2
Kaba lö,
alö go hihatutsin a saha ka te matsköna turu hihatuts u niga.
2 Hatutsir u tsonpan egima spak ii,
nori egi hakats hanigani a man markato te katoeren bate kukuteier a man markato te nigana.
Nori egi atei sil haniga korui u raranga u mana tere Sunahan na markato te ngil menari a taina katuun,
na markato tegi tuol hakarapoto uu bate söateiera a mamana nitiama.
3 Na lö go hatuts hasir u toböana egi kukute a markato a niga tere Sunahan bate kato hanigar.
Ba nori tema tatei ranga hohomi nari a tai,
na u ngilngilina tara tou ua egoma tatei kits kap raien.
Ba nori te hatuts rari a palai a man markato a man niga,
4 bate haröto rari a touhaliou te kukubei noar,
ime tegi mar ngil meraien a pal tson na galapien i taren,
5 bate tatei hala puta haseier a peisaren bate katoeier a markato a gogoso.
Nori egi tarakap hanigein u luma i taren,
bate katoeier a markato a niga bate hengo raier a pal tson i taren,
ba u bulungana tere Sunahan tema tatei ranga hohomi nari.
6 Na lö go ranga hatagala has mer u hitots egi hakats haniga bate hala puta haseier a peisaren.
7 Tara mamanaka te katoe mölö,
na turu hihatuts i tamölö,
harötein a markato a niga balö te habulungana nem u raranga u mana na u matskö.
8 Na te katoe moa lö u raranga u niga ba u pakö te matsingolo riou,
taraha nori e moa riou ta ka tegi ranga hohomi sil merien ra.
9 Ranga mer u katunun kukui puku egi hengoer u katuun pan i taren bate kato hasasaala mera rien a mamanaka te katoe ren.
Nori egima antunan ranga palis rai u katuun pan i taren,
na egima antunan kop hasnai a manka i taren.
10 Nori egi harötein te pakoko haniga mena rien a toukui i taren.
A mamana markato hoboto a niga i taren e tatei taguhena u hihatuts tere Sunahan te taguhu ranou ra.
11 A niniganiga tere Sunahan e butu hakapa me hala ranei u katuun a maroro tegi taguhu meraien u katuun hoboto,
12 bate hatuts raneira tegi tori tsuga menaira u ngilngilina i puta.
Na tara pöata i romana aragi hala puta hasi a peisarara bate kukutera a markato a niga tere Sunahan.
13 Tara pöata te hahalose riara a nisasaala te hamana sile rara,
nonei a pöata te butu noua u hiharöto pan tere Sunahan a kapan i tarara,
nonei e Iesu Kristo temi lu pouts ranou ra.
14 Nonei e hala sile ii a peisanen tego sakahis meraien ra tara mamana markato a omi.
Na nonei e mate sil tego kato hagogoso meraien ra,
u katuun i tanen,
bara te hun katuun uara i tanen bate kato hatagalera a man markato a man niga.
15 Nonei teka a manka tego hihatutsinilö.
Ranga mei a nitagala tara nitsunono i tamölö bate hala nem u rangan hitaguhu turu katuun te hengoe riou lö.
Möa tu kato taka tegi tatei raharaha meilö u katuun.
Ta katuun e namots sigale noulö.