö.
9 Kaba lia e singo hatagala gia i tamölö tara markato te ngil menari a tana katuun.
Alia e Pol,
e ranga heregi a tsonpan na e karabus sil hasegu e Iesu Kristo.
10 Alia e harangata silegu a pien i tar e Onesimus te hatamana negulia te karabus gia lia,
taraha alia u taguheien tego hamana uaien tere Kristo na nonei e here talenei a pien i tar.
11 I manasa e Onesimus ema taguhu hanigei lö.
Kaba i romana nonei e taguhu haniga korue noulö na lia has.
12 Noahasina te ngil koru menagien lia,
kaba lia e hala pouts mena goien i tamölö.
13 Alia e ngilin hake gien teka ba nonei te lueiena a makum i tamölö bate taguhe noua lia tara pöata te karabus sil menagi lia tu hahatei menai lia u Bulungana u Niga.
14 Kaba alia ema antunan kato nagi ta ka tema haniga nami lö.
Tara niniganiga i tamölö,
alö go taguhu mei lia u ngilngil peisa i tamölö.
15 Nonei toum romana a ka te laba sil memei lö e Onesimus tara tsitabubun pöata,
balö te lupoutse men batena kanitöa memen.
16 Kaba ema lupouts here namoi lö a katunun kukui puku.
Nonei e toularara tara pala tere Kristo.
Alia e ngil korue gen.
Na lö e ngil koru hase moen,
taraha nonei a katunun kukui puku i tamölö na limiou e hamana hoboto has mia tara Tsunono.
17 Na te tara here tala namilö alia a hahikapien i tamölö,
bara,
mar lu tala menai e Onesimus tego mar lu has menailö alia.
18 Te kato homien i tamölö,
tsi te ka menen ta haroho i tamölö,
ba lö te hateie moulia balia te palis poutse gouen.
19 Alia e Pol na lia e koloto peisegi u raranga teka a limar,
alia e hamatane gou lö.
Kaba lö e atei silem alö e ka has mem a haroho i tar,
taraha alia u taguhe ioulö balö te hamana uaiem tara Tsunono.
20 A tsi toular,
tara solona a Tsunono alö go taguhe moulia,
ba lia te sasaala uagu tere Kristo.
21 Alia e koloto megi u pas teka taraha,
alia e atei silegu alö e kato bemoi lia a ka teka,
na man palaina a manka lel has.
22 Na lö go hamatskö has bei lia ta makum tena ka goua lia.
Alia e hamanegu e Sunahan e hengoe nou u singo i tamilimiou bate haniga nanou tego la uu lia i tamilimiou.
U katuun te kui gono mer e Pol e hala ner u rangan haniga i taren
23 E Epapras e hala nanou u rangan haniga i tanen i tamölö.
Nonei e ka gono menou lia tara karabus te kato menaien a toukui tere Iesu Kristo.
24 Na palair u katuuna te kui gono mere gulia ere Mak mere Aristakus na e Demas na e Luk e hala has neruma u rangan haniga i tamölö.
25 A nihitaguhu tere Iesu Kristo a Tsunono e tatei ka gono mena u namnamei i tamilimiou.
Alia e Pol