U pas te koloto menai e Pol tere
TAITUS
1
Alia e Pol,
a katunun kuia tere Sunahan na aposol has tere Iesu Kristo.
Alia i hala silemei tegomi hatagala menai u nihamana turu katuun te hopö kapir e Sunahan.
Na tego taguhu meraien lia ba nori te atei siler u hihatuts u mana,
bate tatei tus mera neien tara markato te hanigeiena e Sunahan.
2 Ba nori te kameriou u hakhakatsina tegi hahaloso menaien a nitöatöa te ka nitöana.
Na e Sunahan,
tema tatei gamo nei e ranga hamana naia a nitöatöa teka i mamuna te butuia u puta.
3 Na tara pöata te hopö kap noahas naien,
nonei e haröto halesalein u raranga i tanen tego habulungana menaien lia.
E Sunahan te lu pouts raioura,
nonei noahas te hale meilia a toukui teka.
4 O Taitus,
alö a pien tson i tar,
te hamana hoboto uarara tere Sunahan.
E Sunahan e Tamarara na e Iesu Kristo te taguhu raioura e tatei taatagi nariou lö na e tatei hala hase rilö a masalohana.
A toukui tega katoeia e Taitus i Krit
5 Alia u laba sil memeilö i Krit tego kato hakapa noa bumemeilö a saha ka tima kato hakapa noe mei turu tson mamamura i Krit.
Na lö go lui ta katuun tega mammamir u katuun te hamana uaier tere Iesu Kristo,
tara man tötöa man taun i Krit ti mar ranga noahas mena meilia alö.
6 A tson mammam ega kamei a markato a niga bu katuun tema tatei ranga sile rien,
na nonei ega kamei a töa puku a tahol na galapien i tanen egi kamei u nihamana tere Kristo na markato a niga,
ba u katuun tema tatei ranga sileri tegi hipus uaien,
tsi tegi hipus menaien e tamaren na e tsinaren.
7 A katuun tere Sunahan e goma kamei ta markato ta omi i tanen,
taraha,
nonei e pepeito kap nena a toukui tere Sunahan.
Nonei goma hihipus ii na e goma tatei raharaha boroboro has ii.
Na nonei goma tatei uaua pala iib ne goma tatei hiatatung has ii na egoma pepeits ii bate ngileiena a ka a parpara.
8 Kaba nonei a mar katuun te tatei toulena a katuun bate las mena neien i luma i tanen,
na mar katuun te ngileiena a mamanaka a niga.
Na nonei ega hakats haniga bate katoeiena a manka te matsköna,
na ega kato hasi a mamana markato a gogoso bate hala puta hasena a peisanen.
9 Nonei ega pile kap hakarapotein u raranga u mana tere Sunahan timar hatuts menaien,
ba nonei te hihatuts nanou u raranga u mana,
ba u katuun te hanigeriou u hihatuts bate hamanar.
Ba nonei te tatei ranga hatagalana turu katuun te ranga hasoalar bate hatei raneien te kukute mena rien u raranga u gamo.
10 Alia e hatei gilö a man raranga teka,
taraha,
u katuun u parpara koru te hipusur na te gamogamor.
Na u Jiu,
nori koru u katuun ti roron tagala korumei u hapö,
ti ranga bate poeier nori koru te pala uaier tere Kristo,
bate gamo rari u katuun u hihatuts u gamo.
11 U katuun teka egi ranga hapiou mer batema tatei hipusri,
nori e kato homi raier u katuun.
Taraha nori e ngilin lu tuun ner taka ba nori te hatuts rari u katuun a manka tema matskö nei.
12 A töa has i taren,
a propetina i Krit,
e ranga me poeiena,
“U katunur i Krit u katuun u gamogamo na e kato here rari u enimol u hie,
na nori u katuun u karous koru na u nonou pala.”
13 Na u raranga teka e manana.
Bara,
tara markato tala teka alö ena ranga hatagala meramou u katuun teka egi hatagala poutsi u nihamana i taren.
14 Nori egima hengoei a man raranga a man gamo turu Jiu,
na egima hengo hase ii a man raranga turu katuun ti tori tsuga hakapein u raranga u mana.
15 Turu katuun te kato hagöagono ria i matana e Sunahan,
a mamanaka i taren e göagono hasina.
Kaba,
turu katuun u omi te hahamanar,
e möa ta töa ta ka i taren tega nigaia i matana e Sunahan,
taraha,
a toriren na u hakats i taren ema göagono has nei.
16 Nori e pei laser nori e atei siler e Sunahan,
kaba a markato i taren te haröto nena nori ema atei sileri e Sunahan.
Nori e hipus korur,
na nori ema antunan kato has nari ta ka ta niga.
Na u katuun ema ngil koru has rarien.