A katuun pan turu Lotu ga hatarein a saha markato i tanen
3
U raranga u mana e poeiena,
“A katuun te ngilin katoena a toukui tara katunun pepeito kap turu lotu e ngilena a toukui a niga.”
2 A katunun pepeito kap turu lotu ema tatei ka menei ta ka ta omi i tanen.
Nonei ga ka mei a töa puku a tahol.
Na nonei ga hakats haniga bate hala puteiena u ngil i peisanen bate kato hamatsköna.
Nonei ga tara sil a taina katuun bate ngö menaneien i luma i tanen.
Na nonei ga atein hihatuts has.
3 Nonei goma tatei ua hatutu ii na egoma katunun hiatatung ii na egoma ngil hasei a moni a parpara.
E möa.
Nonei has a katuun te tatei tuatamina turu katuun bate kato haniga ranen.
4 Nonei e antunan tara kap haniga nena a tahol na galapien i tanen na galapien e tatei hengo haniga hase ren na e tatei tara marei hase ren.
5 Taraha,
tema antunan tara kap haniga nanei a tson a tahol na galapien i tanen,
nonei ma antunan tara kap haniga has nanei a hun katuun tere Sunahan.
6 A kristen a tsimus ma tatei lue nei a toukui tara katunun pepeito kap turu lotu.
Nonei e namots ranga sesei nena a peisanen pouts bate lueiena a nihahuna te lui e Satan.
7 A katunun pepeito kap turu lotu ega markato uu tegi tara marei u katuun tema hamanari.
Nonei e namos kurapa mena a nimatsingolo,
bate tanga noa tara tanga tere Satan.
U katunun hihitaguhu turu lotu
8 U katunun hihitaguhu turu lotu egi kato haniga has,
batema ka meri u huol u baku.
Nori egima antunan ua haparei u uain bate ua hatutur na nori egima gono bei a peisaren a mamanaka.
9 Nori egi pile kap hakarapotein a mouna u nihamana batema katoeri ta ka tega hamatsingolo raien,
na nori egi ka mei u hakats u gogoso.
10 U katuun teka egi torohana mam bir,
te hatara na roien nori e ka mer u baku u matskö,
ba nori te tatei lue riou a toukui tara katunun hihitaguhu turu lotu.
11 A touhaliou has i taren egi kato haniga batema katoeri tu ranga te poeiena a tana katuun e kato homina.
Nori e tatei hakats hanigar bate pakokeier a mamanaka te katoe ren.
12 A katunun hitaguhu turu lotu ega ka mei a töa puku a tahol i tanen,
bate tara kap haniga nena a galapien na mamanaka i tanen.
13 U katuun te kato hanigeier a toukui tara katunun hihitaguhu e lu beri a peisaren a nitaratara marei a niga,
na e ka has meriou a nitagala te hamana uaren tere Iesu Kristo.
A mouna u lotu i tarara
14-15 Alia ena la guma romana,
kaba lia e koloto megi a man raranga teka i tamilimiou tena mots hamokomoko ua guma lia,
ba limiou te atei sile mou ime tego markato uaiam limiou turu katuun hoboto tere Sunahan.
Taraha nori a lumaa tere Sunahan te töatöa nitöana,
na nonei a mouna u nihamana.
16 Na ra hoboto e hia hanhaniga ner u lotu i tarara e ka mena a mamanaka a niga koru te haröto halakasa ner:
E Kristo e butun Katunuma.
U Namnamei u Göagono e harötein te matskö uanen.
U angelo i tareien.
U katuun i habulungana naien turu han hoboto.
U katuun e hamana uaier i tanen.
E Sunahan e lu pouts menaien i Kolö.