Singo sil raiam u katuun hoboto
2
U raranga tutuun i tar e mar la uana teka,
singo sil raiam u katuun hoboto,
singo sileiam ta hitaguhu na limiou ego haniga be sil has ramen tere Sunahan.
2 Singo sil has raiam u king na palair u katuun pan hoboto,
ba ra te tatei karia tara masalohana bate kakamoto hanigara i matana e Sunahan na turu katuun hoboto.
3 A man mar singosingo teka e niga koruna,
na e Sunahan te ngilin lu pouts ranou ra e haniga korue nen.
4 Nonei e ngilin lu pouts ranoura u katuun hoboto bate atei silera a ka te manana.
5 Taraha e Sunahan a töa puku,
na e Iesu Kristo puku lahas te tuol na i gusura u katuun na e Sunahan.
6 Nonei e hala sile ii a peisanen tego sakahis meraien u katuun hoboto,
bate haröto nena u ngilngil tere Sunahan i tarara,
tere na pöata peisa noahas ien.
7 Nonei a ka te hala sile mei lia e Sunahan tego aposol uu lia i tanen,
bate hatuts raiegu u katuun tema Jiu ri ba nori te tatei hamaner a ka te manana bate atei sileren.
Alia ema gamogi.
E möa!
Alia e ranga hamanagu.
8 Alia e ngilegu a pal tson turu han hoboto,
egi hasöani u ualima u gogoso te möa ta raharaha bate singo uar tere Sunahan.
A markato tara tahol
9 Na lia e ngil hasegu a touhaliou gi hasei u mar hasobö tega tara hanigaia i matar u katuun.
Nori gi hasei mei u hasobö u hakats u niga.
Nori gima hakats hapara nai tegi maman kato menaien a huluren bate hakeier a manka a man kankanaha na u hasobö na mamanaka a hihol i tanen te pan koruna.
E möa.
10 Nori gi kato nitöani a man markato a man niga.
A markato teka e matsköna tara touhaliou te poeier nori e hatsunoner e Sunahan.
11 Alimiou a touhaliou go hahengo halongolo tuun iam te hihatuts ria bate hala putemiou a peisa milimiou.
12 Kaba lia ema hanigegi tega hihatuts uu a tahol bate mammam nena a tson.
Nonei ga hahengo tuun lasi.
13 Taraha,
e Sunahan e kato mami e Adam,
ba nonei e töan katoeiena e Eva.
14 E Adam ima gamoei.
E möa.
E Eva ti gami me pekoena a lo tere Sunahan.
15 Kaba a touhaliou ena lu sila pouts raroua tena posa mera roien a galapien,
na tena hamana nitöa uarouen tere Sunahan bate ngil raier a palair u katuun bate kamer u hakats u matskö na u niga.