A toukui tere Timoti i murimuri
4
Hengo!
U Namnamei u Göagono e ranga halesalana bate poeiena,
a palair u katuun e laba nariou romana u lotu hamana tara kapakapana a pöata.
Nori e ngilin hengo rariou u katuun u gamogamo bate kukutier u hihatuts turu liliahanei u omi.
2 U hihatuts teka e la nama romana turu ranga u gamo turu katuun u gamogamo tema matsingolo lel meri a ka a omi.
3 Nori ena hapiou nariou tegi hitöl uu katuun,
na e hapiou ba has raroui a palaina a kannou te habuti e Sunahan egi lu mei u katuun te hamanar na te atei siler a ka a mana,
a niniganiga.
4 A mamanaka hoboto te katoe e Sunahan e nigana,
ara gima höanei ta töa ta ka,
aragi lu mei a mamanaka a niniganiga.
5 Taraha,
u raranga tere Sunahan na u singo e kato hagöagonena a kannou i matana e Sunahan.
A katunun kui a niga tere Iesu Kristo
6 Te hatara namoua lö a manka teka turu hahinamölö na u toulamölö,
alö a katunun kui a niga tere Iesu Kristo,
e kato hatagale moilö a peisamölö na u rarangana tara nihamana turu hihatuts u niga te kukutie mölö.
7 Kaba,
alö go hapolasa bani a man hahatate pinopinona i manasa,
tema hanigenei e Sunahan.
Alö go hahangeia a peisamölö a markato a niga tere Sunahan.
8 Te kato hatagale mia lö u tuenrei,
e nigana.
Kaba tego kato hagogoso mei lö u namnamei i tamölö te niga balana,
taraha a markato teka e taguhe noulö tara nitöatöana i puta na tara nitöatöana i Kolö has.
9 U raranga teka e manana,
na ra hoboto gi hamaneien.
10 Tara a nimanamana nen,
ara e kui hatagala sil noahasera a ka a niga teka,
taraha ara e hakera u nihamana i tarara tere Sunahan te töatöana.
Nonei te taguhu rena u katuun hoboto bate lu pouts rena u katuun te hamana uaier i tanen.
11 Ranga balö te hihatuts nem a manka teka,
a manka tegi hengoe.
12 Alö a katuun a hitots,
ego möa ta katuun tega pita putputeiou lö.
Harötein ta markato ta niga turu katuun te hamanar te markato uana a katuun a kristen turu hihatuts i tamölö,
na tara markato i tamölö na te ngil mera milö u katuun hoboto na te hamana ua mölö tere Sunahan,
bate ka mem a markato a gogoso.
13 E antunana tena la guma lia,
alö go hatagala nitöani tego rit menai lö u Buku u Göagono turu katuun bate hahengor,
balö te rararie men bate hihatuts has namen.
14 Alö goma totonei a ka a niga te halei lö e Sunahan,
ti hatagali a pal kapan turu kristen ti katoi u rangan propet bate hatakoper a limaren i tamölö.
15 Kato hatagala nitöani a toukui teka bate hakats nitöa namen,
bu katuun hoboto te tatei tarer a toukui i tamölö e tataalana.
16 Tara hanigei temar ka uamölö na manka te hihatuts nemölö.
Pile hakarapotein a markato teka,
ba lö te taguhe mou a peisamölö na u katuun has te hengoe riou lö.